1. Mojsije 2

1Gija sasa završimo o nebo thaj i phuv thaj sa pe lende.

Eftato đive

Odmor

2Dži o eftato đive o Dol završisada pi bući thaj eftato đive odmorisajlo tare sa e buća. 3O Dol blagoslovisada o eftato đive thaj ćerda le te avol sveto, golese kaj odmorisajlo eftato đive tare sa e buća save ćerda.

4Gija sasa ćerde o nebo thaj i phuv.

Edensko vrt

Sar o GOSPOD, o Dol, ćerda i phuv thaj o nebo, 5vadži ni barile nisave divlje ni poljska biljke, golese so o GOSPOD, o Dol, vadži ni mukhlja o bršnd ki phuv thaj ni sasa ni manuš te obradil i phuv. 6Al o paj ikljola andari phuv thaj ćinđarola o muj e phuvako.

7Tegani oblikujisada o GOSPOD, o Dol, e manuše taro praho e phuvako thaj phurdija lese ano nak duxo e džuvdimaso thaj gija postanisada o manuš džuvdo biće. 8Pale gova o GOSPOD, o Dol, sadisada vrt ano Eden ko istok thaj čhuta gothe e manuše save oblikujisada. 9Thaj ćerda o GOSPOD, o Dol, andari phuv te baron sa e vrste kašta šukar dićhimase thaj šukar xamase. Ko maškar ano vrt sasa o kaš e džuvdimaso thaj o kaš e džanglimaso taro šukaripe thaj taro bilačhipe.

10Andaro Eden ikljola len savi ćinđarola o vrt, a gothar ulavola pe ane štar bare leja. 11I angluni len dija pe vika Pišon, voj thavdola trujal sa i phuv i Havilsko, ane savi isi zlato. 12O zlato gole phuvako si but šukar, a gothe si i mirisno smola thaj kučale bara oniks. 13I dujto len dija pe vika Gihon, voj thavdol trujal sa i phuv i Kuš. 14I trito len dija pe vika Tigar, a voj thavdol istočno tari Asirija. I štarto len si o Eufrat.

15O GOSPOD, o Dol, lija e manuše thaj čhuta le ano edensko vrt te ćerol bući gothe thaj te araćhol le.

16O GOSPOD, o Dol, zapovedisada e manušese: “Šaj te xa slobodno tare sa e kašta ano vrt, 17al taro kaš e džanglimaso taro šukaripe thaj taro bilačhipe, lestar ma xa! Golese so, ane gova đive kana ka xa tare gova kaš, čače ka mere.”

18Tegani vaćarda o GOSPOD, o Dol: “Naj šukar o manuš te avol korkoro. Ka ćerav lese khanika, ko ka avol lese šukar pomoćniko.”

19Tegani o GOSPOD, o Dol, tari phuv oblikujisada sa e divljone životinjen thaj e čirikljen ko nebo thaj anda len anglo manuš te dićhol sar ka dol len alava. Thaj sar bi o manuš dola alav dži jekhe džuvdone bićese, gija bi avola leso alav. 20Gija o manuš dija alav sa e stokaće, e čirikljenđe thaj e divljone životinjenđe.

Al e manušese ni arakhadilo khoni ko bi avola lese šukar pomoćniko. 21Golese o GOSPOD, o Dol, mukhlja po manuš zuralo sojipe. Thaj dži kaj sovola, lija lestar jekh pašavro thaj gova than phanglja masesa. 22O GOSPOD, o Dol, taro pašavro savo lija taro manuš, ćerda džuvlja thaj anda la anglo manuš.

23Tegani o manuš phenda:

“Akh, kava si kokalo tare mingre kokala

thaj telo tare mingro telo!

Nek akhardol džuvli,

golese kaj lija pe taro manuš.”

24Golese o manuš ka ačhavol pe dade thaj pe da thaj ka avol katane pe romnjasa thaj duj ka aven jekh telo.

25A solduj sesa nanđe, o manuš thaj lesi romni thaj ni ladžajle.