Jona 2

E Jonasi molitva

1O Jona taro vođi e mačheso molisajlo e GOSPODESE, pe Devlese, 2vaćarindoj:

“Tare mingro bilačhipe akhardem e GOSPODE

thaj vov šunda man.

Andaro sveto e mulengo1 rodijem pomoć,

a tu šundan o glaso mingro.

3Ane dubine čhudijan man,

ano ilo e moreso,

kaj okolisade man e morska struje

thaj sa ćire zurale talasura učharde man.

4Dijem man gođi: ‘Sema tradime ćire jakhendar,’

ipak, palem ka dikhav premal ćiro sveto Hram.

5E paja učharde man dži o krlo,

e dubine okolisade man,

i morsko čar paćardili manđe trujal o šoro.

6Dži e temeljura e planinenđe propeljem,

i phuv phanglja man ane peste baše sa e đivesa.

Al tu, GOSPODE, Devla mingreja,

ikaldan man džuvde andari bari rupa.

7Kana mi duša lija te ačhavol man,

dijem man gođi tutar, GOSPODE.

Mingri molitva avili dži tute,

ano ćiro sveto Hram.

8Kola save slavin e bezvrednone idoluren,

crden pe tare ćiro verno manglipe.

9Al me ka anav tuće žrtva,

điljencar save den tuće hvala

ka pherav o lafi so dijem tuće.

O spasenje avol taro GOSPOD!”

10Tegani o GOSPOD zapovedisada e mačhese, thaj o mačho čhungarda andar po muj e Jona ki obala.