Otkrivenje 15

O efta anđelja e eftane nevoljencar

1Tegani dikhljum pana jekh baro hem čudesno znako ko nebo: efta anđelja e eftane poslednjone nevoljencar, adalese so olencar završini pe e Devlesiri holi. 2I dikhljum nešto sar stakleno more mešime e jagaja hem okolen kola pobedinde i Zver, lakoro kip hem o broj lakere anavesoro. Terđovena ine uzalo stakleno more hem ićerena harfe save o Devel dinđa len. 3Đilabde i đilib e Mojsijasiri, e Devlesere slugasiri, hem e Bakroresiri đilib:

“Barei hem čudesna te delja,

Gospode Devla, tu kova sa šaj!

Pravednai hem čačikane te droma,

Carona e nacijengere!

4Ko te na daral tutar, Gospode,

hem te na slavini to anav?

Adalese so samo tu injan sveto.

Sa o narodija ka aven

i ka peren ko kočija angla tute,

adalese soi mothovde te pravedna delja.”

5Palo adava dikhljum sar ko nebo phravdilo o Hram – o Šatori oto svedočanstvo, 6hem olestar iklile efta anđelja kolen ine o efta nevolje. On inele urjavde ano skupo hem čisto lan hem ko gruđa inele phandle zlatnone pojasencar. 7Tegani jekh taro štar dživde bićija dinđa e eftane anđelenđe efta zlatna čare pherde e Devlesere holjaja, kova zauvek živini. 8O Hram pherdilo čuroja e Devlesere slavatar hem lesere zoralipnastar, hem niko našti ine te đerdini ano Hram sa đikote na završini pe o efta nevolje e eftane anđelendar.