Romani Arli Bible 2024
1. Mojsije 29
O Jakov resela ano Haran
Palo adava o Jakov radujindoj nastavinđa plo drom hem reslja ani phuv kaj živinena o istočna narodija. Otojekhvar ano polje dikhlja bunari uzalo saveste pašljona trin stadija bakre. Taro adava bunari o bakre pijena ine pani, a ko otvor e bunaresoro inele navalime baro bar. Kad bi čedela pe ine sa o stado, o pastirija bi cidena o bar oto otvor e bunaresoro hem bi dena pani e bakrenđe. Palo adava bi irinena o bar ko lesoro than, ko otvor e bunaresoro.
O Jakov pučlja len: “Kotar injen, phraljalen?”
A on phende lese: “Oto Haran.”
O Jakov palem pučlja len: “Pendžarena li e Lavane, e Nahoresere unuko?”
A on phende lese: “Oja, pendžaraja le.”
Tegani o Jakov palem pučlja len: “Sari ov?”
A on phende lese: “Šukari. Ače lesiri čhaj i Rahilja avela ple stadoja.”
O Jakov phenđa: “Ače, panai dive. Nane o vreme i stoka te čedel pe zako odmor. Den pani e bakrenđe, pa irinen len te han čar.”
On phende lese: “Našti te ćera adava sa đikote sa o stado na čedela pe akate hem đikote na cidela pe o bar oto otvor e bunaresoro. Tek palo adava šaj te da pani e bakrenđe.”
Sar ov pana vaćeri ine olencar, i Rahilja ali ple dadesere bakrencar, adalese so oj arakhi ine e bakren. Kad o Jakov dikhlja e Rahilja, ple ujkosere e Lavanesere čhaja, hem e Lavanesere bakren, alo đi o bunari hem cidinđa o bar oto lesoro otvor, pa dinđa ple ujkosere bakren te pijen pani. Tegani o Jakov čumudinđa e Rahilja, pa glasoja runđa. Kad phenđa laće dai ov čhavo lakere dadesere phenjakoro e Revekakoro, i Rahilja prastandili te vaćeri adava ple dadese.
Kad o Lavan šunđa ple phenjakere čhavestar e Jakovestar, prastandilo nakoro leste, pa zagrlinđa le hem čumudinđa le, pa legarđa le pese ko čher.
Kad o Jakov phenđa lese sa so ulo, o Lavan phenđa: “Tu čače injan mlo rat.”
O Jakov ženini pe e Lijaja hem e Rahiljaja
Palo adava so o Jakov ačhilo masek dive koro Lavan, o Lavan phenđa lese: “Zar ka ćere maje buti za džabe adalese so injan me phenjakoro čhavo? Vaćer maje kobor te platinav tut?”
A e Lavane ine duj čhaja. E phurederakoro anav inele Lija, a e tiknederakoro Rahilja. E Lija ine šuže jaćha, a e Rahilja ine šužo muj hem telo.
O Jakov zavolinđa e Rahilja, pa phenđa: “Ka ćerav buti tuće efta berš zaki ti tikneder čhaj i Rahilja.”
O Lavan phenđa: “Po šukari te dav la tuće nego averese. Ačhov kora mande.”
Ađahar o Jakov ćerđa buti zaki Rahilja efta berš, a sa adala berša olese ine sar nekobor dive, adalese so but volinđa la.
Tegani o Jakov phenđa e Lavanese: “De man mla romnja, te sovav olaja. Adalese so nakhino o vreme oti mli buti.”
O Lavan čedinđa sa e manušen oto adava than ko hajba hem ko piba. Ali, kad peli i rat, ov lelja pla čhaja e Lija hem legarđa la koro Jakov, pa o Jakov suća olaja. O Lavan pla ropkinja e Zilpa dinđa pla čhajaće e Lijaće te ovel lakiri sluškinja. Sabale kad dislilo, o Jakov dikhlja dai adava i Lija!
O Jakov phenđa e Lavanese: “So ćerđan maje akava? Zar na ćerđum će buti zaki Rahilja? Sose prevarinđan man?”
O Lavan phenđa lese: “Akate amende nane o adeti i tikneder čhaj te del pe angleder i phureder. Završin akava kurko o bijav e Lijaja, pa ka da tut hem e Rahilja, a tu te ćere buti zako olaće pana efta berš.”
I o Jakov ćerđa ađahar. Kad adava kurko završinđa o bijav e Lijaja, o Lavan dinđa le pla čhaja e Rahilja romnjaće, a pla ropkinja e Bilha dinđa e Rahiljaće te ovel lakiri sluškinja. Ađahar o Jakov suće hem e Rahiljaja. Ola volinđa više nego e Lija, pa ćerđa buti koro Lavan pana efta berš.
E Jakovesere čhave
O GOSPOD dikhlja da i Lija nane volime, pa dinđa la te bijani čhaven, dok i Rahilja inele nerotkinja.
I Lija ačhili khamni hem bijanđa čhave hem dinđa le anav Ruvim,1 adalese so phenđa: “O GOSPOD dikhlja mli nevolja hem akana mlo rom ka volini man.”
I Lija palem ačhili khamni hem bijanđa čhave, pa phenđa: “Adalese so o GOSPOD šunđa da na injum volime, dinđa man hem akale čhave.” Adalese dinđa le anav Simeon.2
Tegani palem ačhili khamni hem bijanđa čhave, pa phenđa: “Akana mlo rom ka povezini pe mancar, adalese so bijanđum lese trine muršen.” Adalese dinđa le anav Levije.3
Oj pana jekhvar ačhili khamni hem bijanđa čhave, pa phenđa: “Akava puti ka zahvalinav e GOSPODESE.” Adalese dinđa le anav Juda.4
Palo adava, nesavo vreme na bijanđa.
Source notes (4)
- Footnote Ruvim so značini: “Dikh – čhavoi!” A zvučini hem sar “Dikhlja mle nevolje.”
- Footnote Simeon so zvučini sar: “Okova kova šunela.”
- Footnote Levije so zvučini sar: “povezime.”
- Footnote Juda so zvučini sar: “zahvaliba.”
Romani Arli Bible 2024. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.