Indirimbo 8

1Icompa ukaba nka musazanje,

uwonse ibere rya mama!

Gutyo, ndagusanze hanze,

nogusomaguye,

kandi nta n’umwe yoneguye.

2Nokugiye imbere

nkakujana mu nzu ya mama,

we yanyigishije.

Noguhaye umuvinyu urimwo ibimota neza ukawunywa,

umutobe w’amapome yanje.

3Ukuboko kwiwe kw’i bubamfu kuranseguye,

ukuboko kwiwe kw’i buryo kurambumbatiye.

4Bakobwa b’i Yerusalemu, ndabihanikirije:

Ntimukome urukundo canke ngo murukangure,

gushika rwishakiye kuvyuka.

Abagenzi

5Urya ni nde aje ava mu bugaragwa

yegamiye umukunzi wiwe?

Umugeni

Nagukanguye uri musi y’igiti c’amapome;

aho ni ho nyoko wawe yagusamiye inda,

aho ni ho uwari ku gise yakwibarukiye.

6Nshira ku mutima wawe nk’ikidodo,

nk’ikidodo ku kuboko kwawe;

kuko urukundo rukomeye nk’urupfu,

ishari ryarwo rigakomera nk’i kuzimu.

Ruturira nk’umuriro waka,

nk’urubeya rukomeye.

7Amazi menshi ntashobora kuzimya urukundo;

inzuzi ntizishobora kuruzimanganya.

Niyo umuntu yotanga

ivyo atunze vyose mu nzu yiwe ngo agure urukundo,

yogawa rwose.

Abagenzi

8Dufise murumuna wacu,

kandi amabere yiwe ntarasonga.

Mbega tuzokorera iki murumuna wacu

ku musi azogira ubukwe?

9Niyaba ari uruzitiro,

tuzokwubaka iminara y’ifeza kuri we.

Niyaba ari urugi,

tuzomwugaza ibihindizo vy’amasederi.

Umugeni

10Ndi uruzitiro,

kandi amabere yanje ni nk’iminara.

Ni co gituma mu maso yiwe nabaye

nk’uwuzana akaneza.

11Salomo yari afise uruzabibu i Bayali-Hamoni,

maze asigarana urwo ruzabibu abakozi biwe.

Umwe wese yasabwa kuriha shekeli igihumbi1 z’ifeza

zihuye n’ivyamwa yamuye.

12Yamara uruzabibu rwanje ni urwanje ubwanje;

izo shekeli igihumbi nuzigumirize, yewe Salomo.

Ariko amajana abiri2 ni az’abitayeho inzabibu zarwo.

Umukwe

13Wewe uba mu mirima

uri kumwe n’abagenzi bagukorera,

nyumvisha ijwi ryawe!

Umugeni

14Hunga, mukunzi wanje,

umere nk’ingeregere

canke nk’inyana y’impongokazi

ku misozi yuzuye ibimota neza.