Ma-thi-ơ 23

1Tũq nĩ, Yàc Je-su đơp sì tơpuôl vual vơla sì dơgrữq mơnuĩh mơgrũ Pitrai hũ, 2làiq: “Dơgrữq mơnuĩh gơnuar pơto voh-va sì mơnuĩh Pha-ri-si dòq guh pãq dlòc gìq Môi-se hũ. 3Yơu nữn, mơyah làiq dơgrữq kaya hagĩq pơnõq nhũ pơđar adơi sơai ngãq, nữn iỡuq ngãq sì rơmiãq jàc avih dơgrữq kaya. Nữn juơi ngãq tui dơgrữq vruãq pơnõq nhũ ngãq, kơyua pơnõq nhũ đơp nữn ôh ngãq. 4Pơnõq nhũ akãq dơgrữq kaya tơrãq sì kãn gui, vloh pơnõq nhũ dãq dơgrữq kaya nữn pãq dlòc vrã mơnuĩh tơmo, nữn mĩn pơnõq nhũ nữn ôh ưng chròq chơđiãc tơngãn pơnõq nhũ tơma. 5Pơnõq nhũ ngãq avih dơgrữq vruãq drơi pioh ga anàq mơnuĩh bôh. Kơyua pơnõq nhũ ngãq dơgrữq kaya ngãq pỗc sơrãq ga nhũ prong sì dơgrữq kanui ao nhũ ga atah sì lanơng. 6Pơnõq nhũ sơh dòq guh dơgrữq anĩh siàp dơlãp kaya bõc mơnhũm, sì dơgrữq anĩh prong mang dơlãp sàc pơtõm, 7ưng ga aràc iơu dơgrữq pơnuaĩq tơnĩa rơwãc pãq anĩh dràq, sì ưng vual vơla iơu drơi la ‘pôgrũ.’ 8Nữn adơi sơai ôh luơi ga anàq mơnuĩh iơu drơi la ‘pôgrũ,’ kơyua adơi sơai hũ mĩn sa pôgrũ, dòq avih tãl aràc nữn la adơi sơai sigỡuq. 9Sì juơi iơu mơnuĩh halơi pãq dun kơyua la ‘ama’ mưng pơnõq adơi sơai hũ mĩn sa Ama, dòq pãq dlòc lơngĩq. 10Kung juơi Juơi luơi ga asơi iơu drơi la ‘pôgrũ,’ mưng adơi sơai hũ mĩn sa — nữn la Yàc Dõc Pơ-tlah. 11Nữn mơnuĩh prong rlao avih dơlãp pơnõq adơi sơai ròq la ngãq halỗt ga adơi sơai. 12Asơi pồq drơi tơgùq ròq kađòc pa-trỗt, dòq asơi pơviar rùp drơi trỗt ròq hũ pồq tơgùq.

13Nữn dleh dlàr ga pơnõq ung, dơgrữq mơnuĩh gơnuar pơto voh-va sì mơnuĩh Pha-ri-si, la mơnuĩh vlữq lor! Kơyua mưng pơnõq ung krỡq bãc lơgar lơngĩq pãq anãq anàq mơnuĩh. Rùp phuỗt pơnõq ung ôh tơma dơlãp nữn, nữn pơnõq ung kung ôh luơi ga asơi yàp tơma jỡc pãq dơlãp. 14(Dleh dlàr ga pơnõq ung, dơgrữq mơnuĩh pơto voh va sì mơnuĩh Pha-ri-si, tơpuôl vlữq lor! Kơyua pơnõq ung bõc luỗt dơgrữq kamơi vlơu, ròq iơu lakơu sa vĩq suơi pơnuaĩq kơyua kanõh nữn, pơnõq ung ròq kađòc kaya ngãq gơnĩt dlàiq tơrãq rlao wỡq tơra.) 15Dleh dlàr ga pơnõq ung, dơgrữq mơnuĩh gơnuar pơto voh-va sì mơnuĩh Pha-ri-si, la mơnuĩh vlữq lor! Mưng pơnõq ung nao rah vãq tơsìq sì vãq tơnãh pioh ngãq ga sa aràc mơnuĩh tơma dơlãp jơlàt duh talơvãt, sì tũq pơnõq nhũ tui jơlàt duh talơvãt yơu nữn, nữn pơnõq ung vloh ngãq ga pơnõq nhũ tơviãq jỡc anàq tơcho anĩh tơnãh ala rlao dua bãc sì pơnõq ung.

16Dleh dlàr ga pơnõq ung, la dơgrữq mơnuĩh vùp va jơlàt, la mơnuĩh đơp: ‘Asơi tachơi sàc talơvãt nữn sơtãp rùp, nữn ôh hagĩq. Nữn asơi tachơi mữh sàc duh talơvãt hũ sì sơtãp rùp, nữn mơnuĩh nữn iỡuq kađòc pơnuaĩq sơtãp rùp drơi.’ 17Dơgrữq mơnuĩh gơla pơtòq sì vùp mơta! Kaya halơi la kuơ màc rlao, mữh hẽla sàc duh talơvãt ngãq ga mữh jỡc sơchih? 18Vloh: ‘Asơi tachơi ban talơvãt sì sơtãp rùp, nữn ôh hagĩq. Nữn asơi tachơi kaya pioh talơvãt pãq dlòc ban talơvãt sì sơtãp rùp, nữn mơnuĩh nữn iỡuq kađòc pơnuaĩq sơtãp rùp drơi.’ 19Dơgrữq mơnuĩh gơla pơtòq sì vùp mơta! Kơyua kaya halơi la kuơ màc rlao, kaya pioh talơvãt hẽla ban talơvãt ngãq ga kaya pioh talơvãt jỡc sơchih? 20Kơyua yơu nữn, asơi tachơi ban talơvãt sì sơtãp rùp mưng ban talơvãt sì avih dơgrữq kaya pioh talơvãt pãq dlòc ban nữn. 21Asơi tachơi sàc duh talơvãt sì sơtãp rùp, la tachơi sàc duh talơvãt sì avih Pitao dòq dơlãp sàc duh talơvãt sì sơtãp rùp. 22Dòq asơi tachơi lơngĩq sì sơtãp rùp la tachơi sơvan Yàc Pô Lơngĩq hũ sì avih Pitao dòq pãq dlòc sơvan sì sơtãp rùp pãq đỡn.

23Dleh dlàr ga pơnõq ung, dơgrữq mơnuĩh gơnuar pơto voh-va sì mơnuĩh Pha-ri-si, la mơnuĩh vlữq lor! Kơyua pơnõq ung pioh vơnah sa plôh iãm katrơu, iãm bơu sì iãm kaĩh, nữn vloh wơr dơgrữq kaya prong mang rlao avih kaya voh-va hũ la kaya tơpãq rĩng, hatai anĩt duman, sì hatai tơpãq dãng. Nữn la dơgrữq kaya sì viãq la pơnõq ung iỡuq ngãq, nữn kung ôh tũq halơi wơr dơgrữq vruãq dih. 24Dơgrữq mơnuĩh vùp va jơlàt dih, pơnõq ung suãq tơviãq sa drơi anàq ruai tìt, nữn luỗt anàq lac-đa!

25Dleh dlàr ga pơnõq ung, dơgrữq mơnuĩh gơnuar pơto voh-va sì mơnuĩh Pha-ri-si, la mơnuĩh vlữq lor! Kơyua pơnõq ung rao sơchih gah lơniãu chơwàt prìc, nữn gah dơlãp kaya nữn vloh vãq kaya ham ưng sì kaya ham bõc. 26Tơpuôl mơnuĩh Pha-ri-si pơnõq ung la mơnuĩh vùp mơta! Hlơu avih, iỡuq rao sơchih gah dơlãp chơwàt sì prìc, pioh ga gah lơniãu kung hũ sơchih.

27Dleh dlàr ga pơnõq ung, dơgrữq mơnuĩh gơnuar pơto voh-va sì mơnuĩh Pha-ri-si, la mơnuĩh vlữq lor! Kơyua pơnõq ung drưh yơu dơgrữq vơnẽq vah kòq, gah lơniãu iãq siàp mơkrơ, nữn pãq gah dơlãp vãq tơlàc mơnuĩh mơtai sì tãl dơgrữq kaya tasỡuq nrãc. 28Kung drưh yơu nữn, iãq gah lơniãu pơnõq ung la mơnuĩh tơpãq dãng pãq anãq anàq mơnuĩh, nữn gah dơlãp nữn la vãq kaya vlữq lor sì kaya dlàiq iãh mơsãc.

29Dleh dlàr ga pơnõq ung, dơgrữq mơnuĩh gơnuar pơto voh-va sì mơnuĩh Pha-ri-si, la dơgrữq mơnuĩh vlữq lor! Kơyua pơnõq ung vỡq vơnẽq ga dơgrữq mơnuĩh gơnuar hwơr sì ngãq pơsiàp vơnẽq mơnuĩh tơpãq dãng hũ. 30Pơnõq ung đơp: ‘Mơyah làiq pơnõq hlãq hadiuq dơlãp rài ung kõq drơi hũ, nữn pơnõq hlãq ôh ngãq salơnuãq sì pơnõq nhũ nữn ngãq hõq dơrah dơgrữq mơnuĩh gơnuar hwơr.’ 31Yơu nữn, pơnõq ung krơi ngãq chưng jơdrãq sì drơi, làiq drơi la anàq tơcho dơgrữq mơnuĩh song pa-mơtai dơgrữq mơnuĩh gơnuar hwơr. 32Pơnõq ung sì iỡuq ngãq vãq tãl dơgrữq kaya sơkãq sơnua dlàiq mơsãc ung kõq drơi hũ. 33Ơ pơjẽh anàq ala brơh dih, pơjẽh pơtiàt ala mơsãc, pơnõq ung ròq pleh tlah kaya ngãq dlàiq dơlãp tơnãh ala mưng pơnẽq halơi nĩ? 34Kơyua kanõh nữn, iãq dih, kơu ròq pơđar dơgrữq mơnuĩh gơnuar hwơr, mơnuĩh jãc rgơi sì mơnuĩh gơnuar pơto voh-va trôh sì pơnõq ung. Dơlãp dơgrữq aràc mơnuĩh pơnõq ung ròq pa-mơtai sì pỡc đĩn pãq dlòc kayơu pỡc, kung mưng pơnõq nhũ, nữn pơnõq ung ròq poh atòc dơlãp dơgrữq sàc pơtõm sì mãq pakỡuq mưng palơi nĩ trôh palơi dih. 35Kơyua yơu nữn pơlih dơrah ròq tôh wỡq pãq dlòc pơnõq ung avih dơgrữq dơrah ôh hũ dlàiq song tôh pãq ala hlùq, mưng dơrah A-bel hũ la mơnuĩh tơpãq dãng tãl trôh dơrah Sa-cha-ri hũ, anàq lakơi Ba-ra-chi, mơnuĩh song kađòc pơnõq ung pa-mơtai pãq khrãh sàc talơvãt sì ban talơvãt. 36Iỡuq viãq, kơu đơp sì pơnõq ung, avih dơgrữq vruãq nữn ròq tơviãq trôh ga pơjẽh pơtiàt hadơi nĩ.

37Ơ Je-ru-sa-lem, Je-ru-sa-lem, hã song pa-mơtai dơgrữq mơnuĩh gơnuar hwơr sì prah patơu dơgrữq mơnuĩh hũ pơđar trôh sì hã! Thơu hadùp bãc kơu ưng pơtõm anàq tơcho hã, yơu mơnũq vơnai pakrôp anàq nhũ pãq ala siãuq, nữn pơnõq hã ôh ưng! 38Iãq nĩ, sàc pơnõq ung hũ ròq kađòc tlàq luơi rơhàc dơgrữq kaya tơyah tơyai. 39Kơyua kơu đơp sì pơnõq ung thơu, pơlih pơnõq ung ngãq gơnĩt ròq ôh bôh kơu mưng nĩ tãl trôh tũq halơi pơnõq ung đơp: ‘Lơngai ga pitao mãq angãn Yàc sì trôh!’”