Rô-ma 8:1

1Kơyua yơu nữn, tũq nĩ ôh hũ kaya ngãq dlàiq ga dơgrữq mơnuĩh dòq dơlãp Yàc Dõc Pơ-tlah Je-su. 2Kơyua voh-va Vơngãq Sơđah kaya hadiuq dơlãp Yàc Dõc Pơ-tlah Je-su hũ song dõc suãq hlãq tlah mưng voh-va dlàiq dơnũh sì kaya mơtai. 3Vruãq voh-va ôh ngãq jỡc kơyua mưng kađòc rơlo rùp ngãq ga lơduh lơmuỡn nữn Yàc Pô Lơngĩq song ngãq. Pitrai song pơđar Anàq Pitrai trôh dơlãp wãc rơsì drưh yơu rơlo rùp dlàiq dơnũh pioh ngãq kaya sơdua dlàiq, sì Pitrai song chahrơna dlàiq dơnũh dơlãp rơlo rùp. 4Pitrai ngãq yơu nữn pioh ga dơgrữq kaya tơpãq rĩng voh-va hũ ngãq wil tãl dơlãp pơnõq drơi, mơnuĩh ôh yàp tui rơlo rùp, nữn tui Vơngãq Sơđah. 5Mơnuĩh hadiuq tui rơlo rùp iãq sơnơng dơlãp dơgrữq kaya pơweh sì rơlo rùp, nữn mơnuĩh hadiuq tui Vơngãq Sơđah iãq sơnơng dơlãp dơgrữq kaya pơweh gah Vơngãq Sơđah. 6Kơyua dlò sơnơng pơweh gah rơlo rùp nữn mơtai, dòq dlò sơnơng pơweh gah Vơngãq Sơđah nữn hũ kaya hadiuq sì kaya dadu lơngai. 7Nữn la kơyua kaya sơnơng lơđãp pơweh gah rơlo rùp jơdrãq sì Yàc Pô Lơngĩq, kơyua nhũ ôh duh huaĩq voh-va Yàc Pô Lơngĩq hũ, kơyua nhũ ôh tũq halơi duh huaĩq jỡc. 8Mơnuĩh hadiuq tui rơlo rùp ôh tũq halơi ngãq siàp hatai Yàc Pô Lơngĩq. 9Bôh làiq yơu nữn, pơnõq adơi sơai ôh dòq dơlãp rơlo rùp, nữn la dơlãp Vơngãq Sơđah, mơyah làiq iỡuq viãq yơu Vơngãq Sơđah Yàc Pô Lơngĩq hũ hadiuq dơlãp pơnõq adơi sơai. Dòq mơnuĩh halơi ôh hũ Vơngãq Sơđah Yàc Dõc Pơ-tlah hũ, nữn mơnuĩh nữn ôh pơweh sì Pitrai. 10Mơyah làiq Yàc Dõc Pơ-tlah dòq dơlãp adơi sơai, nữn rùp phàp mơtai pơweh sì dlàiq dơnũh, nữn suàt vơngãq vloh hadiuq pơweh sì kaya tơpãq dãng. 11Mơyah làiq Vơngãq Sơdah Pitao song ngãq ga Yàc Je-su hadiuq wỡq mưng kaya mơtai hadiuq dơlãp pơnõq adơi sơai, nữn Pitao song ngãq ga Yàc Dõc Pơ-tlah Je-su hadiuq wỡq mưng kaya mơtai nữn kung ròq gơnang mưng Vơngãq Sơdah Pitrai dòq haduiq dơlãp adơi sơai sì vrơi kaya haduiq ga rùp phàp ròq mơtai pơnõq adơi sơai hũ.

12Yơu nữn, pa-thơu pơnõq adơi sơai, pơnõq drơi ôh kađòc srẽ sì rơlo rùp pioh iỡuq hadiuq tui rơlo rùp. 13Kơyua mơyah làiq pơnõq adơi sơai hadiuq tui rơlo rùp, nữn adơi sơai ròq mơtai, yơu nữn dòq mơyah làiq adơi sơai gơnang Yàc Vơngãq ngãq pa-mơtai dơgrữq vruãq pơweh sì rơlo rùp, nữn adơi sơai ròq hũ hadiuq. 14Dơgrữq mơnuĩh halơi hũ Vơngãq Sơdah Yàc Pô Lơngĩq dui-va, nữn la anàq Yàc Pô Lơngĩq hũ. 15Kơyua pơnõq adơi sơai ôh tồq mãq suàt vơngãq mơnuĩh ngãq halỗt hũ tồq vloh iỡuq tơtơh huaĩq. Pa-vlữq wỡq, pơnõq adơi sơai song tồq mãq hũ Vơngãq Sơđah ngãq jỡc anàq ròc, gơnang mưng nữn pơnõq drơi iơu: “A-ba, Ama!” 16Rùp phuỗt Vơngãq Sơđah ngãq chưng ga suàt vơngãq pơnõq drơi làiq pơnõq drơi la anàq tơcho Yàc Pô Lơngĩq. 17Mơyah làiq pơnõq drơi la anàq tơcho, nữn pơnõq drơi kung la mơnuĩh patui; mơnuĩh patui Yàc Pô Lơngĩq, nữn la mơnuĩh patui sigỡuq sì Yàc Dõc Pơ-tlah, mơyah làiq pơnõq drơi ãt dleh dlàr sigỡuq sì Pitrai, tồq kung hũ kaya gơhluh sigỡuq sì Pitrai.

18Kơyua hlãq sơnơng làiq dơgrữq kaya pơđìq pơđua dơlãp rài nĩ ôh đang mang pa-mơyơu sì kaya gơhluh ròq hũ ràc tơviãq ga pơnõq drơi. 19Dơgrữq kaya chrơng pajỡc mơ-ôh dòq chơkhãq chàc anàq tơcho Yàc Pô Lơngĩq hũ ràc pa-tơviãq. 20Kơyua dơgrữq kaya song ãt wãc rơsì kaya sơnơng lơhiãq soh, ôh iỡuq kơyua mưng hũ hatai ngãq krơi nhũ, nữn kơyua Pitao pagùq pơ-èp pơnõq nhũ iỡuq duh huaĩq, gãm sì kaya chơkhãq chàc gơjãp gơnĩt 21làiq pơnõq drơi ròq hũ dõc suãq tlah mưng kaya ngãq halỗt ga wãc rơsì vrũq lơmuĩq, sì hũ tồq mãq kaya lơnang lơnai dơlãp kaya gơhluh anàq tơcho Yàc Pô Lơngĩq hũ. 22Kơyua pơnõq drơi thơu làiq avih dơgrữq kaya chrơng pajỡc kung suãq yuà sì dleh dlàr dơlãp pơđìq pơđua trôh tãl harơi nĩ. 23Bôh làiq yơu nữn, ôh iỡuq mĩn yơu nữn, nữn gãm pơnõq drơi, mơnuĩh hũ voh chơtai akõq thũt Vơngãq Sơđah hũ — vloh rùp phuỗt pơnõq drơi kung suãq yuà dơlãp hatai, ãn sì tũq chơkhãq chàc gơnuar ngãq anàq ròc, nữn la kaya dơvuh sơlih rùp phàp drơi hũ. 24Kơyua pơnõq drơi hũ dõc pơ-tlah dơlãp kaya chơkhãq chàc gơjãp gơnĩt nĩ. Chơkhãq chàc nữn drơi iãq bôh nữn ôh iỡuq la kaya chơkhãq chàc. Kơyua mơnuĩh halơi vloh nao chơkhãq chàc kaya drơi song bôh? 25Nữn mơyah làiq pơnõq drơi chơkhãq chàc gơjãp gơnĩt mưng kaya drơi ôh-ka bôh, nữn la pơnõq drơi ãt ỡn chơkhãq chàc kaya nữn.

26Kung yơu nữn, Vơngãq Sơđah kung dõc dơlãp kaya lơduh lơmuỡn pơnõq drơi hũ. Kơyua pơnõq drơi ôh thơu vloh iơu lakơu yơu halơi, nữn rùp phuỗt Vơngãq Sơđah angui sãp suãq yuà ôh tũq halơi đơp tơviãq jỡc pơnuaĩq pioh iơu lakơu ala ga pơnõq drơi. 27Pitao iãq pơweh hatai anàq mơnuĩh thơu kaya sanơng Yàc Vơngãq hũ, kơyua Pitrai iơu lakơu ala ga mơnuĩh gơnuar pơđar sơđah tui hatai ưng Yàc Pô Lơngĩq hũ. 28Pơnõq drơi thơu làiq Yàc Pô Lơngĩq ngãq salơnuãq dơgrữq vruãq sigỡuq wỡq kơyua kaya kuơ màc ga mơnuĩh anĩt anar Pitrai, nữn la ga dơgrữq mơnuĩh hũ duỡt ruãh tui kaya ngãq gơnĩt Pitrai hũ. 29Kơyua mơnuĩh halơi Pitrai song thơu halơu, nữn Pitrai kung song ngãq gơnĩt ga pơnõq nhũ tơviãq jỡc drưh yơu sẽq vlai rùp anàq Pitrai hũ, pioh Anàq nữn tơviãq jỡc anàq kơchoa di khrãh avih adơi sơai. 30Sì mơnuĩh halơi Pitrai song ngãq gơnĩt hlơu lơĩh, nữn Pitrai kung song iơu jàq. Mơnuĩh Pitrai song iơu jàq, nữn Pitrai kung song angãn ga mơnuĩh nữn la tơpãq dãng, nữn Pitrai kung song ngãq ga gơhluh.

31Yơu nữn, pơnõq drơi ròq đơp yơu hayơu mưng vruãq nĩ? Mơyah làiq Yàc Pô Lơngĩq dõc pơnõq drơi, nữn mơnuĩh halơi jơdrãq sì pơnõq drơi wỡq? 32Pitao ôh iãq duman rùp phuỗt Anàq drơi, nữn song kơyua mưng avih tãl aràc pơnõq drơi nữn pơjao Anàq nữn, vloh ôh vrơi avih dơgrữq kaya sigỡuq sì Anàq nữn ga pơnõq drơi yơh? 33Mơnuĩh halơi ròq ngãq dlàiq mơnuĩh song hũ duỡt ruãh Yàc Pô Lơngĩq? Yàc Pô Lơngĩq la Pitao angãn tơpãq rĩng. 34Asơi la mơnuĩh ròq ngãq dlàiq? Yàc Dõc Pơ-tlah Je-su, Pitao song mơtai — sì rơlao nữn, song hadiuq wỡq, vloh nữn kung ãn dòq guh gah tơngãn hơnuãq Yàc Pô Lơngĩq, iơu lakơu ala ga pơnõq drơi. 35Mơnuĩh halơi ròq pa-chơlah pơnõq drơi tlah mưng kaya khiãng duman Yàc Dõc Pơ-tlah hũ? Iỡuq mĩn kaya pơđìq pơđua, kaya rũc rài, kaya mãq pakỡuq, kaya ờq lơpa, kaya dòq kalôh, kaya savữc rỡc, hẽla đao thõc? 36Yơu hũ pơnuaĩq wãq làiq:

“Kơyua mưng Pitrai nữn luôĩq harơi pơnõq anàq kađòc pa-mơtai.

Pơnõq anàq kađòc iãq iơu avo va nao ngãq rơlo.”

37Pa-vlữq wỡq, dơlãp dơgrữq harơi, pơnõq drơi hũ prãn pha rlao gơnang mưng Pitao anĩt duman drơi. 38Kơyua hlãq pãc-tui viãq bôh làiq la kaya mơtai, kaya hadiuq, mơnuĩh gơnrơh, pô apãt akõq, dơgrữq vruãq tũq nĩ, dơgrữq kaya ròq trôh, gơnuar prãn, 39gah dlòc, gah dơlãp, hẽla la avih dơgrữq kaya chrơng pajỡc halơi tơmo, kung ôh tũq halơi pa-chơlah pơnõq drơi tlah mưng kaya khiãng duman Yàc Pô Lơngĩq hũ, gãm dòq dơlãp Yàc Dõc Pơ-tlah Je-su, Yàc pơnõq drơi.