1. Petar 5

Uputstvija e starešinenđe hem e ternenđe

1A akana, me kova injum starešina, mangava te phenav nešto e starešinenđe maškara tumende. Me injum svedoko e Hristesere patnjendar hem ka učestvujinav ani slava savi ka ovel amenđe mothovdi. 2Parvaren o stado e Devlesere savoi tumenđe poverime. Oven lesere nadglednici na adalese so mora, nego oti šukar volja – sar so o Devel mangela; na zbog i korist, nego sa vileja. 3Ma oven sar gospodarija upro okolende kolai tumenđe poverime te brininen lendar, nego oven primer zako stado! 4A kad ka mothoj pe o Najbaro pastiri ka priminen i kruna oti slava, savi na properela.

5Ađahar hem tumen, ternalen, pokorinen tumen e starešinenđe. A sare jekh premalo avereste urjaven tumen ani poniznost, hem služinen jekh averese, adalese so:

“O Devel protivini pe e barikanenđe,

a e poniznonenđe mothoj milost.”

6Adalese, ponizinen tumen, talo zoralo vas e Devlesoro, te uzvisini tumen ko pravo vreme. 7Sa tumari briga frden upro leste, adalese so ov brinini pe tumendar.

8Oven uvek spremna hem džangavde pazinen. Adalese so, tumaroi protivniko, o beng, sar o lav savo vičini hem okolini rodindoj kas te hal. 9Protivinen tumen lese, zorale ani vera, adalese so džanen da ista patnje arakhena hem tumare phraljen ano sa o sveto.

10A o Devel, kovai milostivno ano sa, kova tumen prekalo Hrist Isus vičinđa ani pli večno slava, ov tumen, pali tumari kratko patnja ka usavršini, učvrstini, zorjari hem utemeljini. 11Olese pripadini o zoralipe zauvek. Amen.

E Petresere završna pozdravija

12Pisinđum tumenđe akava kratko lil ađahar so pomožinđa man o Silvan, kole dikhava sar vernone phrale, te opomeninav tumen hem te potvrdinav dai akava čačikani milost e Devlesiri. Zorale ićeren tumen upro late.

13Pozdravini tumen i khanđiri ano Vavilon1, savi zajedno tumencar izabirime e Devlestar, hem o Marko, mlo čhavo ani vera. 14Pozdravinen jekh avere ano mangipe.

Mir sarijenđe tumenđe kola injen ano Hrist.