Gurbet Bible
1. Mojsije 29
O Jakov reslo ano Haran
O Jakov nastavisada o drom thaj reslo ani phuv ke istočna narodura. Tari jekh drom dikhlja ano polje bunari paše savo pašljon trin stadura bakre. Tare gova bunari dena gole bakren te pijen paj, thaj po bunari sasa čhuto baro bar. Kana bi ćidena pe sa e stadura ke gova than, e čobanura bi crdena o bar taro bunari thaj e bakre bi pijena. Pale gova bi palem irina o bar ke leso than.
O Jakov pučlja len: “Katar sen, phralalen?”
Von vaćarde lese: “Taro Haran.”
Tegani o Jakov pučlja len: “Pindžaren li e Lavane, e Nahorese unuko?”
Von phende lese: “Pindžara.”
O Jakov palem pučlja: “Sar si vov?”
E čobanura irisade lese: “Šukar si. Akh, baš lesi čhej i Rahilja avol lese bakrencar.”
Tegani o Jakov phenda: “Akh, o kham si vadži učo. Vadži naj vreme te ćiden pe e bakre te soven. Den e bakren te pijen pa tegani mućhen len te čaren.”
Von lese phende: “Našti gova te ćera dži kaj ni ćiden pe sa e stadura e bakrencar thaj dži kaj ni crda o bar taro bunari. Tegani šaj da e bakren te pijen paj.”
Dži kaj o Jakov vadži vaćarola lencar, i Rahilja avili pe dadese bakrencar, golese kaj voj sasa čobanica. Kana o Jakov dikhlja e Rahilja, e čheja pe ujkose e Lavanese, thaj e Lavanese bakren, avilo dži o bunari, crdija o bar thaj dija pe ujkose bakren te pijen paj. Tegani o Jakov čumidija e Rahilja, thaj zurale lija te rovol. Pale gova o Jakov phenda e Rahiljaće kaj si vov laće dadese phejako čhavo, čhavo e Revekako. I Rahilja prastija thaj gova vaćarda pe dadese.
Kana šunda o Lavan o haberi kaj avilo o Jakov, lese phejako čhavo, prastija angle leste. Grlisada le, čumidija le thaj inđarda le ane po ćher.
Kana o Jakov vaćarda e Lavanese sa so sasa lesa, o Lavan phenda: “Čače san mingro rat thaj mingro telo!”
O Jakov lol romnjaće e Lija thaj e Rahilja
Kana ačhilo o Jakov ko Lavan čhon đive, o Lavan phenda e Jakovese: “Dal ka služi man bizi plata golese kaj san me phejako čhavo? Phen manđe sar manđe te poćinav tut?”
E Lavane sesa duj čheja. I phureder akhardola Lija a i poterni Rahilja. E Lija sesa lačhe jakha, al e Rahilja sasa lačho telo thaj sasa but lačhi. A golese kaj o Jakov manglja e Rahilja, phenda: “Ka služiv tut efta berš će pocikne čhejaće e Rahiljaće.”
O Lavan phenda: “Pošukar te dav la tuće nego nesave averese. Ačh ke mande!”
Gija o Jakov služisada e Rahiljaće efta berš, al ćerdilo lese taro manglipe premale late kaj nakhle nekobor đivesa.
Tegani o Jakov phenda e Lavanese: “De man me romnja, te lav la romnjaće, golese kaj o vreme me služimaso nakhlo.”
O Lavan ćidija sa e manušen andar gova than thaj ćerda bari gozba. Al kana peli i rat, lija pe phuredere čheja e Lija thaj la inđarda e Jakovese thaj vov suta lasa. O Lavan dija pe čhejaće e Lijaće e robinja e Zilpa, te avol laći sluškinja. Kana avili i sabalin, o Jakov dikhlja kaj suta e Lijasa!
Tegani o Jakov phenda e Lavanese: “Sose gova ćerdan? Na li služisadem tut e Rahiljaće? Sose xoxadan man?”
O Lavan phenda: “Akate amende naj o adeti i poterni čhej te lol rome angleder i phureder. Nakhav e abaveso kurko e Lijasa, pa tegani ka dav tut i e dujtona, savaće ka služi man vadži aver efta berš.” O Jakov gija ćerda. Nakhada e abaveso kurko e Lijasa, pa tegani o Lavan dija le pe čheja e Rahilja romnjaće. O Lavan dija pe čhejaće e Rahilja e robinja e Bilha, te avol laći sluškinja. Gija o Jakov suta i e Rahiljasa thaj la manglja pobut nego e Lija. Pale gova e Lavane služisada vadži efta berš.
E Jakovese čhave
O GOSPOD dikhlja kaj i Lija naj mangli taro Jakov, golese putarda lako vođi te ačhol khamni, al i Rahilja naštine te ačhol khamni.
I Lija ačhili khamni thaj bijanda čhave. Dija le alav Ruvim1, a gova si sar voj so phenda: “O GOSPOD dikhlja mo pharipe, akana mo rom ka manđol man.”
I Lija palem ačhili khamni, bijanda čhave thaj phenda: “O GOSPOD šunda kaj mo rom ni manđol man, golese dija man i kale čhave.” Golese dija le alav Simeon2.
Gija pale ačhili khamni, bijanda čhave thaj phenda: “Akana mo rom ka sikavol manđe manglipe, golese so bijandem lese trine murše čhaven.” Golese dija le alav Levije3.
A kana vadži jekh drom ačhili khamni thaj bijanda čhave, phenda: “Kava drom ka zahvaliv e GOSPODESE.” Golese akharda e čhave Juda4.
Pale gova i Lija ačhada te bijanol.
Source notes (4)
- Footnote Ruvim Značil: “Dikh, muršoro.”
- Footnote Simeon Značil: “Te šunol.”
- Footnote Levi Značil: “Te phandol katane.”
- Footnote Juda Značil: “Te zahvalil.”
Gurbet Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.