Sudije 13

O bijandipe e sudijasko e Samsonesko

1E Izraelcurja palem teljardine te ćerenas okova so si bilačhe ande GOSPODEŠĆE jakha. Zato o GOSPOD predaisarda len ande vas e Filistejenđe pe štarvardeš brš.

2Sas jek manuš andar o gav Cora po alav Manoah andar e Danesko pleme. E Manoahe sas romnji savja našti avelas čhavra.

3Laće sikadilo o anđeo e GOSPODESKO thaj phendas: “Našti avilo tut čhavra, ali akana ačheja khamni thaj bijaneja čhave. 4Samo katar akana le sama te na pes ni mol ni aver pimo savo matarel thaj te na has khanči so si nečisto anglo Del. 5Kaj ačheja khamni thaj bijaneja čhaves. Neka e britva či naćhel prekal lesko šoro, kaj o čhavro avela nazirej, odvojime palo Del još katar pire dejako đi. Vo lela te spasil e Izraelcen andar e Filistejenđe vas.”

6Askal e manušnji đeli ke piro rom thaj phendas lešće: “Avilo manđe e Devlesko manuš. Izgledilas but šukar sago anđeo e Devlesko. Či phučlem les katar avel, a vo či phendas manđe piro alav. 7Ali akava phendas manđe: ‘Ake, ačheja khamni thaj bijaneja čhave. Zato na te pes mol niti pimo savo matarel thaj na te has khanči so si nečisto anglo Del, kaj o čhavro avela nazirej, odvojime palo Del katar pire dejako đi dži ko đes kana merela.’ ”

8O Manoah askal molisajlo e GOSPODEŠĆE thaj phendas: “GOSPODE, moliv tut, neka avel amenđe palem e Devlesko manuš saves bičhaldan amenđe, te sikavel men so te ćeras e čhavoresa savo bijandola.”

9O Del dija e Manoahe okova so molisarda, thaj o anđeo e Devlesko palem avilo ke manušnji dok sas pe njiva. Lako rom o Manoah nas lasa.

10Zato e manušnji sigo prastaja te mothol pire romešće thaj phendas lešće: “Eke, palem sikadilo manđe okova manuš savo sas okova!”

11Thaj o Manoah uštilo thaj teljarda pire romnjasa.

Kana avilo dži ko okova manuš, phučla les: “San tu okova savo ćerdan svato mungre romnjava?”

Vo phendas: “Ej, me sem.”

12Askal o Manoah phučla les: “Kana ćire alava pherdona, sar trubul te barjaras les thaj so vo trubul te ćerel?”

13O anđeo e GOSPODESKO phendas e Manoahešće: “Neka ćiri romnji lel sama te inćarel pe ke sa so phendem laće. 14Neka na hal khanči so avel katar e drakaći loza. Neka na pijel mol, niti aver pimo savo matarel, niti te hal khanči so si melalo anglo Del. Neka inćarel sa so zapovedisardem laće.”

15Askal o Manoah phendas e GOSPODEŠĆE anđelešće: “Moliv tut ačh dok das čhurjasa e jarco pale tute te has.”

16O anđeo e GOSPODESKO phendas: “Ako vi ačhav, či hava tumaro habe. Ali ako kamen, šaj prinesin žrtva paljenica e GOSPODEŠĆE.”

Kaj o Manoah či džanglas kaj si akava o anđeo e GOSPODESKO.

17Askal o Manoah phučlas e GOSPODEŠĆE anđele: “Sar si ćo alav, te šaj das najs tuće kana pherdona ćire alava?”

18O anđeo e GOSPODESKO phendas lešće: “Sostar phučes man pale mungro alav, kana našti haćares les?”

19Pe godova o Manoah lijas e jarco thaj e đivešći žrtva katar thaj pe jek stena prinesisarda žrtva e GOSPODEŠĆE. Dok o Manoah thaj lešći romnji dićhenas, o GOSPOD ćerda vareso čudesno: 20dok e jag katar o žrtveniko vazdelas pe prema o nebo, o anđeo e GOSPODESKO vazda pe e jagasa ando nebo. Kana o Manoah thaj lešći romnji dikhline godova, peline pe koča e mujesa dži ke phuv. 21Sar o anđeo e GOSPODESKO či sikadolas majbut e Manoahešće thaj lešće romnjaće, o Manoah haćarda kaj sas godova o anđeo e GOSPODESKO.

22O Manoah phendas pire romnjaće: “Sigurno merasa, kaj dikhlam e Devle!”

23Ali lešći romnji phendas lešće: “Te o GOSPOD gindisarda te mudarel men, či amendar primisardasas žrtva paljenica thaj đivešći žrtva. Či sikadasas pe amenđe thaj či phendasas amenđe sa akava.”

24E manušnji bijandas čhaves thaj dija les alav Samson. O čhavro barjolas thaj o GOSPOD blagoslovisarda les. 25O Samson sas ando Danesko tabor, maškar o gava e Cora thaj o Eštaol, kaj o Duho e GOSPODESKO počnisarda te delujil pe leste.