Akhàt Tơviãq Pơnuaĩq Dơđỡuq 1

1Kaya akhàt pa-tơviãq Yàc Dõc Pơ-tlah Je-su hũ nữn Yàc Pô Lơngĩq song vrơi ga Pitrai pioh akhàt tơviãq ga dơgrữq halỗt mơnãq Pitrai dơgrữq kaya hagĩq ròq tơviãq trôh savĩq sơmar. Pitrai song ràc tơviãq, hadơi sì tũq vrơi pa-thơu mưng mơnuĩh gơnrơh Pitrai hũ, pơyua trôh ga Jãng, halỗt mơnãq Pitrai hũ, 2la mơnuĩh ròq ngãq chưng mưng pơnuaĩq Yàc Pô Lơngĩq hũ sì pơnuaĩq ngãq chưng mưng Yàc Dõc Pơ-tlah Je-su, nữn la dơgrữq kaya drơi song iãq bôh. 3Lơngai ga mơnuĩh pơpoh sì mơnuĩh hmỡq dơgrữq pơnuaĩq sơrãq gơnuar hwơr nĩ hũ, vloh ròq rơmiãq dơgrữq kaya song hũ wãq dơlãp đỡn, kơyua tũq jơ song jẽq vloh.

4Jãng pơyua ga tơjuh sàc pơjũm sơđah pãq char A-si: Lakơu pơnõq adơi sơai hũ kaya anĩt sì kaya dadu lơngai mưng Pitao tũq nĩ hũ, song hũ, sì ròq ãn trôh, kung yơu mưng tơjuh vơngãq pãq anãq sơvan Pitrai hũ, 5sì mưng Yàc Dõc Pơ-tlah Je-su, la “Mơnuĩh ngãq chưng tui tơpãq”, “Pitao pajỡc hlơu avih” mưng kaya mơtai, sì “Pitao apãt akõq dơgrữq pitao pãq dlòc voh hlùq”. Pơweh mưng Pitao khiãng duman pơnõq drơi, song dõc suãq pơnõq drơi tlah mưng dlàiq dơnũh pơnõq drơi kơyua mưng dơrãh Pitrai, 6sì Pitrai song ngãq ga pơnõq drơi tơviãq jỡc sa lơgar, tơviãq jỡc dơgrữq mơnuĩh gơnuar pioh kaya duh talơvãt ga Yàc Pô Lơngĩq, Ama Pitrai hũ — lakơu kaya gơhluh sì gơnuar chơnuãq pơweh sì Pitrai tãl trôh gãm gãm. A-men.

7“Iãq dih, Pitrai trôh sigỡuq sì dơgrữq pỗc huãl,”

sì “dơgrữq mơta ròq tơlàq iãq bôh Pitrai,

sì gãm dơgrữq mơnuĩh song tlãuq Pitrai,”

sì dơgrữq apõc pơtiàt pãq dlòc voh hlùq “ròq sia chõq kơyua mưng Pitrai.”

Viãq iỡuq yơu nữn, A-men.

8Yàc la Yàc Pô Lơngĩq đơp: “Kơu la Al-pha sì Ô-me-ga, Pitao ròq hũ, song hũ, sì ròq trôh, Pitao Gơnuar Chơnuãq Apãt Akõq.”

9Hlãq la Jãng — mơnuĩh adơi sơai sì mơnuĩh pa-mơpha sigỡuq sì pơnõq adơi sơai mưng kaya pơđìq pơđua, palơi lơgar, sì kaya ãt ỡl dơlãp Yàc Je-su — hlãq ãn dòq pãq anĩh pỗc pơlao hũ angãn la Bat-mô kơyua mưng pơnuaĩq Yàc Pô Lơngĩq hũ sì pơnuaĩq ngãq chưng Yàc Je-su hũ. 10Dơlãp harơi Yàc hũ, hlãq dòq dơlãp Yàc Vơngãq Sơđah, sì hlãq hmỡq pãq hadơi drơi sa sãp đơp prõng yơu sãp gơdèt, 11làiq: “Hlãq wãq tơma pỗc sơrãq dơgrữq kaya hagĩq anàq bôh sì pơyua trôh tơjuh voh sàc pơjũm sơđah — pãq E-phe-sô, Si-miẽc-nơ, Bet-gãm, Thi-a-ti-rơ, Sat-đe, Phi-la-đen-phi, sì Lao-đi-xe.” 12Hlãq gơlàiq wỡq pioh iãq mững sãp nữn ãn dòq đơp sì drơi, vloh hadơi sì tũq gơlàiq wỡq, hlãq iãq bôh tơjuh tơkai apôi đeng mưng mữh, 13sì dòq di khrãh dơgrữq tơkai apôi đeng hũ Pitao drưh yơu Anàq Mơnuĩh, chồq ao ơtah trôh tơkai, gãm sì sa dãc talơi kơ-iãng mưng mữh hũ akãq rĩng di dơda. 14Akõq sì bồq Pitrai hũ nữn kòq ngãq yơu vlơu avo, kòq yơu pơlia, mơta Nhũ nữn drưh yơu dơlah apôi, 15tơkai Pitrai drưh yơu kơsuan sơdah blôh, ngãq yơu hũ pơngãq rơyiãq dơlãp agòq, sãp Pitrai hmỡq drưh yơu sãp yuà ia đuaĩq lũ, 16hũ tơjuh ia pitỗq pãq dlòc tơngãn hơnuãq Nhũ, sì hũ sa bẽq đao dua dơlah hluỡq chrĩc tơviãq mưng mơvah Pitrai, dòq mơta Pitrai sơdah yơu ia harơi gơchràq dơlãp tũq nhũ pơsàc sơdah avih. 17Tũq hlãq bôh Pitrai, hlãq lơvuh trỗt di tơkai Pitrai yơu mơnuĩh mơtai, vloh Pitrai chẽq tơngãn hơnuãq Pitrai hũ pãq dlòc hlãq, sì đơp: “Juơi huaĩq. Kơu la Pitao chơmrờp sì luôĩq hadơi, 18Kung la Pitao gãm hadiuq; Kơu song ãt mơtai, sì iãq nĩ, Kơu hadiuq tãl trôh gãm gãm ôh luôĩq, Kơu hũ anàq tlir kaya mơtai sì tơnãh ala. 19Kơyua yơu nữn, iỡuq wãq wỡq dơgrữq kaya anàq song bôh, dơgrữq vruãq ròq bôh sì dơgrữq kaya hagĩq jẽq tơviãq trôh hadơi dơgrữq vruãq nĩ. 20Nĩ la pơnuaĩq dơlãp dơđỡuq tơjuh voh ia pitỗq hũ nữn anàq song bôh dơlãp tơngãn hơnuãq Kơu hũ, gãm sì tơjuh tơkai apôi đeng mữh: Tơjuh ia pitỗq la dơgrữq mơnuĩh gơnrơh tơjuh sàc voh pơjũm sơđah hũ, sì tơjuh tơkai apôi đeng nữn la tơjuh voh sàc pơjũm sơđah.