Ma-thi-ơ 15

1Tũq nữn, hũ dơgrữq mơnuĩh Pha-ri-si sì mơnuĩh gơnuar pơto voh-va mưng palơi Je-ru-sa-lem trôh pãp Yàc Je-su. Pơnõq nhũ tơnĩa: 2“Kơyua hayơu dơgrữq mơnuĩh mơgrũ pôgrũ hũ ngãq sỗq dơgrữq adãt adia mơnuĩh mưng kal? Kơyua mưng tơpuôl nhũ ôh rao tơngãn tũq bõc bẽn.” 3Nữn Pitrai hẽ wỡq sì pơnõq nhũ: “Dòq pơnõq ung hayơu vloh kơyua mưng dơgrữq adãt adia drơi hũ nữn ngãq sỗq kaya pơđar-va Yàc Pô Lơngĩq hũ? 4Kơyua Yàc Pô Lơngĩq hũ pơto akhàt: ‘Iỡuq duh huaĩq ami ama anàq hũ,’ sì ‘Asơi chơ-ua ama hẽla ami ròq iỡuq mơtai.’ 5Nữn pơnõq ung vloh đơp: ‘Mơnuĩh halơi đơp sì ama hẽla ami drơi làiq: “Mơyah làiq kaya hagĩq mưng anàq hũ pơlih hũ kua mang ga ami ama kaya nữn la angui dãt pioh padỡc ga Yàc Pô Lơngĩq,”’ 6nữn mơnuĩh nữn viãq la ôh chàc ki ngãm ama drơi. Yơu nữn, pơnõq ung song tlàq luơi pơnuaĩq Yàc Pô Lơngĩq kơyua mưng adãt adia mơnuĩh sơđãq drơi hũ. 7Mơnuĩh vlữq lor dih! E-sai song đơp gơnuar hwơr iỡuq viãq mưng pơnõq ung, tũq đơp làiq:

8‘Vual vơla nĩ sơ-uỗt mơyòp kơu mưng mơvah chơbuai,

nữn hatai pơnõq nhũ viãq dòq atah dì Kơu.

9Nữn pơnõq nhũ duh talơvãt Kơu ôh hũ kuơ,

kơyua pơnuaĩq pơnõq nhũ pơto mĩn la dơgrữq kaya voh-va anàq mơnuĩh hũ.’”

10Vloh Pitrai iơu tơpuôl vual vơla trôh, sì đơp sì pơnõq nhũ: “Iỡuq hmỡq sì thơu pãc: 11Ôh hũ kaya halơi mưng lơniãu tơma dơlãp chơbuai ngãq tasỡuq nrãc ga sa aràc mơnuĩh, nữn ngãq yơu dơgrữq kaya gĩq mưng chơbuai tơviãq, nữn la kaya ngãq tasỡuq nrãc ga mơnuĩh nữn.” 12Tũq nữn, dơgrữq mơnuĩh mơgrũ trôh drơ sì Yàc Je-su: “Pôgrũ thơu lơĩh vloh dơgrữq mơnuĩh Pha-ri-si iãq kađòc đơp sơvĩl tũq pơnõq nhũ hmỡq pơnuaĩq nữn yơh?” 13Nữn Yàc Je-su đơp làiq: “Kayơu halơi sì Ama pôgrũ pãq dlòc lơngĩq ôh pơla nữn ròq kađòc vuĩq avih. 14Luơi ga nhũ vẽq! Pơnõq nhũ la dơgrữq mơnuĩh va jơlàt vùp mơta. Sì mơyah làiq mơnuĩh vùp dui va mơnuĩh vùp, nữn avih dua aràc ròq kađòc lẽq tơma dơlãp thòc.” 15Tũq nữn hũ drơ làiq, Pier drơ sì Yàc: “Lakơu ràc tơviãq pơnuaĩq gơtha ga pơnõq hlãq pơnuaĩq pa-mơyơu nữn.” 16Nữn Yàc Je-su đơp: “Pơnõq adơi sơai kung ka ôh thơu pãc yơh? 17Adơi sơai ôh ka bôh thơu pãc dơgrữq kaya hagĩq tơma dơlãp mơvah nữn trỗt tơma dơlãp tũc vloh hadơi nữn hũ va tơviãq dơlãp anĩh juãq dlai yơh? 18Nữn dơgrữq kaya tơviãq mưng chơbuai la tơviãq mưng dơlãp hatai, Kaya nữn la dơgrữq kaya ngãq tasỡuq nrãc anàq mơnuĩh. 19Kơyua mưng hatai tơviãq dơgrữq kaya sơnơng mơsãc, pa-mơtai mơnuĩh, kaya drì drõc, arĩh athãm, kaya tlẽq sơwah, ngãq chưng lor sì pơnuaĩq đơp sơvĩl. 20Nữn la dơgrữq kaya ngãq tasỡuq nrãc ga mơnuĩh, Nữn bõc ka ôh rao tơngãn ôh ngãq tasỡuq nrãc anàq mơnuĩh.”

21Vloh Yàc Je-su tơviãq tlah mưng nữn, sì nao tơma pãq phũm rơnuãi palơi Ti-rơ sì palơi Si-đôn. 22Sì dih, hũ sa aràc mơnuĩh kamơi vual vơla Ka-na-an, dòq dơlãp palơi nữn trôh, nhũ prõc sãp đơp làiq: “Talơvãt Yàc, Anàq pitao Da-vĩt, lakơu anĩt anar hlãq! Anàq kamơi hlãq kađòc kamlai ãp dleh dlàr uãn.” 23Nữn Yàc Je-su ôh hẽ wỡq sì nhũ sa pơnuaĩq halơi. Dơgrữq mơnuĩh mơgrũ trôh lakơu Pitrai, làiq: “Lakơu pôgrũ pơđar mơnuĩh kamơi nữn nao vẽq, kơyua nhũ miẽt iơu priãu gah hadơi pơnõq drơi.” 24Nữn Yàc Je-su đơp: “Kơu hũ pơđar trôh, mơyah làiq ôh iỡuq mĩn vrơi ga dơgrữq anàq avo sỗq gơprah sàc Is-ra-el hũ mĩn ôh.” 25Sì hadơi nữn trôh mơnuĩh kamơi nữn, aguãl ta-ồq trỗt pãq anãq Pitrai, drơ: “Ơ Yàc, lakơu dõc hlãq.” 26Tũq nữn Pitrai hẽ làiq: “Viãq ôh iỡuq tũq mãq bẽn anàq tơcho hũ nữn prah ga anàq asơu.” 27Mơnuĩh kamơi nữn drơ: “Viãq yơu nữn, ơ Yàc, nữn mĩn dơgrữq anàq asơu anàq kung hũ bõc dơgrữq tleh bẽn harô mưng ban pô hõq trỗt.” 28Yơu nữn, Yàc Je-su hẽ wỡq sì nhũ: “Ơ mơnuĩh kamơi dih voh-tui sơai prõc viãq. Vruãq ròq hũ tơviãq jỡc ga sơai tui yơu sơai ưng.” Anàq kamơi nhũ jỡc khơĩh dơlãp tũq jơ nữn.

29Yàc Je-su tơviãq tlah anĩh nữn nao trôh jẽq tơsìq Ga-li-le, nữn Pitrai đìq pãq dlòc chỡq vloh, sì dòq guh pãq đỡn. 30Nữn hũ dơgrữq tơpuôl vual vơla lũ trôh sì Pitrai, Pơnõq nhũ va tui dơgrữq mơnuĩh wuẽ wac, mơnuĩh vùp, mơnuĩh kuẽ kuẽt, mơnuĩh kamlo, sì lũ mơnuĩh kađòc ruãq tơmo. Pơnõq nhũ chẽq dơgrữq mơnuĩh nữn pãq anĩh tơkai Yàc Je-su sì Pitrai pasồq pakhơĩh ga pơnõq nhũ. 31Tơpuôl vual vơla mãq ngãq krơi viãq tũq pơnõq nhũ bôh mơnuĩh kamlo đơp jỡc, mơnuĩh kuẽ kuẽt jỡc khơĩh, mơnuĩh wuẽ wac yàp nao sì mơnuĩh vùp sơdah mơta. Pơnõq nhũ sơ-uỗt mơyòp Yàc Pô Lơngĩq Is-ra-el hũ.

32Yàc Je-su iơu dơgrữq mơnuĩh mơgrũ trôh sì đơp: “Pôgrũ anĩt anar vual vơla lũ nĩ kơyua pơnõq nhũ song dòq sigỡuq sì pôgrũ tlơu harơi vloh nữn ôh hũ kaya hagĩq bõc. Pôgrũ ôh ưng ga pơnõq nhũ nao wỡq tũc lơ-pa, huaĩq pơnõq nhũ pơlih lơ-pa gơlũc rah gah jơlàt.” 33Dơgrữq mơnuĩh mơgrũ drơ wỡq sì Pitrai: “Dơlãp blàc suà nĩ mưng halơi pơnõq drơi mãq lũ bẽn pioh vrơi ga tơpuôl vual vơla sì bõc tarơi yơh?” 34Yàc Je-su tơnĩa pơnõq nhũ: “Adơi sơai hũ hadùp voh bẽn?” Pơnõq nhũ drơ: “Tơjuh voh, sì hadùp drơi anàq akàt tìt.” 35Vloh yơu nữn, Yàc Je-su pơđar ga tơpuôl vual vơla dòq guh pãq hlùq. 36Pitrai mãq tơjuh voh bẽn sì hadùp drơi akàt, sì hadơi tũq ỡn ngai, Pitrai pẽq bẽn tơviãq vrơi ga mơnuĩh mơgrũ vloh. Sì dơgrữq mơnuĩh mơgrũ pa-phanh wỡq ga vual vơla. 37Avih tãl aràc bõc sì hũ tarơi tũc. Pơnõq nhũ duỡt pơtõm wỡq dơgrữq kaya bõc dòq lơveh hũ tơjuh vai vãq. 38Katih mơnuĩh bõc la pàq rơvơu mơnuĩh lakơi, ôh karhia mơnuĩh kamơi sì lơđeh tìt. 39Dơlãp tũq Yàc Je-su vrơi vual vơla nao wỡq sàc, sì Pitrai tơma dơlãp ahòq sì nao trôh pãq phũm Ma-ga-đan.