Jestira 5

I Jestira vičini e Kserkse hem e Hamane ki gozba

1Ko trito dive i Jestira urđa pe ple carikane šeja hem terdini ano unutrašnjo boro oti carikani palata, angli e carosiri sala. A o caro bešela ine ko plo carikano presto ani sala, irime premalo udar. 2O caro tegani dikhlja e carica e Jestira sar terđola ano boro hem smilujinđa pe laće. O caro pružinđa e Jestiraće plo zlatno žezlo savo ine lese ko vas, pa oj ali paše hem pipinđa o vrh oto žezlo.

3Tegani o caro pučlja la: “So ulo, carice Jestiro? So mangeja? Mang hem ka dav tut sa so mangeja, pa i ekvaš oto mlo carstvo.”

4A i Jestira phenđa: “Tei o carose pali volja, nek avel avdive o caro e Hamaneja ki gozba savi pripreminđum lese.”

5O caro phenđa: “Phenen e Hamanese te siđari hem te ćerel adava so rodinđa i Jestira.”

Ađahar hem o caro hem o Haman ale ki gozba savi i Jestira pripreminđa.

6Sar pijena ine mol, o caro phenđa e Jestiraće: “Onda, savi ti molba? Ka ovel će uslišime. Hem so mangeja? Tei hem ekvaš oto carstvo, ka del pe će.”

7I Jestira phenđa: “Akavai mli molba hem okova so mangava: 8Te arakhljum milost anglo caro, hem tei e carose pali volja, te uslišini mli molba hem te ćerel okova so mangava, nek o caro hem o Haman avena hem tejsa ki gozba savi ka pripreminav olenđe. Tegani ka phenav e carose so mangava lestar.”

E Hamanesiri zavera protiv o Mardohej

9Adava dive o Haman iklilo bahtalo hem raspoložime. Ali, kad dikhlja ki kapija e carosiri e Mardoheje hem da ov na uštela anglo leste hem da na darala olestar, pherdilo holi premalo leste. 10A palem, o Haman suzdržinđa pe hem na mothovđa javno pli holi. Dželo čhere hem vičinđa ple amalen hem pla romnja e Zereša. 11Anglo lende hvalinđa pe ple barvalipnaja, ple bute čhavencar hem sa okoleja saveja o caro mothovđa lese čast hem so vazdinđa le upreder sa o šerutne hem e carosere službenici.

12Hem pana phenđa lenđe: “Hem adava nane sa, i carica i Jestira samo man vičinđa te ovav e caroja ki gozba savi pripreminđa. A hem tejsa injum vičime te džav e caroja koro late. 13Ali ništa adalestar na dela man zadovoljstvo sa dok dikhava okole Jevrejco e Mardoheje sar bešela ki kapija e carosiri.”

14Lesiri romni i Zereš hem sa lesere amala phende lese: “Naredin nek vazden o vešala te oven uče bišu pandž metarija, pa sabale rode e carostar te obesinen upro lende e Mardoheje. Tegani radujindoj dža e caroja ki gozba.”

E Hamanese sviđinđa pe adava predlog pa naredinđa te ćeren pe o vešala.