Англунимос 20

О Авраамо тай э Сарра кай о Авимелехо

1О Авраамо пэрэжыля катар андэ пхув Негево и жувэлас машкара Кадэшо тай Шуро. Тунче вов жувэлас андо Гераро. 2Котэ Авраамо пхэндя пала пэстери ромни Сарра: «Вой сыни мэрни пхэй». Тунче о Авимелехо, о тхагар лэ Герароско, бишалдя пала Сарра и ля ла каринг пэстэ. 3Ай о Дэл авиля каринг о Авимелехо рятэ андо суно и пхэндя лэсти:

— Тут мэрэса палай жувли, савя ту лян каринг пэстэ: вой сыни пала ромэстэ.

4Но о Авимелехо на ляпэ латэ, и пала када вов пхэндя:

— Хулай, ту жэ на умарэса найдошалэ манушэн? 5Ке вов пхэндя манди: «Вой — мэрни пхэй», и вой пхэндя: «Вов — мэрно пхрал». Андэ кадыя дила мэрнэ гындуря вужэ тай мэрнэ васта найдошалэ.

6О Дэл пхэндя лэсти андо суно:

— Чячес, Мэ ганав, со терэ гындуря вужэ: када Мэ уритярдэм тут лэ бэзэхостар англа Мандэ, и пала када на мэклэм тут тэ лэспэ латэ. 7Акана рисар лэ ромня лэ ромэсти, пала кода со вов сыно пророко. Вов мангэлапэ пала тутэ, и ту ашэсапэ жундо. Ай сар кай ту на рисарэса ла, ган, со тути тай терэ пашутнэ на унашэнатар лэ мэримастар.

8Пэ авэр дес кати кай э тэсара о Авимелехо стидя саворэн пэстерэ пашутнэ раен и роспхэндя лэнди, со тердяпэ, и вонэ фартэ пэрэдарайлэ. 9Тунче о Авимелехо акхардя лэ Авраамос и пхэндя:

— Со ту тердян амэнца? Саво бэзэх мэ тути тердэм, кай ту андян кацави пхари дош пэр мандэ тай пэ мэрно тхагаримос? Ту тердян манца кадя, сар нащи тэ терэс.

10И о Авимелехо пушля лэ Авраамостар:

— Со сас тут андэ годи, кала ту стердян кацаво?

11Авраамо пхэндя:

— Мэ погындосардэм: «Андэ кадыва тхан нинай дар лэ Дэвлэстар, и вонэ умарэна ман важ мэрни ромни». 12Ай инке вой чячес сыни мэрни пхэй, щей мэрнэ дадэсти, тай най мэрня датар, и вой ашыля мэрни ромни. 13Кала о Дэл бишалдя ман анда чер мэрнэ дадэско тэ пхирав пай пхуя, мэ пхэндэм лати: «Акэ стер манди кацаво тынгимос: каринг бы амэ тэ на авас, пхэн, со мэ теро пхрал».

14Тунче о Авимелехо дя лэ Авраамости бакрэн тай гурувэн, копэлен тай копэлницэн, и рисардя лэсти лэстеря ромня, ла Сарра. 15О Авимелехо пхэндя:

— Акэ мэрни пхув англа тутэ. Жув, кай камэс.

16Ай ла Саррати вов пхэндя:

— Мэ дав терэ пхралэсти пангли шэкеля руп, соп тэ ушаравав теро лажаво англа саворэ манушэндерэ якха терэ черэско. Акана ту англа саворэ вужы.

17О Авраамо помангля лэ Дэвлэс, и о Дэл састярдя лэ Авимелехос и лэстеря ромня, тай лэ копэльницэн, кай лэндэ упалэ тэ авэн бэяцэ. 18Ай жы колэстэ о РАЙ на дэлас бэятонэн ни екхати жувляти андэ лэ Авимелехоско чер, палай Сарра, лэ Авраамостери ромни.