1 Timotej 4

Nesave ka ciden pe tari vera

1O Duho jasno vakerela deka ko posledna vremija nesave ka ciden pe tari vera, hem ka džan palo hovavne duhija hem demonsko učibe. 2Asavko učibe avela taro dujmujale hem taro hovavne kaskiri sovest tani rumimi. 3Ola na mukhena e manušen te ženinen pe hem vakerena lenge te na han nesavo hajbe so o Devel kergja le te ovel primimo so blagodarnost okolenge so verujnena hem so pendžarena o čačipe. 4Soske sa so o Devel kergja i šukar, hem ništo nane frdibaske, ako priminela pe so blagodarnost, 5adaleske soj očistimo e Devleskere lafeja hem molitvaja.

O šukar sluga e Isuse Hristoskoro

6Ako sikaveja akava e phralen, ka ove šukar sluga e Isuse Hristoskoro, parvardo e čačutne veraja hem taro šukar učibe palo so džaja. 7A naš taro bidevleskere hem e phurengere prikazne, nego vežbin tut e Devleske ko drumo. 8Soske i vežba e teloskiri anela nesavi tikni korist, ama e Devleskiri tani korist bašo sa, soske vetinela nagrada hem bašo akava hem bašo okova životo so avela.

9Akje jekh čačutno lafi so zaslužinela te ovel prifatimo. 10Soske bašo akava mučinaja amen hem borinaja amen, soske nadinaja amen ko dživdo Devel, koj tano Spasiteli sa e manušenge, a posebno okolenge so verujnena ki leste.

11Naredin hem sikav len akala bukja. 12Nikoj te na dikhel tut potele adaleske so sijan terno, nego ov primer e vernikonge ko vakeriba, ko ponašiba, ko mangipe, ki vera hem ki čistota. 13Dži kote avava, posvetin tut ko čitiba o Sveto Lil anglo vernikija, ko propovediba hem ko siklojba. 14Ma mukh to daro, so sine tuke dendo preku o proroštvo koga o starešine čhige pe vasta upro tute.

15Ker sa akava, posvetin tut celosno akaleske, te šaj sarine te dikhen deka džaja anglal. 16Pazin to životo hem o učibe. Ačhov ko adava, soske ako kereja adava, ka spasine tut hem okolen so šunena.