Англунимос 1

О Дэл терэл э люма

1Данглал о Дэл стердя о нэбо тай э пхув. 2Э пхув сас бимуестери и шушы, о калимос сас понадэ баря паенца, и о Духо лэ Дэвлэско вурялас понадэ паи.

3И пхэндя о Дэл:

— Мэк авэл о вудуд, — и авиля о вудуд.

4О Дэл додикхля, со о вудуд драго, и розашадя лэс лэ калимастар. 5О Дэл дя алав лэ вудудэсти «о дес», ай лэ калимасти «э рят». Сас вэчеро, и сас тэсара — дес англуно.

6И пхэндя о Дэл:

— Мэк авэл сводо машкара пая, кай тэ розашавэл о паи лэ паестар.

7О Дэл стердя о сводо тай розашавдя о паи понадэ сводо лэ паестар тала лэстэ, и ашыля кадя. 8О Дэл дя алав лэ сводости «нэбо». Сас вэчеро, и сас тэсара — дес дуйто.

9И пхэндя о Дэл:

— Мэк истидэнпэ екхтанэ э пая понадэ нэбо, тай тэ авэл о шукимос, — и ашыля кадя.

10О Дэл дя алав лэ шукимасти «пхув», ай э паенди, савэ стидэпэ, дя алав «море». И додикхля о Дэл, со када драго.

11— Тэ барярэл пэ пхув баряримос: чяря, савэ анэн сымбуря, тай савори порода каштэндери, савэ анэн э плодуря кокалэнца, — пхэндя о Дэл, тай ашыля кадя.

12Э пхув барярдя баряримос: савори порода чяряти, савэ анэн сымбуря, тай савори порода каштэндери, савэ анэн э плодуря кокалэнца. И додикхля о Дэл, со када драго. 13Сас вэчеро, и сас тэсара — дес трито.

14И пхэндя о Дэл:

— Мэк авэн вудуда по машкар нэбо, соп тэ розашавэл о дес ла рятятар, и мэк вонэ авэна э знакуря, соп тэ гатярэн э время, э деса тай э бэрша. 15Мэк вонэ пхабон по машкар лэ нэбоско, соп тэ дичёл э пхув.

16О Дэл стердя дуй барэ вудуда — баро вудуд, соп тэ хулаинас десэ, тай майцыкно вудуд, соп тэ хулаинас рятэ, ай кадя жэ Вов стердя э чергая. 17О Дэл стходя лэн по сводо лэ нэбоско, кай вонэ тэ дичёл э пхув, 18соп тэ хулаинэн десэ и рятэ тай тэ розашавэн о вудуд лэ калимастар. И додикхля о Дэл, со када драго. 19Сас вэчеро, и сас тэсара — дес штарто.

20О Дэл пхэндя:

— Мэк жувэл андо паи жундимос, ай понадэ пхув па нэбоско сводо тэ вурян э черэкля.

21О Дэл стердя барэ паенго жундимарэн тай савори порода ла жундимастери, сави пхэрдо жувэл андо паи, тай саворэ породуря пхакалэн черэклян. И додикхля о Дэл, со када драго. 22О Дэл бахталисардя лэн и пхэндя:

— Анэн бэятонэн, кай тэ авэл тумэн майбут, кай тэ пхэрдён э барэ пая. Тай пэ пхув мэк авэна майбут э черэклян.

23Сас вэчеро, сас тэсара — дес панчто.

24И пхэндя о Дэл:

— Тэ виндярэл э пхув пэстар савори порода ла жундимастери: лэ череско скотос, цыкно пхуяко жундимос, тай саворэ породуря лэ вэшэско жундимаско, — и ашыля кадя.

25О Дэл стердя саворэ породуря лэ вэшэско жундимаско и саворэ породуря лэ череско скотоско, тай саворэ породуря цыкно пхуяко жундимаско. И додикхля о Дэл, со када драго.

26Тунче о Дэл пхэндя:

— Стерам лэ манушэс — па Амаро образо, сар Амэ — мэк авэл вов хулай пэ барэ паести маще и лэ нэбости черэкля, по черэско ското, пэ ся пхув тай пэ ся цыкно пхуяко жундимос.

27Кадя о Дэл стердя лэ манушэс па Пэско образо, па образо лэ Дэвлэско Вов стердя лэс, лэ муршэс и ла жувля Вов стердя лэн. 28О Дэл бахталисардя лэн и пхэндя:

— Анэн бэятонэн, кай тэ авэл тумэн майбут, кай тэ пхэрдён ся пхув и авэн раенца пэр латэ. Авэн хулаенца пэ барэ паести маще, и пэ нэбости черэкля, тай пэ ся жундимос, саво пхирэл пай пхув.

29Тунче о Дэл пхэндя:

— Мэ дав тумэнди саворэ чяря лэ сымбуренца па ся пхув и саворэ кашта, савэ дэн плодуря кокалэнца. Вонэ авэна важ тумэнди хамаса. 30Ай саворо жундимос пай ся пхув, и саворэ лэ нэбостерэ черэклянди, тай саворэ цыкно пхуяко жундимос — саворэнди, андэ кастэ пхурдэл о жувимос, — Мэ дав савори чяр тэ хан.

И ашыля кадя. 31О Дэл подикхля пэ ся, со Вов стердя, и ся сас фартэ драго.

Сас вэчеро, и сас тэсара — дес шовто.