Chergash New Testament
Jona 1
O Jona našel katar o GOSPOD
O alav e GOSPODESKO avilo e Jonašće, e Amitaješće čhavešće: “Lačhar tut thaj dža odma ando baro gav Niniva thaj propovedisar protiv e manuša, kaj džanav pale sa lenđe bilaćhe dela.”
Ali o Jona lija te našel katar o GOSPOD thaj teljardas te džal ando gav Taršiš. Đelo ande Jopa, okote arakhlas lađa savi plovilas ando Taršiš. Poćindas palo drom, dijas ande lađa thaj otplovisardas prema o Taršiš, či li našlosas katar o GOSPOD.
Askal o GOSPOD bičhaldas bari balval po more. Vazda pe gajda zurali oluja kaj e lađa sas ande opasnost te phađol. Sa e mornarja darajle thaj line te molin pe pire devlenđe, a vi o tereto savo sas ande lađa čhudine ando more te loćaren e lađa. Ali o Jona fuljisto tele ande lađa, okote pašljilo thaj zurale sovelas.
O kapetano avilo leste thaj phendas: “Sar šaj soves? Ušti thaj moli tut ćire devlešće! Šaj te godova del dićhela pe amende thaj či astarela amen e propast.”
Askal e mornarja phendine jek avrešće: “Ajde te čhudas e kocka, te dikhas zbog kaste astarda men akaja bibah.”
Gajda čhudine e kocka thaj voj sikada po Jona.
Von phučenas les: “Phen amenđe, zbog kaste aresla amen akaja bibah? Sošći bući ćeres? Katar san? Andar savi phuv san thaj andar savo them san?”
O Jona phendas lenđe: “Me sem Jevrejo thaj poštuiv e GOSPODE, e nebeske Devle, savo stvorisarda o more thaj e phuv.”
Kana saznaisardine lestar kaj našel katar o GOSPOD, zurale darajle thaj phučline les: “Sostar godova ćerdan?”
O more besnilas sa majbut thaj majbut, zato von phučline les: “So te ćeras tusa te o more smiril pe amenđe?”
O Jona phendas: “Vazden man thaj čhuden man ando more thaj o more smirila pe. Džanav kaj sem me došalo kaj astarda tumen kaja zurali oluja.”
E manuša kamenas te veslon palpale prema o kopno, ali našti veslonas, kaj o more besnilas sa majzurale.
Askal zavapisardine e GOSPODEŠĆE: “GOSPODE, molisaras tut, na de te mudardivas zbog godova kaj akale manušešće lasa o trajo! Na inćar amen došale kaj čhorel pe o nedužno rat, kaj tu, GOSPODE, ćerdan sar tuće sviđosajlo.”
Askal line e Jona, čhudine les ando more thaj o more smirisajlo. Von zbog godova zurale darajle katar o GOSPOD, pa dine lešće žrtva thaj zavetuisajle lešće.
A o GOSPOD zapovedisardas jećhe bare mačhešće te nakhavel e Jona, thaj o Jona sas trin đesa thaj trin raća ando ođi e mačhesko.
Chergash New Testament. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.