Англунимо 30

1Рахиль дыкхэлас, со вой на бэянэл Иаковости чяворэн, тай рицарэлас холи пэ пэхкири пхэнь Лия. Вой пхэнда Иаковости:

— Дэ манди чяворэн, чи мэ мэрава!

2Иаково холяґа пхэнда лати:

— Мэ со, Дэвэл, Саво на дэл тути чяворэн?

3Вой пхэнда:

— Акэ Валла, мури копыльница. Пэр лаґа, соб вой тэ бэянэл пала ман чяворэ, тай кади мандэ авэна чяворэ латар.

4Кади вой дэня лэсти дэ ромнен пэхкиря копыльница Валла. Иаково сута лаґа, 5вой ачиля пхари тай бэянда лэсти чявэ. 6Тунчи Рахиль пхэнда: «Дэвэл фирисарда мури патив. Вов ушунда муро мангимо тай дэня манди чявэ». Пала када вой акхарда лэ Дано1.

7Валла, копыльница Рахилятири, упалэ ачиля пхари тай бэянда Иаковости дуйтонэ чявэ. 8Тунчи Рахиль пхэнда: «Баря маримаґа мэ мараваспэ муряґа пхэняґа тай выцэлдом». И вой акхарда лэ Неффалимо2.

9Кала Лия удыкхля, со вой пэрэачиля тэ бэянэ чяворэн, вой лиля Зелфа, пэхкиря копыльница, и дэня ла Иаковости дэ ромнен. 10Лиятири копыльница Зелфа бэянда Иаковости чявэ. 11Лия пхэнда: «Сави бахт!» И вой акхарда лэ Гадо3.

12Лиятири копыльница Зелфа бэянда Иаковости дуйтонэ чявэ. 13Тунчи Лия пхэнда: «Сави мэ бахтали! Джювля авэна тэ пхэнэ пэ мандэ «бахтали». И вой акхарда лэ Асиро4.

14Дэ кодэя вряма, сар мануша стидэн див, Рувимо джиля дэ маля, аракхля мандрагоруря тай анда лэн дати. Рахиль пхэнда Лияти:

— Мангав тут, дэ манди набут тирэ чявэхкирэн мандрагорурен.

15Нэ кодэя пхэнда лати:

— Ту и кади залилян мандар ромэ. Камэх кана тэ залэ мурэ чявэхкирэ мандрагоруря?

— Мишто, — пхэнда Рахиль. — Мэк вов пэрэла туґа авдивэ ратяґа, ай ту отдэ манди тирэ чявэхкирэ мандрагоруря.

16Кала бельвеляґа Иаково авиля малендар, Лия выджиля англа лэ и пхэнда:

— Ту пэрэґа манца. Мэ потиндом пала тут чявэхкирэ мандрагонэнца.

Тай вов сута лаґа дэ кодэя рат. 17Дэвэл ушунда Лия, вой ачиля пхари тай бэянда Иаковости панчёнэ чявэ. 18Тунчи Лия пхэнда: «Дэвэл дэня манди награда пала кода, со мэ дэнём мурэ ромэсти копыльница». Тай вой акхарда лэ Иссахаро5.

19Лия упалэ ачиля пхари тай бэянда Иаковости шовтонэ чявэ. 20Тунчи вой пхэнда: «Дэвэл дэня манди кучютно подарко. Кана ром дэла манди патив, пала када со мэ бэяндом лэсти шов чявэн». Тай вой акхарда лэ Завулоно6.

21Проджиля савись вряма и вой бэянда чеёра тай акхарда ла Дина.

22Тунчи Дэвэл взрапирда Рахиля. Вов ушунда ла тай терда кади, соб вой тэ бэянэл чяворэн. 23Вой ачиля пхари тай бэянда чявэ. Вой пхэнда: «Дэвэл злиля муро ладжявимо». 24Вой инте пхэнда: «Тэ дэл манди РАЙ инте екхэ чявэ», тай акхарда лэ Иосифо7.

Сар Иаково ачиля барвало

25Тунчи сар Рахиль бэянда Иосифо, Иаково пхэнда Лаваности:

— Отмук ман , соб мэ тэ рисявав пэ пхув, тев бэяндомпэ. 26Дэ манди мурэн ромнен тай чяворэн, пала савэн мэ теравас бути пэ тутэ. Тунчи мэ уджява. Ту екхджино джянэх, сар бут мэ теравас пэ тутэ.

27Нэ Лавано пхэнда лэсти:

— Сар мэ аракхлём мила дэ тирэн якхэн, мангав тут, ачпэ. Мэ уджянглём пав врэжымо, со РАЙ бахталисарэл ман пала тутэ.

28Тай допхэнда:

— Пхэн пэхкири цымин, мэ потинава тути.

29Иаково пхэнда лэсти:

— Ту джянэх, сар мэ теравас бути пэ тутэ и савэ тирэ гуртуря ачиле тэ наисарэх ман. 30Лэн на сля бут, сар мэ тэ авав, ай кана лэн пэ бутэстэ будэр, тай РАЙ бахталисарэл тут пала ман. Всаекх, кала жэ мэ стидава сось важ муро цэр?

31Лавано пхучля:

— Со тути тэ дэ?

— Манди нисо на трэбуни, — пхэнда Иаково. — Стер важ манди кацик екх, тай мэ авава и дурэдэр тэ чяравэ тай фирисарэ тирэ гуртуря. 32Мук ман тэ обджяв всаворэ гуртуря тай тэ тховав дэ рига всаворэ пятнистонэн и крапчятонэн бакрэн и бузнен тай всаворэ калэ бакрорэн. Вонэ авэна муро потинимо. 33Чячимо муро душола англэ, кала закамэґа тэ дыкхэ потинимо, саво дэнян манди. Сар аракхэлапэ мандэ накрапчято тай напятнисто бузни чи накало бакроро, вонэ авэна тэ бинэпэ сар чёрданэ.

34— Допхэндэпэ, — пхэнда Лавано. — Мэк авэла кади, сар ту пхэндан.

35Нэ дэ кодэва жэ диво вов отлиля всаворэн крапчятонэн тай пятнистонэн бузнэн, тай всаворэн крапчятонэн тай пятнистонэн бузнен, колэн, пэ кастэ сля парнимо, тай всаворэн калэн бакрорэн тай отдэня лэн тэ дыкхэн пала лэндэ лэхкирэ чявэ. 36Тай вов терда, соб тэ авэл машкар лэндэ и Иаково тринэ дивэнго дром.

Ай Иаково чяравэлас Лаванохкирэ гуртуря, савэ аченепэ. 37Иаково вычинда ївант рандя тополестар, миндалестар тай чинарестар, злиля морци лэндар тай стерда пэ лэндэ парнэ тханора, соб тэ душол парнимо андрал. 38Вов тховда кацавэ рандора дэ всаворэн балаен, соб вонэ тэ авэн скотостэ пэ якхэн, кала авэна тэ пэ пани. Дэ кодэя вряма, сар бакря ачен пхарэ, кала авэнас вонэ тэ пэ, 39вонэ теранас кода англа рандёра, тай бакрорэ бэянэнаспэ лэндэ пёстри, крапчяти тай пятнисти. 40Иаково порисявэлас бакрэн пёстронэндэ и калэндэ , савэ сле Лаванохкирэ, ай тэрнэн тховэлас дэ рига. Кади лэстэ сле гуртуря, тай вов рицарэлас лэн ригатар Лаванохкирэндар бакрэндар. 41Кала састэ бакрэ тай бузня авэнас тэ пэ, Иаково тховэлас англа лэндэ дэ балаен рандёра, соб вонэ тэ терэн бакрорэн англа рандя. 42А кала авэнас насастэ бакрэ тай бузня, то вов на тховэлас рандя. Кади насасто ското доросэласпэ Лаваности, ай састо — Иаковости. 43Иаково ачиля тэ барвалёл, лэстэ кана сле барэ гуртуря, а кадиж копыли тай копыльницы, верблюдуря тай магаря.