Macce 28

Yeesu hultiɗ

1Wa mbeha na iɗsiɗkohse coot, ŋ wiisaaɗiinaŋ mbehi koc, Mari Makdala na Mari yi yinoori, kaɗta marka ruy-ruya.

2Ɗekka po kehƴi yoondɗukka keeh-keeh ; malaaka Heɗ ɓoo pulohha Eel ci, a kaɗta pilngina atoh fa rangee wa, a ɓooffa ŋ ɗafuk wa. 3A melciɗeeɗa findi meleñ, kulɓaaciŋ ɗe nikka yaanow tar. 4Soldaar ca niiɗee ruy-ruya saakɗoheeɗa sagu tiit, ɓa mannda na kaaniɗ.

5Malaakaana woosa ɓitiɓ ca ne : « Ɗu, kinaat tiit, ŋ inhiɗ ne ɗu na marke Yeesu yi daaƴsee ŋ kurwaa. 6A nikɗi ndii, a hultiɗuuɗ findi a woyohee wa. Hayaat ɗu marak ɗiski a faansee, 7te araat kaɗ ɗu woya taalubeeciŋ ɗe ne, a hultiɗuuɗ, a yaa adug ɗu Galile, ɗu na hee ɗe hotohe ndaam ; weɗɗeem, ŋ woyiɗ ɗu wa. »

8Weɗ ɓitiɓ ca aroh kurkoh ŋ ruy-ruya, ɓa feyuusa waaye, ɓa summba keeh-keeh, ɓa nuppa ne ɓa woyaa wa taalubeeca.

9Wa ɓa kaɗee, weɗ Yeesu hayoh cohe na ɓa, a woosa ɓa ne : « Ɗu tum na ? » Ɓa reɓpa nga ɗe, ɓa ammba kot ciŋ ɗe, ɓa ƴekka ne ɓa ñaamuk ɗe. 10Yeesu woosa ɓa ne : « Kinaat neƴƴoh ; kaɗaat ɗu woya ɓooɓiŋ ngo ne ɓa kaɗaat Galile, ɓa hotohan ndo ndaam. »

11Wa ɓa kaɗe, ɓi ɓo' ɓaah ŋ ɓa niiɗee ruy-ruya kaɗta kur ka, naandsukka kilifaacaŋ seeƴkiɗoh ca ini raak jen. 12Wa ɓeem coh na yakak ca, ɓa kerhiɗohha na ɓa ŋ woo, ɓa puliɗta kopor laayiɗ, ɓa eɗtaa ɓa niiɗee ruy-ruya. 13Ɓa woosa ɓa ne : « Woyaat ne, a taalubeeciŋ ɗe tel ɗu nga na wek, raak ɗu neehiɗ, ɓa rokka fiɗaafi, 14te goornoor keraha ɗah, ɓoo hey woye na ɗe, ineem kanaat ɗu jaahiɗ. »

15Ɓa ɓayya kopora, ɓa tumohha findi ɓa woyohu, woo keem pasarkohha ŋ ɗooƴ Yawuut ci po woti.

Yeesu tuuƴiɗ taalubeeciŋ ɗe ŋ adinaani

16Taalubeeca ndaŋkiyaah na yinooca (11) kaɗta Galile ŋ tangoora Yeesu woye. 17Wa ɓa hot ɗe, ɓa ñaamkeeɗa ɗe, waaye raakka ɓi liiɓsiɗohee nga ɗe. 18Weɗ Yeesu reɓoh nga ɓa, a woosa ɓa ne : « Eel ci na kehƴi jen deguuɗ ŋ yaah ciŋ ngo.

19Kaɗaat ŋ cuuɓ ciŋ adinaani jen, ɗu tum ɓooɓi taalube, ɗu ɓokit ɓa ŋ tiikiŋ Baabi na Kuɓki na Fuuɗsi Hoolohngaani, 20ɗu jangiɗ ɓa po ɓa taambiɗ nakoh ci ŋ eɗ ɗu jen. Te ambaat ne : Ŋ hey nike na ɗu Kooh-nu-wiis po mbaɗna Adina reehan. »