Matej 21

O Isus del ando Jerusalim sago o Mesija

(Mk 11,1–11; Lk 19,28–38; Jn 12,12–19)

1Kana o Isus thaj e učenikurja aviline paše pašo Jerusalim thaj avile ando gav Vitfaga pe Maslinsko gora, o Isus bičhaldas anglal pire duj učenikonen. 2Thaj phendas lenđe: “Džan ando gav savo si angle tumende thaj odma araćhena e phangle magarica thaj lasa laće terne magare. Putren len thaj anen mande. 3A ako vareko phučel tumen vareso, samo phenen: ‘Trubun e Gospodešće’, thaj odma mućena len.”

4Godova dogodisajlo te pherdol okova so sas phendo prekal o proroko:

5“Phenen e themenđe andar o Jerusalim:

‘Ake, ćiro caro avel tuće,

ponizno si thaj jašil po magarco,

po terno e magaricako.’”

6E učenikurja đele thaj ćerdine sar o Isus phendas lenđe. 7Andine e magarica thaj e terne magarco thaj preko lende čhutine pire ogrtača, te šaj o Isus bešel pe lende. 8O but o them buljarelas tele po drom pire ogrtačurja te sikaven lešće čast, a aver čhinenas e ranja e patrjenca katar e kaš thaj buljarenas po drom.

9A o them savo džalas angle leste thaj pale leste čhonas muj:

“Hosana1 e Davidešće Čhavešće!

Blagoslovime okova savo avel ando alav e Gospodesko!

Hosana e Devlešće ande visine!”

10Kana o Isus dijas ando Jerusalim, sasto gav uzbunisajlo thaj phučenas pe: “Ko si akava?”

11A o but o them phenelas: “Akava si o Isus, o proroko andar o Nazaret ande Galileja.”

O Isus tradel e trgovcen andar o Hramo

(Mk 11,15–19; Lk 19,45–48; Jn 2,13–22)

12Askal o Isus dijas ando Hramo, thaj trada andar leste sa okolen save bićinenas thaj ćinenas ando Hramo. Okolenđe kaj phađenas e love dijas mujal e sinije, a okolenđe save bićinenas e golubonen dijas mujal e klupe.

13Thaj phenelas lenđe: “Ando Sveto lil ačhel ramome: ‘Mungro Hramo trubul te avel molitveno ćher’, a tumen ćeren lestar than kaj ćiden pe e razbojnikurja!”

14Askal avile dži ko Isus ando Hramo e kore thaj e banđe thaj vo sastardas len.

15A kana dikhline e šorvale rašaja thaj e učitelja e Mojsiješće zakonestar e čudurja save ćerda thaj e čhavren ando Hramo sar čhon muj: “Hosana e Davidešće Čhavešće!”, zurale holjajle, 16thaj phučline les: “Ašunes li tu so akala čhavra čhon muj?”

O Isus phendas lenđe: “Ašunav. Sigurno čitosardine ando Sveto lil:

‘Ćerdan te slavin tut e čhavra thaj e bebe.’ ”

17Askal mukla len thaj andar o gav Jerusalim bolda pe ando gav savo akhardolas Vitanija, te okote raćarel.

E smokvako kaš šućilo sago kaj o Isus phendas

(Mk 11,12–14, 20–24)

18Detharinako rano, kana boldelas pe ando Jerusalim, o Isus bokhajlo. 19Dikhla e smokva pašo drom thaj nakhlo dži late, ali pe late či arakhlas khanči osim patrja.

Zato phendas laće: “Nikada te na avel majbut rodo pe tute!” Thaj e smokva odma šućili.

20E učenikurja pe godova začudisajle thaj phučline: “Sar e smokva gajda sigo šućili?”

21A o Isus phendas lenđe: “Čače phenav tumenđe, te paćajine thaj či posumnjin, či ćerena samo godova so me ćerdem e smokvasa, nego te phendine akale planinaće: ‘Vazde tut akatar thaj čhude tut ando more!’, godova vi avela. 22Sa so zamolin ando paćipe, primina.”

Katar si e Isuse vlast

(Mk 11,27–33; Lk 20,1–8)

23O Isus đelo ando Hramo. Dok okote sikavelas, avile leste e šorvale rašaja thaj e themešće starešine thaj phučline les: “Savo autoriteto si tut te ćeres akava? Ko dija tut vlast pale godova?”

24A o Isus phendas lenđe: “Vi me tumen vareso phučava. Ako tumen manđe phenen, vi me phenava tumenđe ko dija man vlast.

25Dali o Del phendas e Jovanošće te bolel e manušen, ili e manuša phendine lešće te ćerel godova?”

Von ćerenas svato maškar peste: “Te phendam ‘o Del phendas lešće’, phučela men ‘Sostar askal či paćajine lešće.’ 26A te phendam katar e manuša, dar amenđe katar o but o them kaj savora paćan kaj si o Jovano proroko.”

27Zato phendine e Isusešće: “Či džanas.”

A o Isus phendas lenđe: “Askal ni me tumenđe či phenava katar man vlast!”

O Isus phenel e prispodoba pale duj čhave

28“So gndin pale akava: Varesave manušes sas duj čhave. Avilo ko prvo thaj phendas lešće: ‘Čhaveja, dža ađes thaj ćer bući ando vinograd!’ 29O čhavo phendas: ‘Či kamav!’ Ali maj posle predomislisajlo thaj đelo.

30Askal o dad isto gajda phendas vi e aver čhavešće. A o čhavo phendas ‘Džava, raja’, ali či đelo.

31Savo katar akala duj džene ćerda e volja pire dadešći?”

A von phendine: “Okova prvo”.

A o Isus pe godova phendas lenđe: “Čače phenav tumenđe, e bludnikurja thaj e carinikurja dena majsigo tumendar ande Devlesko carstvo! 32Kaj o Jovano savo bolelas avilo te sikavel tumenđe o pravedno drom, ali tumen či paćaine lešće, a e carinikurja thaj e bludnikurja paćaine. A tumen čak vi kana sa godova dikhline, či predomislisajle thaj či paćajine lešće.”

O Isus phenel e prispodoba pale bilačhe vinogradarja

(Mk 12,1–12; Lk 20,9–19)

33“Ašunen još jek prispodoba: Varesavo manuš posadisardas vinograd thaj ogradisarda les, hanadas ande leste than kaj ćićidelas pe e drak te ćerel pe e mol thaj vazda stražarsko kula. Askal dijas o vinograd ando najam e vinogradarenđe thaj đelo po drom. 34Kana avili e vrjama pale berba, bičhaldas e slugen te len lesko deo katar o urodo. 35Ali e vinogradarja astardine e slugonen, jećhe mardine, a jećhe mudardine, a po trito čhudenas e bara dok či mudardine les.

36Pale godova vo bičhaldas majbut slugonen nego prvo data, ali e vinogradarja vi lenca ćerdine isto gajda.

37Po krajo bičhaldas lenđe pire čhaves kaj gndisardas: ‘Mungre čhave poštujina.’

38Ali kana e vinogradarja dikhline e čhave phendine: ‘Akava si o nasledniko. Hajde te mudaras les, thaj te ačhel amenđe lesko nasledstvo.’ 39Astardine les, čhudine les avri andar o vinograd thaj mudardine les.”

40Askal o Isus phučla len: “So gndin, sar o gospodari e vinogradesko ćerela okole vinogradarenca kana boldela pe?”

41Von phendine lešće: “Godole zlikovconen mudarela bi milako, a o vinograd dela aver vinogradarenđe, save dena les o urodo kana pale godova avela e vrjama.”

42O Isus phendas lenđe: “Sigurno čitosardine ando Sveto lil:

‘Bar saves e graditeljurja odbacisardine

postanisardas glavno bar e temeljesko.

Godova si e Gospodesko delo,

čudesno ande amare jakha.’

43Zato phenav tumenđe kaj lela pes tumendar e Devlesko carstvo, thaj dela pe okole themešće save dena lešće plodurja. 44Thaj ko god perel pe godova bar phađelape, a godova bar smrskola okoles pe kaste perel.”

45Kana e šorvale rašaja thaj e fariseja ašundine e paramiče thaj haćardine kaj mothol pale lende, 46kamenas te astaren les, ali daranas katar o them savo paćalas kaj si o Isus proroko.