Hoseya 14

Ukwihana kuzana umugisha

1Nimugaruke k’Uhoraho Imana yanyu, yemwe Bisirayeli.

Kuko ivyaha vyanyu ari vyo vyatumye mugwa!

2Nimujane amajambo yanyu yo kwihana

mugende k’Uhoraho.

Mumubwire muti:

“Duharire ivyaha vyacu vyose

maze utwakirane ubuntu,

kugira ngo tugushikanire ivyimburwa vy’ishimwe bivuye mu kanwa kacu.

3Ashuri ntibashobora kudukiza;

canke kwurira amafarasi yacu y’intambara.

Ntituzosubira kuvuga tuti: ‘Muri imana zacu,’

tubwira ivyo amaboko yacu yakoze,

kuko muri wewe honyene ni ho impfuvyi zironka kugirirwa impuhwe.”

4“Nzoharira ugusubira inyuma kwanyu

kandi nzobakundisha umutima wanje wose,

kuko uburake bwanje bubavuyeko.

5Nzoba nk’ikime ku Bisirayeli;

bazoshurika nk’ishurwe ryiza.

Bazoshora imizi igere kure mw’ivu

nk’igiti c’isederi c’i Libani

6kandi imivyaro yabo izokura.

Ubwiza bwabo buzoba nk’ubw’igiti c’umwelayo,

ugutamirana kwabo kuzoba nk’ukw’isederi ry’i Libani.

7Abantu bazosubira kuba musi y’igitutu ciwe;

bazokura nk’ingano,

bashurike nk’imizabibu,

kumenyekana kw’Abisirayeli kuzoba nk’ukw’umuvinyu w’i Libani.

8Efurayimu we, uracasangiye iki n’ibigirwamana?

Nzomwishura kandi nzomwitaho.

Nzoba nk’igiti c’isederi cama gitoshe;

ivyamwa vyawe biva kuri jewe.”

9Ni nde w’umunyabwenge? Natahure ibi bintu.

Ni nde afise ubumenyi? Nabimenye.

Inzira z’Uhoraho ziragororotse;

kandi umugororotsi azozigenderamwo,

ariko abagarariji bazozitsitaramwo bagwe.