Marko 8

O Isus parvarela štar ilade manušen

1Ko adala dive palem khedisalili bari gužva. I adaleske so na sine len so te han, o Isus vikingja pe učenikon uza peste hem phengja lenge: 2“Pharo mange akale manušenge. Trin dive tane mancar, a nane len so te han. 3Ako mukhlum len te džan peske bokhale khere, ka peren ko drumo, soske nesave lendar ale duraldan.”

4A o učenikija pučle le: “Kaj šaj te arakha ko akava čučo than dovolno maro bašo sa akala manuša te čajloven?”

5O Isus pučlja len: “Kozom mare isi tumen?”

Ola phenge: “Efta.”

6Togaš vakergja e manušenge te bešen tele ki phuv, lela o efta mare, blagodaringja e marenge, phagla len, hem dengja pe učenikonge, a ola delinge len e manušenge. 7Hem isto agjar sine len nekozom tikne mačhe. O Isus blagodaringja lenge da, hem phengja e učenikonge len da te delinen. 8Sarinen hale hem čalile. Hem khedinge efta korpe taro adava so ačhilo. 9Adala so hale sine štar ilade manuša. Palo adava o Isus mukhla len te džan peske. 10Hem odma uklilo ko čamco pe učenikoncar hem gelo ko thana tari Dalmanuta.

O fariseja rodena znako taro Isus

11Togaš ale o fariseja hem počmingja te akošen pe e Isuseja. Iskušinge le adaleja so rodinge lestar znako taro nebo.

12A ov silno izdišingja hem vakergja: “Soske akaja generacija rodela mandar znako? Čače phenava tumenge: Nisavo znako nane te del pe lenge.”

13Togaš mukhla len, uklilo palem ko čamco, hem nakhla tari javer strana taro ezero.

O kvasaci e farisejengoro hem e Irodeskoro

14A o učenikija leskere bisterge te len peja o maro, osven so sine len samo jekh maro ko čamco.

15A o Isus opomeningja len: “Pazinen! Arakhen tumen taro kvasaci e farisejengoro hem taro kvasaci e Irodeskoro.”

16A ola kerena sine lafi maškar peste: “Akava phengja amenge soske nane amen maro!”

17O Isus džangja so kerena lafi hem pučlja len: “Soske kerena akava lafi deka nane tumen maro? Panda li na svatinena hem na dikhena? Doborom li barale tumare vile? 18Jakha isi tumen, a na dikhena? Kana isi tumen, ama na šunena? Hem na setinena tumen li? 19Koga phagljum o pandž mare e pandže ilade muršenge, kozom pherde korpe khedingjen adalestar so ačhilo?”

Ola phenge: “Dešuduj.”

20“A koga phagljum o efta mare e štare ilade manušenge, kozom pherde korpe khedingjen adalestar so ačhilo?”

Ola phenge: “Efta.”

21Hem ov pučlja len: “Panda li na svatingjen?”

O Isus sasljarela korole manuše ki Vitsaida

22Koga resle ki Vitsaida, nesave manuša ange ko Isus jekhe korole manuše hem molinge le te čhivel pe vasta upro leste. 23O Isus astargja e korole manuše taro vas hem ikalgja le avrik taro gav, i čhungargja leske ko jakha hem čhigja pe vasta upro leste.

I pučlja le: “Dikheja li nešto?”

24Ov počmingja te dikhel hem vakergja: “Dikhava e manušen. Dikhona sar te phene kašta phirena.”

25Panda jekh puti o Isus čhigja pe vasta leskere jakhende, hem o manuš phragja pe jakha, irangja pe leske o dikhibe hem dikhela sine sa šukar.

26Togaš o Isus bičhalgja le khere hem phengja leske: “Ma khuv ko gav.”

O Petar phenela deka o Isus tano o Hristos

27O Isus pe učenikoncar gele ko gava uza e Filipeskiri Cezarija. Drumaldan o Isus pučlja len: “So phenena o manuša, koj sijum me?”

28Ola odgovoringe leske: “Nekoj phenela o Jovan Krstitel, a javera phenena deka sijan o prorok Ilija, a nesave javera phenena deka tu sijan jekh taro prorokija.”

29Togaš o Isus pučlja len: “A tumen? So phenena, koj sijum me?”

O Petar odgovoringja leske: “Tu sijan o Hristos!”

30I o Isus zapovedingja lenge nikaske te na vakeren baši leske.

O Isus vakerela bašo po meribe

31I počmingja te sikavel len deka o Čhavo Manušeskoro trebela but te cidel, hem nane te ovel prifatimo taro starešine, taro prvosveštenikija hem taro učitejla e Zakoneskere, hem ka ovel mudardo. Ama o trito dive ka uštel taro mule. 32O Isus phengja lenge adava otvoreno. Ama o Petar cidingja le ki jekh strana, hem opomeningja le.

33Ama koga o Isus irangja pe hem dikhla pe učenikon, vikingja e Petareske hem vakergja: “Naš mandar, Benga! Soske na mislineja adava soj Devleskoro, nego manušeskoro.”

Sar te ovel pe Isuseskoro učeniko

34Togaš vikingja sa e narodo uza peste zaedno pe učenikoncar, hem phengja lenge: “Koj mangela te ovel mo učeniko, neka otkažinel pe pestar hem neka lel po krsto hem neka phirel pala mande. 35Soske koj mangela te spasinel po životo, ka našavel le, a koj mangela te našavel po životo baši mange hem bašo evangelije, ka spasinel pe. 36So džabe celo sveto te le, ako ti duša našagjan? 37Ili soleja o manuš šaj zameninela pi duša?

38Soske koj ladžala mandar hem me lafendar ki akaja neverno hem grešno generacija, o Čhavo Manušeskoro da ka ladžal lendar, koga ka avel ki slava pe Dadeske e sveto angelencar.”