Gurbet Bible
Sudije 1
E Judejcura thaj e Simeoncura dolen e Adoni-Bezeke
Palo meripe e Isuseso e Navineso, e Izraelcura pučlje e GOSPODE: “Ko amendar ka džal prvo te napadil e Hanaancuren?”
O GOSPOD phenda: “Nek džal e Judaso pleme. Akh, dijem kaja phuv ane lenđe vasta.”
Tegani e Judejcura vaćarde pe phralenđe e Simeoncurenđe: “Aven amencar ano kotor e phuvako savo amenđe dija pe e kockasa, katane te napadi e Hanaancuren. Pale gova i amen ka dža tumencar ani phuv savi dija pe tumenđe e kockasa.”
Gija e Simeoncura đele lencar.
Kana e Judejcura đele ano maripe, o GOSPOD dija ane lenđe vasta e Hanaancuren thaj e Perižanuren, a pašo Bezek mudarde deš milje (10 000) dženen. Gothe arakhlje e caro e Adoni-Bezeke thaj marde le, a e Hanaancuren thaj e Perižanuren mudarde. Al o Adoni-Bezek našlo. Von đele pale leste thaj dolde le, pa čhinde lese palcura ke vasta thaj ke pingre.
O Adoni-Bezek phenda: “Eftavardeš (70) carura savenđe sesa čhinde palcura ke vasta thaj ke pingre, ćidije e troške tale mingro astali. Sar ćerdem me, gija o Dol akana irisada manđe.”
Pale gova inđarde le ano Jerusalim thaj vov odori mulo.
E Judejcura prelen o Jerusalim thaj o Hevron
E Judejcura napadisade o Jerusalim thaj prelije le. Sa e manušen save bešle ano Jerusalim mudarde mačosa, a o foro phabarde.
Pale gova e Judejcura đele te maren pe protiv e Hanaancura save bešle ane bregura, ani pustinja i Negev thaj ane ravnice. Napadisade e Hanaancuren save bešle ano Hevron, savo angleder akhardola Kirjat-Arba, thaj pobedisade e Šešaje, e Ahimane thaj e Talmaje.
O Otniel prelol o Devir
Gothar e Judejcura đele te čalaven pe manuša andaro Devir, savo angleder akhardola Kirjat-Sefer.
O Kalev phenda: “Ka dav me čheja e Ahsa romnjaće kolese savo čalavol po Kirjat-Sefer thaj prelol le.”
Thaj prelija le o Otniel, o čhavo e Kenazoso savo sasa phral e Kaleveso. Thaj gija o Kalev dija pe čheja e Otnielese.
Kana i Ahsa avili ko Otniel, voj čhuta le te roden o polje tare lako dad o Kalev.
Tegani i Ahsa đeli ke po dad, pa kana ulili taro her, o Kalev pučlja la: “So manđe?”
Voj vaćarda lese: “Moliv tut, blagoslovi man. Kana već dijan man goja šući phuv ano Negev, de man thaj e izvora e pajese.”
Gija vov dija la e uprune thaj e telune izvora.
E Judejcurenđe thaj e Venijamincurenđe pobede
E potomkura e Mojsijase sastrese, e Kenejcose, đele e Judejcurencar taro Foro e palmengo1 upre ani judejsko pustinja Negev pašo Arad, pa odori ačhile te bešen maškare gova narodo.
E Judejcura đele pe phralencar e Simeoncurencar thaj mudarde e Hanaancuren save bešle ano Cefat. Uništisade sa gova foro thaj golese avđive akhardol Horma2. E Judejcura lije i Gaza, o Aškelon thaj o Ekron lenđe phuvencar.
O GOSPOD sasa e Judejcurencar, gija von lije e bregura. Al e manušen save bešena ke doline naštine te traden, golese so sesa len sastrunale marimase vordona. Sar so obećisada o Mojsije, o Hevron dija pe e Kalevese, savo gothar tradija e Anakose trine potomkuren.
Al e Venijamincura ni tradije e Jevusejcuren save bešena ano Jerusalim. Golese e Jevusejcura bešen ano Jerusalim e Venijamincurencar dži avđive.
E Efremcura thaj e Manasijcura prelen o Betel
E Efremcura thaj e Manasijcura3 napadisade o Betel, thaj o GOSPOD sasa lencar.
Bičhalde špijunuren ano Betel savo angleder akhardola Luz, thaj von odori dikhlje jekhe manuše sar ikljol andaro foro, pa vaćarde lese: “Sikav amenđe sar te da ano foro garandoj thaj amen ka ava milostiva tuće.”
Gija vov sikada lenđe sar te den ano foro. Tegani mudarde e manušen ano foro e mačosa, al kole manuše thaj lese familija ni mudarde. Gova manuš đelo ani phuv e Hetiturenđi thaj odori vazdija foro savo akharda Luz, sar so akhardol i avđive.
E narodura saven e Izraelcura ni tradije
E Manasijcura ni tradije e manušen tare forura o Bet-Šean, o Taanah, o Dor, o Jivleam, o Megido thaj e pašutne thana paše kala forura, golese so e Hanaancura ande odluka te bešen maškare lende. Kana e Izraelcura zurajle, čhute e Hanaancuren te ćeren lenđe bući ki zor. Al naštine te traden len gothar dži o krajo.
Ni e Efremcura ni tradije e Hanaancuren save bešle ano Gezer, gija e Hanaancura ačhile te bešen maškare lende.
Ni e Zavuloncura ni tradije e Hanaancuren save bešle ano Kitron thaj ano Nahalol. Gija e Hanaancura ačhile maškare lende, al e Zavuloncura čhute len te ćeren bući ki zor.
Ni e Asircura ni tradije e manušen tare forura o Ako, o Sidon, o Ahlav, o Ahziv, i Helba, o Afik thaj o Rehov. Gija e Asircura ačhile te bešen maškare Hanaancura, e manušencar tari goja phuv, golese so naštine te traden len.
Ni e Neftalimcura ni tradije e manušen taro Bet-Šemeš thaj taro Bet-Anat. Gijate e Neftalimcura bešle e Hanaancurencar, e manušencar tari goja phuv, al e manuša taro Bet-Šemeš thaj taro Bet-Anat ćerde lenđe bući ki zor.
E Amorejcura tradije e Danovcuren ane bregura thaj ni mukhlje len te uljen tele ani dolina. E Amorejcura ni manglje te ačhaven o brego o Heres, ane forura Ajalon thaj o Šaalvim, al kana e Efremcura thaj e Manasijcura zurajle, čhute e Amorejcuren te ćeren lenđe bući ki zor. I granica e Amorejcurenđi sasa ko drom taro Akrabim dži i Sela pa naupre.
Source notes (3)
- Footnote Foro e palmengo Gova si o Jerihon.
- Footnote Horma Kava značil: “Potpuno uništime.”
- Footnote E Efremcura thaj Manasijcura Ani jevrejsko čhib pisil: “E Josifese plemenura.”
Gurbet Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.