Heber ci 3

Yeesu a yi uup yak Musaa

1Weɗ tah ɓaah ciŋ ngo, ɗu hoolɗuuɗ wuu Kooh te ɓoo ɓaah ŋ ɓeeɗkohiŋ Eel ci. Kon, markaat ŋ Yeesu, yi nik Woosuuɗi, a nikka Seeƴkiɗohi yakki ŋ waasi ɓoo na woye ne weɗ ɓoo kos. 2A tokɗukeen baahiɗ ŋ pangki Kooh degee ŋ yaah ciŋ ɗe, findi Musaa namee « tokɗukoh ŋ ɗooƴ kahan Kooh [jen]1 », findi Fiis ci woyoha. 3Yi taɓah kahni a yi uup kahni. Weɗ tah, Yeesu eɗaah cir na kiyak ki uup wiŋ Musaa. 4Kahan nu taɓahu ɗah, a ɓo' taɓaha waaye a Kooh taɓah in ci jen.

5Mbaa, Musaa « tokɗukeen ŋ ɗooƴ kahan Kooh jen.2 » Ŋ woo kiŋ Fiis ci weem, a tokɗukee findi yi na pangkiɗe Yi raak kahni, ne a seede ini Kooh hee woye. 6Kiristaa nak, a tokɗukiɗ findi kuɓu ne a adgoh kahan Kooh, te e ɓoo kahneem nik ne ɓoo gen ooluk, wa hun na kaañ, te ɓoo ndamkohe yaakaari ɓoo yaakaar ɗah.

Iɗsiɗki Kooh gapoh

7Weɗi tah, findi Fuuɗsi Hoolohngaani woyoha, ngaŋ Fiis ci Hooliɗ ci, an :

« Woti,

ɗu kerah hoosooriŋ Kooh ɗah,

8kinaat ndeng haf

findi caacuucaŋ ɗu tumohee wa

ŋ kehƴa hulanga,

mbaɗna ɓa markiskee ɗe,

ɓa ndengsiɗkoheeɗa na ɗe.

9An mbaɗi,

caacuuciŋ ɗu markiskee so,

te raak ɓa hotee ngaŋ tumohaaɗ ciŋ ngo

10ini ree kiis ndaŋkiyaah-nikiis (40).

Weɗ tah ŋ raakka neɓsaaɗi

ŋ ɓooɓaŋ jamanoonaam ;

ŋ woosa ne :

“ Liiɓohaaɗ ciŋ ɓa

na genee ɓa muuƴiɗ

te ɓa sangiɗ ne

ɓa inhanɗi ini maa seke ne ɓa tuma. ”

11Sagu ayruki ŋ ayruke,

ŋ ginnja ne :

“ Ɓa rahsanɗi muk iɗsiɗki ŋ gap ɓa.3 ” »

12Kon ɓaah ciŋ ngo wortukaat po ali ɓo' nga ɗu raakuu keeñ baahaaɗi, wi na koseeɗi po wa kee ɗe ɓeka ŋ eɗ finho Koohi na pese.

13Waaye feeh "woti", wi Fiis ci na woye, wa ɗii nga ɗah, genaat ñaahtiɗoh Kooh-nu-wiis, ne bakaaɗ ñaañohuu ali ɓo' nga ɗu po wa kee ɗe ɓeka keeñ ndengiɗ. 14Laam, ɓoo ɓaahiɗ na Mucɗohi Gapohse pangki, nik ne ɓoo risiɗ amb ndengiɗ po ŋ reehtinohaana, oolki ɓoo oolkee ngaŋ camba ɗah. 15Fiis ci woyiɗ ne :

« Woti

ɗu kerah hoosooriŋ Kooh ɗah,

kinaat ndeng haf

findi caacuucaŋ ɗu tumohee wa

mbaɗna ɓa ndengsiɗkohee na ɗe.4 »

16Mbaa e ɓinde kerhee hoosooriŋ Kooh, ɓa ndengsiɗkoheeɗa na ɗe ? Wa hooliɗ ne e ɓooɓa Musaa pulɗohee Misra jen. 17Kooh namee raak neɓsaaɗi ŋ ɓinde ini ree kiis ndaŋkiyaah-nikiis (40) ? Wa hooliɗ ne e ɓooɓa bakaaɗee te fiɗaaf caŋ ɓa keennda ŋ kehƴa hulanga. 18Te Kooh giñee ne e ɓinde heyɗi rahse iɗsiɗka a gapee ɓa ? Wa hooliɗ ne e ɓooɓa kerhiɗeeɗi ɗe. 19Mbaa ɓoo hotiɗ ne ɓa mineeɗi aas sagu kosaaɗi.