1 Jovan 4

E duhon trebela te proverinen pe

1Me mangle, ma verujnen ko sekova duho, nego proverinen e duhon dali tane e Devlestar, soske but hovavne prorokija pojavisalile ko sveto. 2Palo akava šaj te pendžaren e Devleskoro Duho: sekova duho so priznajnela deka o Isus Hristos alo ko telo, ov tano taro Devel. 3Ama sekova duho so na priznajnela e Isuse, ov nane taro Devel, nego taro antihrist, kaske so šungjen deka avela, a akana tano više ko sveto.

4Me čhave, tumen sijen e Devlestar hem pobedingjen len, soske okova soj ki tumende tano pobaro okolestar soj tano ko sveto. 5O hovavne prorokija tane taro sveto, adaleske vakerena sar o sveto so vakerela hem o sveto šunela len. 6Amen sijem e Devlestar hem koj pendžarela e Devle, šunela amen, a koj nane e Devlestar, na šunela amen. Agjar pendžaraja kova tano o Duho e čačipaskoro, a kova tano o duho e hovajbaskoro.

O Devel i mangipe

7Me mangle, ajde te manga amen jekh jekheja, soske o mangipe tano e Devlestar. Sekoj so mangela, ov tano bijamo e Devlestar hem pendžarela e Devle. 8Koj na mangela, na pendžarela e Devle, soske o Devel tano mangipe. 9Agjar o Devel sikavgja po mangipe amenge: bičhalgja pe jekhebijame Čhave ko sveto te šaj živinaja preku leste. 10O mangipe tano akava: na deka amen zamanglem e Devle, nego ov zamangla amen hem bičhalgja pe Čhave sar žrtva bašo oprostiba amare grevija. 11Me mangle, ako o Devel doborom zamangla amen, togaš amen da sijem dužna te manga amen jekh jekheja. 12Nikoj nikat na dikhla e Devle; ama ako mangaja amen jekh jekheja, o Devel živinela ki amende hem leskoro mangipe tano celosno ki amende.

13Palo akava džanaja deka živinaja ki leste hem ov ki amende: dengja amen taro po Duho. 14Hem amen dikhlem hem svedočinaja deka o Dad bičhalgja e Čhave te ovel Spasiteli e svetoskoro. 15Koj priznajnela deka o Isus tano o Čhavo e Devleskoro, o Devel živinela ki leste hem ov ko Devel. 16A amen pendžargjem hem verujngjem ko mangipe so o Devel isi le prema amende.

O Devel tano mangipe. Koj živinela ko mangipe, živinela ko Devel hem o Devel ki leste. 17Agjar o mangipe maškar amende ovela celosno, te šaj te ovel amen hrabrost ko sudno dive; adaleske so, savo tano o Isus, asavke sijem amen da ko akava sveto.

18Ko mangipe nane dar, nego o celosno mangipe cidela i dar. Okova so darala, isi le dar tari kazna, so značinela deka nane celosno ko mangipe.

19Amen mangaja soske o Devel prvo zamangla amen. 20Ako nekoj phenela: “Mangava e Devle”, a mrzinela pe phrale, ov tano hovavno. Soske koj na mangela pe phral, kas so dikhela, ov našti te mangel e Devle kas so na dikhela. 21Hem dengja amen akaja zapoved: koj mangela e Devle, mora te mangel pe phrale da.