Sudije 8

1E manuša andar e Efremesko pleme holjajle po Gedeon, pa phendine lešće: “Sostar godova ćerdan amenđe? Sostar či akhardan amen kana teljardan ande borba protiv e Midjancurja?”

2A vo phendas lenđe: “Zar okova so me ćerdem šaj meril pe okoleja so tumen ćerdine? Naj li e Efremesko paberčenje majlačho katar sasti e Aviezerošći berba? 3O Del ande tumare vas dija e midjanske zapovednikonen e Oreve thaj e Zeeve. Sar šaj te usporedil pe okova so me ćerdem okoleja so tumen ćerdine.”

Kana godova phendas, nas majbut holjarike pe leste.

O Gedeon zarobil e Zevahe thaj e Calmune

4O Gedeon areslo dži ke reka Jordan thaj nakhlo pe okoja rig pire trin šela manušenca, save sas iscrpime, ali ipak nastavisardine e potera.

5O Gedeon phendas e manušenđe andar o gav Sukot: “Moliv tumen, den mungre manušenđe mangro. Iscrpime si, a još uvek sam ande potera pale midjanske carurja o Zevah thaj o Calmuna.”

6Ali e vođe andar o Sukot phendine: “Či zarobisardan e Zevahe thaj e Calmune. Sostar askal dijamas mangro ćire vojskaće?”

7A o Gedeon phendas lenđe: “Kana si gajda, džanen kana o GOSPOD predaila manđe e Zevahe thaj e Calmune ande vas, avava thaj šibiva tumen e pustinjske kangrenca thaj e dračesa.”

8Thaj okotar o Gedeon thaj lešće manuša đelotar ando gav Penuel thaj okote mangline isto, ali vi von phendine lenđe isto sago vi e manuša andar o Sukot.

9Zato o Gedeon phendas e manušenđe andar o Penuel: “Kana boldava man sago pobedniko, haravava akaja kula.”

10A o Zevah thaj o Calmuna sas e vojskasa ando gav Karkor. Varekaj katar dešupandž milje manuša ačhiline katar e vojska e aver themendar katar o istok. A sas mudardo šel thaj biš milje manuša naoružime e mačesa. 11O Gedeon đelotar e dromesa saveja naćhen okola save trajinas tale šatorja, istočno katar o Novah thaj o Jogbeha. Thaj dok e dušmaja ando midjansko tabor či nadinas pe, o Gedeon napadnisarda thaj pobedisardas len. 12Duj e midjanske carurja, o Zevah thaj o Calmuna, našline. Ali o Gedeon džalas pale lende dok či aresla len thaj zarobisarda len, a sa lenđi vojska zurale darada.

13Askal o Gedeon, e Joašesko čhavo, boldelas pe andar e bitka e dromesa savo inđarelas prekal o brego Heres. 14Astardas jećhe terne čhave andar o Sukot thaj phučelas les. A vo dija les o popis e alavenca katar eftavardeš thaj efta vođe thaj e starešine andar o gav Sukot.

15Pale godova o Gedeon đelo ando Sukot thaj okote phendas e manušenđe: “Ake, o Zevah thaj o Calmuna, zbog save vređonas man kana phendine: ‘Či zarobisardan e Zevahe thaj e Calmune. Sostar askal dijamas mangro ćire vojskaće?’”

16Askal lijas e starešinen e gavešće, pa e pustinjske kangrenca thaj e dračesa šibisarda e manušen andar o Sukot. 17Vo fuljardas vi e kula ando Penuel thaj mudardas e manušen andar o gav.

18Askal phučla e Zevahe thaj e Calmune: “Sošće sas e manuša saven tumen mudardine pe planina Tavor?”

A von phendine: “Izgledinas sago tu, svako lendar izgledilas sago e caresko čhavo.”

19O Gedeon phendas: “Godova sas mungre phral, čhave mungre dejaće. Hav solah e GOSPODEJA, te mukline sas len po trajo, či mudardemas tumen.”

20Askal o Gedeon phendas pire prvo bijande čhavešće e Jeterešće: “Ušti thaj mudar len!”

Ali o Jeter či inkaldas o mačo, kaj sas još čhavo thaj darajlo.

21O Zevah thaj o Calmuna phendine: “Tu ušti, pa ćer godova. Kaj, godova si bući pale muškarcurja.”

Gajda o Gedeon uštilo thaj mudarda e Zevahe thaj e Calmune, pa katar e kor lenđe kamilenđi fuljardas e ukrasurja save sas ando obliko e čhonesko.

O Gedeon ćerel idoli katar o sunakaj

22Askal e Izraelcurja phendine e Gedeonešće: “Tu vladi pe amende – tu, ćiro čhavo thaj ćiro unuko – kaj oslobodisardan amen andar e vas e Midjancenđe.”

23A o Gedeon phendas lenđe: “Či me vladiva pe tumende, a ni mungro čhavo. Pe tumende vladila o GOSPOD.”

24Thaj još phendas: “Samo jek mangav. Neka svako tumendar del man po čen palo nak andar piro pleno.” Kaj varesave katar e manuša saven mudardine sas Jišmaelcurja save inđarenas sunakune čeja.

25A von phendine: “Rado dasa.” Askal buljardine o ogrtači pe phuv, pa svako lendar pe leste čhuda e čen palo nak andar piro pleno. 26E sunakune čeja palo nak, save o Gedeon manglas, sas ukupno phare biš kile, bi e ukrasengo ando obliko e čhonesko, e lančićurja thaj e drze katar o skerlet save inđarenas pe peste e midjanske carurja, ni e lancurja save sas oko e kor lenđe kamilenđe. 27Katar godova sunakaj o Gedeon ćerda prusluko thaj čhuta les ande piro gav o Ofra. Sa o Izraelsko them počnisardine te peren pe koča anglo prusluko. Godova postanisarda zamka palo Gedeon thaj lešći familija.

28Gajda e Izraelcurja pobedisardine e Midjancen save majbut posle či ćerenas lenđe problemurja. Ande phuv sas miro štarvardeš brš, sa dok sas o Gedeon džudo.

E Gedeonesko smrto

29O Jeruv-Vaal godova si o Gedeon, e Joašesko čhavo, bolda pe te trajil ande piro ćher. 30Sas le but romnja pa bijandine lešće eftavardeš čhave. 31Jećhe čhave bijanda lešće vi lešće ropkinja, savi trajilas ando Sihem, a vo dija les alav Avimeleh. 32O Gedeon, e Joašesko čhavo, mulo kana sas zurale purano. Prahome si ando limori pire dadesko e Joašesko, ande Ofra pe Aviezerošći phuv.

33Čim o Gedeon mulo, e Izraelcurja palem dine pe ando bludo e Vaalenca. Čhutine pešće e Vaal-Berit palo del. 34Thaj či majbut gndinas po GOSPOD, lengo Del, savo spasisarda len andar e vas lenđe dušmajenđe save sas oko lende. 35A či poštuina ni e Jeruv-Vaalešće familija, godova si e Gedeone, vi ako ćerda but lačhipe pale Izraelcurja.