Macedonian Arli Romani
Luka 18
I parabola baši udovica hem o sudija
Togaš o Isus vakergja pe učenikonge jekh parabola deka sekat trebela te molinen pe hem te na otkažinen pe. I ov vakergja: “Ko jekh gradi sine jekh sudija so na darala sine e Devlestar, ni na sekirinela pe sine so mislinena o manuša. A ko adava gradi sine jekh udovica so sekat avela sine ki leste hem molinela le sine: ‘Ana pravda anglo okova so tužinela man.’ Ov nesavo vreme na mangela sine te pomožinel la. Ama palo nesavo vreme vakergja ki peste: ‘Iako na darava taro Devel, ni na sekirinava man so mislinena o manuša, ka anav lake pravda, te na avel više te dosadinel man, adaleske so sekat akaja udovica na mukhela man rahati!’ ”
Togaš o Gospodari o Isus phengja: “Šunen šukar so vakergja o nepravedno sudija! Nane li o Devel te anel pravda pe birimenge, so molinena pe ki leste dive rat? Ov ka mukhel li len te adžikeren? Vakerava tumenge, ov ka dikhel sigate te anel lenge i pravda. Ama koga o Čhavo Manušeskoro ka avel, dali ka arakhel vera maškar o manuša ki phuv?”
I parabola bašo o farisejco hem o danočniko
Togaš o Isus vakergja akaja parabola okolenge so mislinena sine deka tane pravedna, a javeren dikhena sine sar potele pumendar: “Duj manuša khuge ko Hrami te molinen pe, jekh farisejco, a o dujto danočniko. O farisejco terdilo hem molingja pe ki peste agjar: ‘Devla, ov sasto so na sijum sar javera manuša: čora, nepravednikija, preljubnikija ili sar akava danočniko. Postinava duj puti ko kurko hem dava desetok taro sa so isi man.’
A o danočniko tergjola sine duraldan hem na mangela sine ni te dikhel ko nebo, nego khuvela pe sine ko kolin hem vakerela sine: ‘Devla, ov milostlivo prema mande, e grešnikoske!’
Vakerava tumenge deka akava danočniko džala peske khere opravdimo anglo Devel, a na o farisejco! Soske sekoj so vazdela pe ka ovel ponižimo, a okova so ponižinela pe ka ovel vazdimo.”
O Isus blagoslovinela e tikne čhaven
O manuša anena sine pe tikne čhaven anglo Isus te čhivel pe vasta upro lende hem te blagoslovinel len. I koga o učenikija dikhle adava, zaptinge len.
Ama o Isus vikingja len ki peste hem phengja: “Mukhen e tikne čhaven te aven ki mande hem ma zaptinen len, soske asavkjenge pripadinela o carstvo e Devleskoro! Čače phenava tumenge, koj na priminela o carstvo e Devleskoro sar tikno čhavo, nane te khuvel ki leste.”
O Isus hem o barvalo manuš
Jekh upravniko, pučlja e Isuse: “Šukar učitele, so mora te kerav te šaj te dobinav o večno životo?”
A o Isus odgovoringja leske: “Soske vakereja mange deka sijum šukar? Nikoj nane šukar osven jekh Devel. O zapovedija džaneja: ‘Ma ker preljuba, ma mudar, ma čor, ma svedočin hovajbe, poštojn te dade hem te daja.’ ”
Togaš o upravniko phengja leske: “Sa adava pazingjum taro mo tiknipe.”
Koga šungja akava o Isus phengja leske: “Panda jekh falinela tuke. Dža bikin sa so isi tut hem delin o pare e čorolenge, i ka ovel tut barvalipe upre ko nebo. Togaš ava hem phir pala mande.”
Koga šungja adava o upravniko, but razočaringja pe, soske sine le baro barvalipe.
O Isus dikhla deka razočarisalilo i phengja: “Kozom tano pharo e barvalenge te khuven ko carstvo e Devleskoro! Čače, polokhe ka ovel e kamilake te nakhel maškar o kan e suvijakoro, nego e barvaleske te khuvel ko carstvo e Devleskoro.”
A o manuša so šunge akava pučle: “Togaš, koj šaj te spasinel pe?”
O Isus odgovoringja lenge: “Akavaj nešto so o manuša našti te keren, ama o Devel šaj kerela sa.”
O Petar vakergja leske: “Akje, amen mukhlem sa hem alem pala tute.”
A o Isus phengja: “Čače phenava tumenge, sekoj so ka mukhel po kher, ili pe romna, ili pe phralen, ili pe dade hem pe daja ili pe čhaven bašo carstvo e Devleskoro, ka dobinel poviše adalestar so mukhla ko akava sveto hem ka dobinel o večno životo ko sveto so avela.”
O Isus trito puti vakerela bašo po meribe
O Isus cidingja ki strana e dešuduje učenikon hem phengja lenge: “Akje, džaja ko Erusalim. Adathe ka phergjol sa soj pišimo taro prorokija bašo o Čhavo Manušeskoro. Ka ovel predajmo e manušenge so nane Evreja. Ola ka asan leske, ka uvredžinen le hem ka čhungaren le, ka kamšikujnen le hem ka mudaren le, ama ko trito dive ka uštel taro mule!”
O učenikija ništo na svatinge adalestar so o Isus vakergja lenge. O značenje adale lafengoro sine garavdo lendar, a ola na svatinge baši so kerela pe lafi.
O Isus sasljarela e korole manuše
Koga o Isus alo paše uza ko Erihon, ko drumo bešela sine jekh korolo manuš so mangela peske sine. Koga šungja sar o narodo nakhena, pučlja soj adava. I vakerge leske: “O Isus taro Nazaret nakhela.”
Togaš o korolo manuš vikingja: “Isuse, Čhavo e Davideskoro, ov milostlivo prema mande!”
A okola so phirena sine anglo Isus zaptinena le sine te na vikinel, ama ov poviše vikinela sine: “Čhavo e Davideskoro, ov milostlivo prema mande!”
O Isus ačhilo hem zapovedingja te anen le ki leste e korole manuše. Koga ange le uza leste, o Isus pučlja le: “So mangeja te kerav tuke?”
O korolo manuš odgovoringja: “Gospode, mangava te dikhav.”
I o Isus vakergja leske: “Dikh! Ti vera sasljargja tut.”
O manuš odma dikhla hem gelo palo Isus, slavindor e Devle. Koga sa o manuša dikhle adava, slavinge e Devle.
Macedonian Arli Romani. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.