Teeɓ ki 8

Nihsiŋ ndaɗi yasna-kanakɗoh

1Wa Kuyaŋ Mbaala ƴina nihis ndaɗa yasna-kanakɗoh, Asamaan tummba tek ini ree camban wahtu.

2Weɗ ŋ hotoh malaakaaci yasna-kanak ci na tufke ŋ fiki Kooh ; ca eɗuusa kuluɓ yasna-kanak. 3Malaaka wiiriis hayya tufukka ŋ sero seeƴkohaana. A ambee anda cuuraay haɓɗohuuɗ urus. A eɗuusa cuuraay laayiɗ ne a ambsoh ca na kiim ciŋ ɓo'-Kooh ci jen, a eɗoh ca ŋ seeƴkohaani haɓɗohu urus, wi nik ŋ fiki ɓoofoha-buuri. 4Wa a eɗoh ca, ɗuukriŋ cuuraay ci rapeeɗa ŋ fiki Kooh, wa hunnda na kiim ciŋ ɓo'-Kooh ci.

5Ƴutta malaakaani ɓayya andaani, a tummbaa yongkaah po wa riiffa ŋ yongkaahiŋ seeƴkohaani. A njafoha ndaam, wa keennda ŋ kehƴi, jaarra inding ci laɓeeɗa, ɓi ɗuuɗ kerhasseeɗa, wa melñeeɗa, kehƴi yoondɗukka.

Kuluɓ ci nikiis ci koc

6Malaakaaci yasna-kanak ci ambee kuluɓ ci yasna-kanak ci tufukka ne ca kuluɓ.

7Yi koc kuluɓpa, weɗ toɓ galacaac na yongkaah ambsukohiɗ na ñif hayoh, wa njafuusa ŋ kehƴi, haaƴ yino ŋ haaƴ ci kaahay ciŋ kehƴi hoommba, haaƴ yino ŋ haaƴ ci kaahay ciŋ kidig ci na paangfi iirndi nammba hoom.

8Yi kanakɗoh kuluɓpa, inaa duu'in haa tango yakak kaɓiɗ njafuusa ŋ cookmi. Haaƴ yino ŋ haaƴ ci kaahay ciŋ cookmi nikka ñif, 9haaƴ yino ŋ haaƴ ci kaahay ciŋ feruuɗ ci na pese ŋ cookmi kaannda, haaƴ yino ŋ haaƴ ci kaahay ciŋ gaal ci yahrohuusa.

10Yi kaahayɗoh kuluɓpa, hor yakak puloh eel ci, wa jaaleeɗa jafjaf. Wa keennda ŋ haaƴ yino ŋ haaƴ ci kaahay ciŋ kal ci na cul ciŋ masuɓ ci. 11Horeem teeku "Absinta"1. Haaƴ yino ŋ haaƴ ci kaahay ciŋ masuɓ ci jen nikka absinta, ca aayya po ɓooɓa anee nga, laayiɗ nga ɓa kaannda.

12Yi nikiisɗoh kuluɓpa, ŋ ndeem, haaƴ yino ŋ haaƴ ci kaahay ciŋ nohi na caɓni na hor ci laɓuusa ne haaƴ yino ŋ haaƴ ciŋ wa kaahay ci ñuus ; siñaariŋ mbehi ñakka haaƴ yino ŋ haaƴ ciŋ wa kaahay ci, wiŋ weki nammba mand ɗaa.

13Ŋ markissa. Ŋ hotta caango pundeeɗa ŋ ɗafka ɗafka, ŋ kerahha ɗe leehkeeɗa an : « Cooy naamo ! Naamo ! Naamo ! Mas ɗu ɓi gen ŋ kehƴi, sagu kuluɓ ci tas, ci malaakaaci kaahay ci kulɓan. »