Zaburi 67

Yahawe umukuru w’abaririmvyi. Icurarangishwa ibicurarangisho vy’imirya. Ni Zaburi, kandi ni indirimbo.

1Ese Imana, yotugirira ubuntu ikaduhezagira,

mu nyonga hayo tukaboneka dufise igikundiro;

2kugira ngo inzira zawe zimenyekane kw’isi,

n’agakiza kawe kamenyekane mu mahanga yose.

3Amoko naguhimbaze, ewe Mana;

amoko yose naguhimbaze.

4Ese amahanga yose yonezerwa akavuza impundu z’umunezero,

kuko urongora abantu bose mu bugororotsi

ukarongora amahanga yose yo kw’isi.

5Amoko naguhimbaze, ewe Mana;

amoko yose naguhimbaze.

6Isi yimbuka ivyimburwa vyayo;

ewe Mana, Mana yacu, duhe umugisha.

7Ese Imana yoduha umugisha,

kugira ngo abo ku mpera z’isi bose baze bayubahe.