1 Korenta 11

1Altiɗkohaat to ŋ tumohaaɗ ciŋ ngo, findi mi na altiɗkohe Kiristaani.

Mbahne na meet

2Mi yii corkiɗ ɗu ŋ naandsuki ɗu na naandsukee so ŋ in ci jen na risi ɗu ris amb poyi, in ci ŋ rahas te ŋ jangiɗta ɗu ca. 3Waaye ŋ waaɗiɗ ne ɗu inah inii : Kiristaani a yi yilif ƴaar nu nik, ƴaar a yi yilif ɓitiice, Kooh a yi yilif Kiristaani.

4Ƴaar nu kiimee Kooh wala Kooh woyee taamboh nga ɗe te a ɓekuk mbahne ɗah, a na kaci'ɗe yi yilif ɗe. 5Waaye ɓitiɓ kiimee Kooh wala Kooh woyee taamboh nga ɗe te a meetɗi hafiŋ ɗe ɗah, a na kaci'ɗe yi yilif ɗe ; a na mande na ɓitɓi nenuk. 6Ɓitiɓ meetɗi hafiŋ ɗe ɗah, a nenkaat ! Waaye nik ne hufuk wala nenuk kaci ŋ ɓitiɓ ɗah, a meetkaat !

7Ƴaar a yi ñaamaariŋ Kooh,1 a yi nikiɗ yaki Kooh yak, weɗ tah a joyɗi ɓekuk mbahne. Ɓitiɓ nak, a yi nikiɗ yaki ƴaar yak. 8Ƴaar kooɗohuuɗi ŋ ɓitiɓ, waaye a ɓitiɓ kooɗohu ŋ ƴaar2 ; 9te ƴaar feruuɗi sagu ɓitiɓ, a ɓitiɓ feru sagu ƴaar.3 10Ineem weɗ tah po ɓitiɓ joyiɗ yilif hafiŋ ɗe, sagu malaakaaci.

11Waaye ŋ kipes kiŋ ɓoo na Heɗi, ɓitiɓ minɗi kaɗ faɗ ƴaar finho, ƴaar namɗi min kaɗ faɗ ɓitiɓ finho. 12Findi ɓitiɓ ferohu ŋ ƴaar, ƴaar na rimkohe ɗaa ŋ ɓitiɓ ; in ci jen puloh ŋ Kooh.

13Markaat ŋ haf ɗu ; andi wa moɗiɗ ne ɓitiɓ kiimee Kooh haf ɓarang ? 14Ɗu marak findi in ci na kaɗohe ɗah, ɗu hey hote ne raak find hutiɗ, wa kaci ŋ ƴaar. 15Ini kaɗ ŋ ɓitiɓ, wa ndamiŋ ɗe ; a eɗu find hutiɗ ne ca ul hafiŋ ɗe.

16Waaye ɓo' waakee ini neɓ ɗe ngaŋ taastiɗoh ɗah, a inhaat ne ini ŋ woo, weɗ ɓoo na tume, te weɗ Janguuniŋ Kooh na name tum.

Kañam kiŋ Heɗi

17Ini kaɗ ŋ ini maa hee ɗu woye wii, ŋ corkiɗanɗi ɗu nga. Weɗ ne coh ci ɗu na cohe, ca kaɗiɗɗi ɗu fiki, ca na doknee ɗu finho. 18Ini koc weɗ ne ŋ kerhiɗ ne ŋ coh ciŋ ɗu, muuƴoh na raake raak ŋ harmban ɗu, te ŋ samiɗa kos. 19Te muuƴoh minɗi ñak ŋ harmban ɗu ne ɓi ndeng keeh-keeh min inhisu.

20Kañam ki ɗu na ñame ŋ coh ciŋ ɗu, wa wiŋ Heɗi haa. 21Ɗu ɓooffa ne ɗu ñam ɗah, yaa nu nga artukee, ñamee kañam ki a haytoh, hay ɗah ɓum aɗuk, ɓinooɓi laar. 22Ɗu raakɗi raakɗi kahan ne ɗu ñamohee nga, ɗu anohee nga e ? Wa ye tah ɗu heeffa Janguuniŋ Kooh, ɗu kaci'ɗee ɓi raakɗi ? Ŋ joy ɗu ye woo ? Ŋ corkiɗan ɗu corkiɗ e ? Muk, ŋ corkiɗanɗi ɗu ŋ ineem !

23Laam, ini ŋ jangɗu puloh ŋ Heɗi, te ŋ eɗta ɗu wa, weɗi wii : Yeesu Heɗi, ngaŋ weka a eɗndohohu, a ɓay mbuuru, 24a corkiɗta Kooh, a poɓtohhaa, a woosa ne : « Wii wa faaniŋ ngo, wi eɗohu wuu ɗu ; hey ɗah tumaat inii, ɗu naandsukohee so wa. » 25Wa ɓa ƴut ñam, a tumissa ɗaa na kaas, a ɓaya ɓay, a woosa ne : « Kaasii, weɗ ñif miŋ ngo, te weɗ Kooh na hee tufkiɗohe Ambtiɗohiŋ ɗe Asi na ɗu ; tee ɗah, tumaat inii, ɗu naandsukohee so wa waas nu ɗu anohee wa ɗah. »4 26Waas nu ɗu ñamee mbuurndi, ɗu anee ŋ kaasi ɗah, ɗu na yegɗohe kakaan kiŋ Heɗi, po mbaɗna a hayissan.

27Weɗ tah po yaa nu ñam mbuurndi, wala a an ŋ kaasiŋ Heɗi te a eɗɗi ɗe cir ɗah, a tooñ faani na ñif miŋ Heɗi. 28Yaa nu nga liiɓsiɗohaat ŋ haf ce baahiɗ, a han ñam mbuurndi, a an ŋ kaasi. 29Yi ñaman wala a an te a liiɓɗi ŋ faaniŋ Heɗi ɗah, a na nooke atteeniŋ Kooh ŋ haf ce. 30Ineem weɗ tah, kosaayiɗ ci na raakaaɗi hatil ci laayya ŋ ɗooƴ ɗu, te laayiɗ kaaniɗ. 31Nikeen ne ɓoo liiɓsiɗohiɗ ŋ ɗooƴ ɓoo keeh-keeh ɗah, ɓoo heeɗi atte'se. 32Waaye Heɗi atte'ee ɓoo ɗah, a na kuƴse ɓoo ne ɓoo ɓaahuu ŋ atteeniŋ ɓi Adina.

33Ŋ ineem, ɓaah ciŋ ngo, ɗu coh ne ɗu ñam ɗah, sektiɗohaat. 34Ɓo' aɗuk ɗah, a ñamaat ŋ kahan ce paaɗ ; ŋ ineem coh ciŋ ɗu tahuu po ɗu nooke atteeniŋ Kooh nga ɗu. Ini kaɗ ŋ in ci cinooci, ŋ hay ɗah, ŋ deg ca ŋ waas.