Heber ci 8

1Inii weɗ uup raak njiriñ ngaŋ ini ɓoo na woye jen : Weɗ ne ɓoo raakiɗ Seeƴkiɗoh yakak mand ɗaa. A yaa ɓooffa ŋ Eel ca, ŋ ñaahmaŋ ɓoofohaanaŋ Kooh yi buur. 2A yaa panguk ŋ Ɗiska Hooliɗa, weɗ ɗiipa keeh-keeha, Kahnaŋ Kooh, wa fu inah ne a Heɗi tufkiɗa, ɓo' haɓiɗɗaa.

3Seeƴkiɗoh yakak nu fu hot ɗah, a tufkiɗu ne a eɗee Kooh onoh ci, na seeƴuk ci. Kon Seeƴkiɗohiŋ ɓoo joyeen nam raak ini a eɗohan. 4A nikee ŋ kehƴi ɗah, a heeɗi sah nike seeƴkiɗoh, laam raakiɗ seeƴkiɗoh ci nik ndii, ɓi na eɗee Kooh onoh ci findi waasiŋ Musaa nakohoha. 5Ɓeɗ ɓeem, ɓa na pangkiɗe Kooh ŋ ɗisik wi fu inah ne wa ñaamaariŋ in ca keeh-keeh ca nik ŋ ɗafka. Wa saangniŋ ca rek. Findi Fiis ci woyoha, wa Musaa hee haɓɗe ɗiipa nikee Kahan Kooh, Kooh woytoh ɗe woytoh an : « Marka, te fu haɓiɗa jen, findi wa fu teeɓsee ŋ ɗafuk tangoori.1 »

6Ɗiski wa nik, Yeesu a yi eɗu ne a nik ŋ harmban ɓooɓi na Kooh ne a tiindiɗ ambtiɗoh as, wi deguk ŋ gapoh as. Findi Ambtiɗohi Asi uupoh wa koc, te findi gapoh ci as ci namoh uup ca koc, pangkiŋ ɗe uupoh fuuf wiŋ seeƴkiɗoh ci koc ɗaa.

Woyaahiŋ Ambtiɗoha Koc

7Ŋ Ambtiɗoha Koc, woyaah raakeeɗi nga ɗah, kon wa heeɗi etohisse ne Ambtiɗohi Kanakɗoh tufkiɗasse. 8Waaye Kooh raak raak woyaah nga, findi wa woyohu ŋ Fiis ci ne :

« A Heɗi woo ne :

“ Inhaat ne : Mbeh cii hayeeɗa,

ŋ hey tufkiɗe ambtiɗoh as na cuuɓiŋ Israayel,

na wiŋ Yudaa2.

9Wa mandanɗi na ambtiɗohi ŋ tufkiɗee na caac caŋ ɓa,

wa ŋ amb ɓa ŋ yaah

ne ŋ puliɗ ɓa Misra.

Laam ɓa ambɗi Ambtiɗohi,

weɗ tah ŋ liiɓisɗi nga ɓa.

Mi yi Heɗi, ñam woo wa.

10Ambtiɗohii weɗ maa hee tufkiɗe na cuuɓiŋ Israayel

ŋ finho mbeh ceem :

- Mi yi Heɗi, ñam woo wa -

Ŋ hey ɓeke nakoh ciŋ ngo ŋ liiɓ ciŋ ɓa,

ŋ fiis ca ŋ ɗooƴ keeñ ciŋ ɓa ;

ŋ nik Koohiŋ ɓa, ɓa nik ɓooɓiŋ ngo.

11Ali ɓo' jangɗissanɗi gentohiŋ ɗe wala ɓaah ce,

a woyee ɗe ne : ‘Inha Heɗi.’

Ɓooɓi jen hey yo inhe,

ini amboh ŋ yi uup ƴissuut po ŋ yi uup yak.

12Laam ŋ hey ɓa ɗaase kiyurhaaɗiikiŋ ɓa,

ŋ naandsukissanɗi bakaaɗ ciŋ ɓa. ”3 »

13Kon Kooh woyee woo ambtiɗoh as ɗah, raakee ɗe kiisiɗ kiisiɗ wa koc. In nu maañ po wa yakakee ɗah, wa usisɗi ŋ coot.