Zaburi 45

Yahawe umukuru w’abaririmvyi. Mw’ijwi ryitwa “Ikirungu.” Ni iya bene Kora. Ni masikili. Ni indirimbo y’ubukwe.

1Umutima wanje usimbagijwe n’amajambo meza

ndiko ndaririmbira umwami amajambo meza;

ururimi rwanje ni ikaramu y’umwanditsi w’umuhinga.

2Uri rurangiranwa mu bantu

kandi iminwa yawe yasizwe amavuta y’ubuntu,

kuko Imana yaguhaye umugisha ibihe bidashira.

3Hagatira inkota yawe kw’itako, ewe muhizi w’inkomezi;

ushazishe ubwiza n’igitinyiro.

4Mu cubahiro cawe gendera ku mukogote uje kunesha

ugwanire ukuri, uguca bugufi n’uguca imanza zibereye;

ukuboko kwawe kw’i buryo nigukore ibikomeye.

5Imyampi yawe ikarishe nitobekeranye imitima y’abansi b’umwami;

amahanga nahindikirane imbere y’ibirenge vyawe.

6Ukuganza kwawe, ewe Mana, kuzokwamaho;

ubugororotsi ni ryo cumu ry’inganji y’ubwami bwawe.

7Wakunze ubugororotsi, wanka ikibi;

ni co gituma Imana, ari yo Mana yawe, yagutoranije,

ikakurobanuza amavuta y’umunezero, ikakurutisha bagenzawe.

8Impuzu zawe zose zamoteshejwe neza n’imibavu, alowe n’akasiya;

ibicurarangisho vy’imirya birakunezereza,

vyumvikana bivuye mu mazu asharijwe n’amahembe y’inzovu.

9Abakobwa b’abami bari mu bagore b’icubahiro;

umugeni w’umwami ari i buryo bwawe yambaye inzahabu iva muri Ofiru.

10Umviriza, mukobwa wanje, kandi ubishireko umutima:

Wibagire ubwoko bwawe n’umuryango wawe.

11Umwami yipfuze ubwiza bwawe;

umwubahe, kuko ari umwami wawe.

12Igisagara c’i Tiro kizozana ingabire,

abantu bafise ubutunzi bazorondera ko ubaraba ryiza.

13Umukobwa w’umwami yambaye ubwiza ari mu cumba ciwe;

ikanzu yiwe idombagijeko inyuzi z’inzahabu.

14Ajanywe ku mwami yambaye impuzu zitewe amabara menshi;

inkumi zimuherekeje ziramukurikiye;

ni abazanywe ngo babane na we.

15Binjijwe mu munezero n’akaneza,

binjiye mu ngoro y’umwami.

16Abahungu bawe bazosubira mu kibanza ca ba sogokuruza banyu;

uzobagira abaganwa mu gihugu cose.

17Nanje nzokwibutsa abantu izina ryawe

uko urunganwe ruzogenda rukuranwa n’urundi;

ni co gituma amahanga azoguhimbaza ibihe bidashira.