Saafi-Saafi
Heber ci 1
Kooh woyiɗ taamboh ŋ Kuɓkiŋ ɗe
Ŋ maañiɗ, Kooh taambohee ŋ woosuuɗ ci, a woosa na caac ciŋ ɓoo waas laayiɗ te woyohaaɗ ci ɗalohha. Waaye ŋ jamanoociŋ reehɗohaaniŋ adinaani ɓoo nikoh cii, a woyiɗ na ɓoo taamboh ŋ Kuɓkiŋ ɗe. Ŋ camba, adinaani na findi wa na tiindohe jen, a feroha Kuɓkeem. Te a yi a eɗan in ci jen. A yi siñaariŋ yaki Kooh yak, a yi sah ñaamaariŋ ini Kooh nik keeh-keeh. Te a yi raanuk adinaani jen na woo kiŋ ɗe raakiɗ hatili. Wi a tum po ɓooɓi minnda hoolɗu ŋ bakaaɗ ciŋ ɓa, weɗ a kaɗoh ŋ Eel ci, a ɓooffa ŋ ñaahmiŋ Kooh yi buur. A uuppa malaakaaci findi tiiki Kooh eɗ ɗe uupoh ciŋ ɓa.
Kuɓki a yi uup malaakaaci
Laam, ɗu inhiɗ ne, woo ki Kooh woo ŋ ɗooƴ Fiis ci Hooliɗ ci wii :
« Woti, ñam Baabiŋ ɗa,
a fu Kuɓkiŋ ngo.1 »
a moosɗaa woo ali malaaka. Te a namɗi woyoh ŋ ini kaɗ ŋ ali malaaka ne :
« Ŋ hey nike Baab nga ɗe,
a nik nga so findi Kuɓu.2 »
Te wi a na haytohe Kuɓkiŋ ɗe saawi ŋ Adina, Fiis ci woo ne :
« Malaakaaciŋ Kooh jen ƴekɗaat ɗe ! »3
Inii weɗ Fiis ciŋ Kooh woo ŋ ini kaɗ ŋ malaakaaci :
« A tum malaakaaci findi puuɗis ;
ɓeɗ pangkoh ciŋ ɗe,
a tummba ɓa findi jaal yongkaah.4 »
Waaye ini Kooh woo Kuɓkiŋ ɗe ŋ Fiis ci weɗi wii :
« Eey Kooh, Nguuriŋ ɗa genan gen,
te salmaariŋ wa, weɗ wiŋ waasi yurhiɗi.
Fu teeɓohiɗ ne fu waaɗ in yurhiɗ,
fu sang ini nikɗi waas, weɗ tah, eey Kooh,
Koohiŋ ɗa tannda ɗa ŋ ɗooƴ huntoh ciŋ ɗa,
a diwiɗta ɗa hafiŋ ɗa diw eeñiɗ,
wa hunnda na sum.5 »
Kooh namiɗ woo ŋ Fiis ci ne :
« Ngaŋ camba, eey Heɗi, a fu yip kehƴi
te a fu haɓiɗ Eel ci na yaah ciŋ ɗa.
In ceem jen hey sooƴe waaye fu, fu genan gen.
Eel ci na kehƴi jen hey kaane findi kulɓa,
fu lem ca findi palto.
Wiiriis as degu findi ɓoyi ɓekkis,
waaye fu, fu risan mand findi fu mand ;
kipes kiŋ ɗa reehanɗi.6 »
Markaat rek ! Ini Kooh woo ŋ Fiis ci wii :
« Haya fu ɓoof ŋ ñaahmiŋ ngo,
po mbaɗna ŋ folan sangiɗ ciŋ ɗa ŋ kehƴi,
fu tum ɓa degoha kot.7 »
A moos woyoh yinde malaaka in mand na weem ?
Malaakaaci, ca jen ca pangkoh ci minɗi hotu haa e ? Ca woosu ne ca ɓaatɗoh ɓi rahsan muci haa e ?
Source notes (7)
- Cross-reference Sabuur 2:7
- Cross-reference 2 Samuwel 7:14
- Footnote Marka teerndiŋ Rohƴiɗi 32:43 (waaye, fu marak fiis ci ɗeɓgaan ɗah, raakiɗ ɓi fiis ci raakɗi woo keem).
- Cross-reference Sabuur 104:4
- Cross-reference Sabuur 45:7-8
- Cross-reference Sabuur 102:26-28
- Cross-reference Sabuur 110:1
Saafi-Saafi. Copyright © 2019 Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.