Teeɓ ki 4

Ɓoofohaaniŋ Kooh buuri, na Nguuriŋ ɗe

1Wa ineem coot inii weɗ teeɓuk ko : Ŋ hot bunta rangsukiɗ ŋ Eel ci te hoosoori ŋ ɗeɓee kerah woyeeɗa na so ɗiiɗɗeeɗa findi kuluɓ woosa so ne : « Rapa ndii, ŋ teeɓ ɗa ini taamb nga te wa raakohan ɗaa. » 2Ŋ ɗiski ɗiski Fuuɗsi Hoolohngaani ammba so, ŋ hotta ɓoofoha-buur tufkiɗuuɗ ŋ Eel ci, raakka Yi ɓoof nga. 3Yi ɓoofee nga melciɗeeɗa findi atoh fi moɗohngaani na woyse yaspis na wi na woyse sardiyon ; ñaangi-ñaangi melciɗ findi atoh fi moɗohngaani na woyse esmaragdos1 willaa.

4Ɓoofoha-buur ndaŋkiyaah-kanak na nikiis (24) ndeerra ɓoofohaaneem, yakak ndaŋkiyaah-kanak na nikiis (24) ɓooffa nga ca, ɓa ɓekkee kulɓa yaanow, ɓa degga mbahne-buur haɓɗohu urus ŋ haf ciŋ ɓa.

5Ɓi meleñ na ɓi ɗuuɗ na ɓi inding kurkoheeɗa ŋ ɓoofoha-buura te laampa yasna-kanak siñaarɗeeɗa ŋ fiki ɓoofoha-buura, ceɗ Fuuɗis ci yasna-kanak ciŋ Kooh2. 6Ŋ fiki ɓoofoha-buura raakee inaa haa cookom weer melciɗ findi seetu.

Ŋ leerniŋ ɓoofoha-buuri, na ini wila, raakeen pesiɗ nikiis, ca riiffa na has ŋ fikiiri na finhoori. 7Pesiɗi koc mand na gaynde ; yi kanakɗoh mand na ɗoon naar ; yi kaahayɗoh raak fiki haa fiki ɓo', yi nikiisɗoh mand na caangooni na punde. 8Pesiɗ ci nikiis ceem yaa nu nga ɗah raakka paɓ yasna-yino ; paɓ ciŋ ca riiffa na has ŋ ooɓi na ɗafki. Ca gennda gen na woo kii noh na wek :

« A hooliɗ, a hooliɗ, a hooliɗ ;

Kooh Heɗi, yi Heɗ-hatili ;

a yi nikee, a yi nik te a yi na haye. »

9Waas nu ca yakɗohee na ƴeek Yi ɓoof ŋ ɓoofoha-buuri, Yi na pese po faw, te ca eɗee ɗe cir, ca corkiɗee ɗe ɗah, 10yakak ci ndaŋkiyaah-kanak na nikiis ci (24) ƴek ŋ fiki Yi nik ŋ ɓoofoha-buuri ne ɓa ñaamuk Yi na pese po faw. Jaar ɓa njaf mbahne-buur ciŋ ɓa ŋ fiki ɓoofoha-buuri, ɓa woyee ne :

11« Heɗi, Koohiŋ ɓoo,

a fu yakɗaah,

fu yeyyoo cir na hatil.

Laam a fu fer in ci jen

fu waaɗta ne ca raak,

ca feruusa. »