Macce 15

Farisen ca na mbaahaŋ ɓa

1Wa raakka mbeh, ɓi ɓo' ɓaah ŋ Farisen ca na ɓi jangɗohoh ŋ waasiŋ Musaa pulohha Yerusalem hayya ɗiskiŋ Yeesu, ɓa woosa ɗe ne : 2« Wa ye tah taalubeeciŋ ɗa na taambɗeeɗi mbaahiŋ caac ciŋ ɓoo ? Marka rek ! Ɓa hee ñame ɗah, ɓa na ɓohñukeeɗi findi mbaahi nakoha. »

3A loffa ɓa ne : « Moo ɗu, wa ye tah ɗu taambiɗɗi nakohiŋ Kooh, ɗu tumohee findi mbaahiŋ ɗu woyoh ? 4Ŋ hot Kooh woyiɗ ne : “ Eɗa yaay ɗu na baab ɗu cir.1 ” A woyissiɗ ne : “ Ɓo' nu kiimiɗ yaay ɓa wala baab ɓa moɗaaɗi ɗah, a apaah apu.2 ” 5Waaye ɗu, ɗu na jangɗohe ne ɓo' miniɗ woo baab ɓa wala yaay ɓa ne : “ Ini ŋ joyee ɗa eɗ, ŋ eɗohiɗa wuu Kooh. ” 6Jaar ɗu hondoh ɗe taambkoh yaay ɓa na baab ɓa, a eɗuu ɓa cir. Ɗu na heefohe woo kiŋ Kooh ɗaa, sagu taambiɗ mbaahiŋ ɗu.

7Naafeehaaci ! Woo kiŋ Kooh wi woosuuɗi Esayi woyee nga ɗu wii, wa keeh an :

8“ Cuuɓii, eɗiŋ ɓa na so cir top ŋ nguɓ ciŋ ɓa ;

keeñ ciŋ ɓa usiɗ to lool.

9Ɓa na ñaamkee so ŋ ɓarang ɓarang ;

ɓa na jangɗohe nakoh ciŋ ɓo' ci

po mand haa ne mi yi Kooh ñam nakoh ca.3 ” »

10Wa Yeesu ƴut ɓa lof, a ɓeeɗukka mboolnda, a woosa ɓa ne : « Sikɗukaat te ɗu inah inii : 11Ini na aase ŋ nguɓiŋ ɓoyi, weɗ na ɓekee ɗe hoolaaɗi haa, waaye a wi na pulohe nga weɗ na ɓekee ɗe hoolaaɗi. »

12Weɗ taalubeeciŋ ɗe reɓoh nga ɗe, woosa ɗe ne : « Andi fu inhiɗ ne woo keem, mand na ɓaseeh ŋ Farisen ci ? » 13A loffa ɓa ne : « Kidig nu Baabiŋ ngo yi nik ŋ Eel ci yipɗi ɗah, wa hey ɗofse. 14Faɗaat ɓa, ɓa fuuliɗ, te ɓa na nooke fuuliɗ ; te fuuliɗ nookee fuuliɗ morom ce ɗah, ɓa kanak jen, ɓa hey keene ŋ nung. »

15Piyeer woosa ɗe ne : « Teeɓa ɓoo ini woo ki señci tokis. » 16Yeesu loffa ɗe ne : « Ɗu sah, ɗu raakɗi liiɓohaaɗ moɗiɗ poyi e ? 17Ɗu inahɗi ne in nu aas ŋ nguɓ ɗah, wa na kaɗe ŋ rook, ƴut ɗah wa bilafsuku e ?

18Waaye ini puloh ŋ nguɓi, wa kurkoh ŋ keeñi te ineem weɗ na ɓeke ɓo' hoolaaɗi. 19Laam in cii na pulohe ŋ ɗooƴ keeñ : Liiɓohaaɗ moɗaaɗi, ap ɓo', njaaloo, faankoh sangohuuɗ, rok, leyɗoh ɓo', na ɗooɓoh. 20E in ceem ceɗ na ɓeke ɓo' hoolaaɗi ; waaye ñam te fu ɓohñukɗi, wa na hoolaaɗi'ɗeeɗi ɓo'. »

Kosaŋ ɓitɓa nikeeɗi Yawuut

21Yeesu pulohha ndaam, a kaɗta ɓak caŋ Tiir na Sidoon. 22Wa raakeen ɓitiɓ nga, a ɓaahee ŋ Kanaan ci, a pulohee kur ceem, a hayya, a leehkeeɗa an : « Ŋ miskaat ɗa Kilifaani, setiŋ Dawuuda ! Kuɓkiŋ ngo cafƴi, a jiini amb ɗe, a yaaɓɗiɗ ɗe lool ! »

23Waaye Yeesu lofɗi ali in ; taalubeeci reɓpa ŋ Yeesu, ɓa woosa ɗe ne : « Woyaa ɗe a coot book, a yii taambiɗ ɓoo na leehkiŋ ɗe rek. » 24Yeesu woosa ne : « Kooh woos so ŋ mbaal ciŋ ɗe muuƴiɗ ci dong, Israayel ci. »

25Waaye ɓitɓa hayya ƴekka ŋ kot ciŋ ɗe, woosa ɗe ne : « Ɓaatɗoh ho rek Kilifaani ! » 26Yeesu loffa ɗe ne : « Wa waas haa ɓuu ci na koɗse teengu kañam kiŋ komaakci. »

27Ɓitɓa woosa ɗe ne : « Kilifaani, fu woo keeh waaye, ɓuu ci na koɗse na name ñam ŋ ñamohiiciŋ heɗ ca, ci na keene ŋ kehƴi. » 28Ŋ ineem Yeesu woosa ɗe ne : « Ɓitɓi, kosi fu kos yakiɗ ! Wa raakohaat ɗaa findi fu waaɗoh. » Ŋ wahtuunaam, kuɓkaŋ ɗe wirra.

Yeesu wirɗiɗ ɓo' laayiɗ

29Wa Yeesu kurkoh ndaam, a kaɗta ɓakaŋ Cookmaŋ-Galile, a rappa ŋ ɗafuk tango, a ɓooffa. 30Weɗ mboolo yakak hayoh nga ɗe, ɓayya ɓi lafañ, na ɓi fuuliɗ, ɓi ɓeendkiɗ, ɓi muum, na kosaayiɗ laayiɗ wiiriis, ɓa ɓayya ɓa ŋ fiki Yeesu, a wiriɗta ɓa. 31Mboolnda feyuusa ŋ ina ɓa hot muum ca jombeeɗa, ɓeendkiɗ ca wirra, lafañ ca tiindeeɗa, fuuliɗ ca hoteeɗa ; ŋ ineem, ɓa yakɗeeɗa Koohiŋ Israayel.

Laayɗaŋ mbuuruuca, wi kanakɗoh

32Ɓa nikka ndeem po Yeesu ɓeeɗukka taalubeeciŋ ɗe, a woosa ɓa ne : « Ɓooɓii miskiɗ to, neeh kaahay ceɗi cii ɓii na so, ɓa raakisɗi ali ñamaah te ŋ waaɗɗi ɓa cootiɗ rook ɓarang bala ɓa keenan ŋ waasi ɗah. »

33Taalubeeciŋ ɗe woosa ɗe ne : « Moo mboolo hend an, ɓoo ɓayohan mbuuruuci min ɓa kap nde ŋ bilaf fii ? » 34Yeesu meekissa ɓa ne : « Ɗu raak mbuuru hend na ? » Ɓa loffa ɗe ne : « Mbuuru yasna-kanak na ɓi cuurund ƴin ƴin, waaye ca laayɗi. »

35A woosa mboolnda ne ɓa ɓoofaat ŋ kehƴa, 36a ɓayya mbuuruuca yasna-kanak ca na cuurund ca, a corkiɗta Kooh po ƴutta, a nguɗsoheeɗa ca, a eɗeeɗa taalubeeciŋ ɗe ca, ɓa eɗeeɗa mboolnda.

37Ɓooɓa jen ñammba po kappa, tasiɗ ca nangɗohuusa, ca nikee dammba riifiɗ yasna-kanak. 38Ɓooɓa ñamee nikee ƴaar junni-nikiis (4000) ɓaatta nga ɓitiɓ ca na komaakca.

39Wa ɓa ƴut ñam, a woosa mboolnda ne ɓa haadaat, a aassa ŋ gaal, a kaɗta ɓakaŋ Magadan.