1. Mojsije 1

Sar o Devel stvorinđa o sveto

1Ano početak o Devel stvorinđa o nebo hem i phuv. 2I phuv inele bizo oblik hem čuči, hem i tomina učhari ine o hor pani, a o Duho e Devlesoro lebdini ine upro pani.

O prvo dive – o svetlost

3Tegani o Devel phenđa: “Nek ovel o svetlost!”

Hem ulo o svetlost. 4O Devel dikhlja dai o svetlost šukar hem razdvojinđa o svetlost oti tomina. 5O Devel vičinđa o svetlost “dive”, a i tomina “rat”.

I inele rat, hem inele sabale – adava inele o prvo dive.

O dujto dive – o nebo

6Tegani o Devel phenđa: “Nek ovel svod maškaro panja, te razdvojini o panja savei upre oto panja savei tele!”

7I o Devel ćerđa o svod hem razdvojinđa o panja talo svod oto panja upro o svod. I ađahar ulo. 8O Devel vičinđa o svod “nebo”.

I inele rat, hem inele sabale – adava inele o dujto dive.

O trito dive – o kopno hem o biljke

9Tegani o Devel phenđa: “Nek o panja savei talo nebo čeden pe ko jekh than hem nek mothoj pe o kopno!”

I ađahar ulo. 10O Devel vičinđa o kopno “phuv”, a o čedime panja “more”. I o Devel dikhlja dai adava šukar.

11Tegani o Devel phenđa: “Nek i phuv bijani biljke: biljke save dena seme hem kašta save bijanena plod ano savo isi seme palo pumare vrste ki phuv!”

I ađahar ulo. 12I tari phuv iklile biljke save dena seme, svako pali pli vrsta, hem kašta save bijanena plod ano savo isi seme, svako pali pli vrsta. I o Devel dikhlja dai adava šukar.

13I inele rat, hem inele sabale – adava inele o trito dive.

O štarto dive – o kham, o masek hem o čerenja

14Tegani o Devel phenđa: “Nek oven svetlija ko nebesko svod te razdvojinen o dive oti rat hem te označinen o odredime vremenja, o dive hem o berša! 15Hem nek o svetlija ko nebesko svod osvetlinen i phuv!”

I ađahar ulo. 16O Devel stvorinđa duj bare svetlija: o po baro svetlo te upravini e diveja hem o po tikoro svetlo te upravini e raćaja. Stvorinđa hem o čerenja. 17O Devel čhivđa sa adala svetlija ko nebesko svod te osvetlinen i phuv, 18te upravinen e diveja hem e raćaja hem te razdvojinen o svetlost oti tomina. I o Devel dikhlja dai adava šukar.

19I inele rat, hem inele sabale – adava inele o štarto dive.

O pandžto dive – o maćhe hem o čiriklja

20Tegani o Devel phenđa: “Nek o panja oven pherde e dživde bićencar hem nek o čiriklja letinen ko nebo, upreder i phuv!”

21I o Devel stvorinđa e moresere bare stvorenja hem sa e dživde bićen save plivinena ano pani. Stvorinđa len palo lengere vrste, te pheren o panja. Stvorinđa hem sa e čirikljen palo lengere vrste. I o Devel dikhlja dai adava šukar.

22O Devel blagoslovinđa len hem phenđa: “Oven plodna hem množinen tumen hem pheren o panja e moresere! Hem nek o čiriklja množinen pe ki phuv!”

23I inele rat, hem inele sabale – adava inele o pandžto dive.

O šofto dive – o kopnena životinje hem o manuš

24Tegani o Devel phenđa: “Nek oti phuv ikljoven dživde bićija, svako pali pli vrsta: i stoka, okola so lazinena phuvjaja hem o divlja životinje oti svako vrsta!”

I ađahar ulo. 25O Devel stvorinđa divlja životinje pali olengiri vrsta, e stoka pali olengiri vrsta hem okolen so lazinena phuvjaja pali olengiri vrsta. I o Devel dikhlja dai adava šukar.

26Tegani o Devel phenđa: “Ana te ćera manuše pali amari slika, te ličini upra amende. Nek ovel le vlast upro maćhe savei ano more, upro čiriklja savei ko nebo, upri stoka, upri sa i phuv hem upro sa o stvorenja so lazinena phuvjaja.”

27I o Devel stvorinđa e manuše

pali pli slika.

Pali slika e Devlesiri

stvorinđa le.

Stvorinđa len

murše hem đuvlja.

28O Devel blagoslovinđa len hem phenđa lenđe: “Oven plodna hem množinen tumen, pheren i phuv hem čhiven la tali tumari vlast! Vladinen upro maćhe savei ano more hem upro čiriklja savei ko nebo hem upro sa o dživde stvorenja save kretinena ki phuv!”

29Tegani o Devel phenđa: “Ače, dava tumen ki sa i phuv svako biljka savi dela seme hem svako kaš savo bijani plod ano savo isi seme – nek oven tumenđe zako hajba. 30A zako sa o divlja životinje, zako sa o čiriklja ko nebo hem zako sa o stvorenja so lazinena phuvjaja – zako sa so ana peste isi le o dah e dživdipnasoro – dava sa o zelena biljke zako hajba.”

I ađahar ulo.

31Tegani o Devel dikhlja sa so stvorinđa hem sa adava inele but šukar.

I inele rat, hem inele sabale – adava inele o šofto dive.