Romani Arli Bible 2024
1. Mojsije 35
O Jakov palem ano Betel
O Devel phenđa e Jakovese: “Spremin tut, pa dža ano Betel hem adari živin. Adari vazde žrtveniko e Devlese kova mothovđa pe će kad našljan te phralestar e Isavestar.”
O Jakov phenđa ple čherutnenđe hem sarijenđe kola inele oleja: “Odbacinen e abanđijengere devlen saven isi tumen tumencar, očistinen tumen hem urjaven aver šeja, a onda hajde ano Betel. Adari ka vazdav žrtveniko e Devlese kova uslišinđa man kad injumle ani nevolja hem kova inele mancar ko drom saveja dželjum.”
Ađahar on predinde e Jakovese sa e abanđijengere devlen save inolen hem o čenja save akharde ko kana, a o Jakov adava parunđa talo hrast uzalo Sihem. Tegani lelje te džan, a o Devel ćerđa te dolel i dar sa e dizutnen taro avera dizja okolo lende, pa niko na progoninđa e Jakovesere čhaven.
O Jakov hem sa o narodo kova inele oleja resle ani Luz, adavai o Betel, ano Hanaan, kaj ov vazdinđa žrtveniko. Ov adava than vičinđa El Betel,1 adalese so adari o Devel mothovđa pe lese kad našlo taro plo phral.
Tegani muli i Debora, e Revekakiri sluškinja koja barjarđa la, pa parunde la po tele taro Betel, talo hrast savo vičinde Alon Bahut.2
Palo adava so o Jakov irinđa pe taro Padan Aram, o Devel palem mothovđa pe lese hem blagoslovinđa le.
O Devel phenđa lese: “Vičineja tut Jakov, ali naka vičine tut više ađahar, nego to anav ka ovel Izrael.”
Ađahar o Devel dinđa le anav Izrael.
O Devel pana phenđa lese: “Me injum o Devel, kova sa šaj. Ov plodno hem množin tut. Tutar ka ikljol narodo hem but narodija, hem ka oven carija maškaro te potomci. I phuv savi dinđum e Avraamese hem e Isaakese, dava la hem tuće, a ka dav la hem te potomstvose.”
Tegani o Devel dželo olestar taro adava than ko savo vaćerđa oleja.
O Jakov ispravinđa jekh bar sar stubo ko than ko savo o Devel vaćerđa oleja, pa upro leste čhorđa mol hem ulje sar žrtva e Devlese. O than ko savo o Devel vaćerđa oleja, o Jakov vičinđa Betel.
E Rahiljakoro meriba
Tegani o Jakov hem lesere manuša džele taro Betel. Kad inele pana hari paše đi i Efrata, i Rahilja lelja te bijani, a inola but dukha.
Dok inola dukha, i babica phenđa laće: “Ma dara, adalese so hem akava ka ovel čhavo.”
A sar cidela ine duša te merel, dinđa ple čhavese anav Ven Oni,3 ali lesoro dad dinđa le anav Venijamin.4
Ađahar i Rahilja muli, pa parunde la ko drom nakori Efrata, adavai ano Vitlejem. O Jakov čhivđa stubo oto bar upro lakoro grobo hem adava stubo đi avdisutno dive označini e Rahiljakoro grobo. Tegani o Izrael dželo ple dromeja hem vazdinđa plo šatori oti aver strana oti kula Eder.
Dok o Izrael živinđa ano adava krajo, o Ruvim dželo hem suća e Bilhaja, ple dadesere romnjaja koja inele ropkinja, a o Izrael dodžanđa zako adava.
E Jakovesere čhave
E Jakove ine dešu duj čhave.
E Lijakere čhave inele: o Ruvim, e Jakovesoro prvobijando čhavo, o Simeon, o Levije, o Juda, o Isahar hem o Zavulon.
E Rahiljakere čhave inele: o Josif hem o Venijamin.
O čhave e Rahiljakere sluškinjakere e Bilhakere inele: o Dan hem o Neftalim.
O čhave e Lijakere sluškinjakere e Zilpakere inele: o Gad hem o Asir.
Adavai e Jakovesere čhave kola bijandile lese ano Padan Aram.
E Isaakesoro meriba
O Jakov irinđa pe koro plo dad o Isaak ano Mamre, ano Kirjat Arba, adavai o Hevron, kaj živinde hem o Avraam hem o Isaak. O Isaak živinđa šelu oftovardeš berš. Živinđa but berša hem mulo ano plo baro hem bahtalo phuripe, pridružinđa pe ple pradadenđe, pa lesere čhave o Isav hem o Jakov parunde le.
Source notes (4)
- Footnote El Betel so značini: “O Devel e Betelesoro.”
- Footnote Alon Bahut so značini: “O hrast, uzalo savo rovela pe.”
- Footnote Ven Oni so značini: “O čhavo mle tugakoro.”
- Footnote Venijamin so značini: “O čhavo mle desnone vastesoro” ili “O čhavo mle bahtalipnasoro.”
Romani Arli Bible 2024. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.