Mak 11:24

1Tũq pơnõq nhũ trôh Je-ru-sa-lem, tơma Be-pha-je sì Be-tha-ni, pãq chỡq Ô-li-ve, Yàc Je-su pơđar dua aràc mơnuĩh mơgrũ nao, 2Nữn đơp sì pơnõq nhũ làiq: “Iỡuq nao tơma palơi pãq anãq adơi sơai, mư dơlãp tũq tơma trôh pãq đỡn, adơi sơai ròq bôh sa drơi halang anàq kađòc akãq pãq đỡn, ka-ôh hũ asơi đìq pãq dlòc nhũ. Iỡuq tơleh nhũ, sì va nhũ mai ga pôgrũ. 3Mơyah làiq hũ asơi tơnĩa adơi sơai: ‘Hayơu pơnõq sơai ngãq yơu nữn?’ sì iỡuq drơ vẽq làiq: ‘Yàc ưng angui nhũ sì Pitrai ròq va pơyua nhũ pãq anĩh nĩ wỡq.’” 4Yơu nữn, pơnõq nhũ nao sì bôh halang anàq kađòc dòq akãq pãq bãc lơniãu gah jơlàt, nữn pơnõq nhũ tơleh talơi ga nhũ. 5Hũ tơkìq aràc dỡc pãq đỡn tơnĩa pơnõq nhũ: “Pơnõq ung tơleh talơi halang anàq nữn ngãq hagĩq lơĩh?” 6Pơnõq nhũ drơ wỡq yơu Yàc Je-su song hakơi, sì dơgrữq mơnuĩh nữn vrơi luơi ga pơnõq nhũ nao. 7Dua aràc mơnuĩh mơgrũ va halang anàq ga Yàc Je-su, vloh mãq ao làc pãq dlòc nhũ, pioh Yàc Je-su đìq dòq guh. 8Lũ mơnuĩh làc ao pơnõq nhũ tơviãq pãq jơlàt, hũ mơnuĩh tơmo chẽq thàt kayơu pơnõq nhũ song koh mưng blàc hama. 9Avih dơgrữq mơnuĩh nao hlơu Pitrai sì dơgrữq mơnuĩh tui hadơi priãu prõc:

“Hô-sa-na! Iỡuq sơ-uỗt mơyòp Pitao mãq angãn Yàc nữn trôh.

10Lơngai viãq ga lơgar ròq trôh ung kõq Đa-vit pơnõq drơi hũ!

Hô-sa-na pãq anĩh dlòc dloòng rlao avih!”

11Yàc Je-su tơma Je-ru-sa-lem, sì tơma sàc talơvãt, lơnhẽ mơta iãq avih dơgrữq kaya, tũq jơ song jẽq sồp rơyồp vloh, Pitrai tơviãq nao trôh Be-tha-ni sigỡuq sì sa plôh dua aràc mơnuĩh mơgrũ. 12Harơi hadơi, tũq pơnõq nhũ mai wỡq mưng Be-tha-ni, nữn Pitrai lơ-pa. 13Iãq bôh mưng atah sa bẽq kayơu vãl hũ lũ hlàq, Pitrai trôh pioh iãq pãq dlòc kayơu hũ voh lơĩq. Yơu nữn tũq trôh Pitrai bôh ôh hũ hagĩq mĩn hlàq soh, kơyua ka-ôh iỡuq la vlàt kayơu vãl. 14Yơu nữn Pitrai đơp sì kayơu vãl: “Ròq ôh tũq halơi hũ asơi bõc voh hã tơra.” Dơgrữq mơnuĩh mơgrũ hmỡq pơnuaĩq nữn.

15Tũq pơnõq nhũ trôh Je-ru-sa-lem, Pitrai tơma dơlãp sàc talơvãt, sì pơdòq pơtiãuq avih mơnuĩh kãq pa-vlơi dơlãp sàc talơvãt tơviãq blàc, Pitrai kung vlữc ban mơnuĩh sơdua jĩn sì gìq dơgrữq mơnuĩh pa-vlơi chĩp katrơu hũ. 16Pitrai pakỡuq ôh vrơi gơnuar ga asơi va kaya kãq pa-vlơi nao gãt anĩh làt sàc talơvãt. 17Vloh Pitrai pơto pơđar pơnõq nhũ làiq: “Ôh iỡuq hũ pơnuaĩq wãq:

‘Sàc kơu ròq hũ angãn la sàc iơu lakơu ga avih pơjẽh vual vơla’ yơh?

Nữn pơnõq hã song ngãq ga nhũ jỡc sơrỗh lơvàc dơgrữq mơnuĩh tlẽq sơwah.”

18Dơgrữq pô pioh kaya duh talơvãt prong sì dơgrữq pô pơto voh-va hmỡq dơgrữq pơnuaĩq nữn, nữn pơnõq nhũ duah pơnẽq pioh pa-mơtai Pitrai. Kơyua pơnõq nhũ huaĩq Pitrai, kơyua avih tơpuôl vual vơla mãq ngãq krơi mưng kaya pơto pơđar Pitrai hũ. 19Trôh sồp tlãp, pơnõq nhũ tơviãq tlah mưng palơi prong.

20Trôh sơdah mư-ờp, tũq Yàc Je-su nao gãt, pơnõq nhũ bôh kayơu song thô tơhiu mưng ala tãl phuỗt. 21Pier sơdor wỡq nữn đơp sì Pitrai: “Ơ pôgrũ, iãq vẽq dih! Kayơu vãl kađòc pôgrũ sơtãp lơmah song thô tơhiu sì tơhiu vloh.” 22Yàc Je-su đơp sì pơnõq nhũ: “Iỡuq hũ voh-tui mưng Yàc Pô Lơngĩq. 23Iỡuq viãq, pôgrũ đơp sì adơi sơai, mơnuĩh halơi đơp sì chỡq nĩ làiq: ‘Iỡuq wơh tơgùq sì pơlẽq trỗt pãq ala tơsìq,’ nữn ôh dỡq dỡng hagĩq dơlãp hatai, nữn pãc-tui pơnuaĩq drơi đơp ròq tơviãq jỡc, nữn vruãq nữn ròq hũ tơviãq jỡc ga mơnuĩh nữn. 24Kơyua yơu nữn, pôgrũ đơp ga adơi sơai: Dơgrữq kaya adơi sơai lakơu sì dơlãp tũq iơu lakơu, iỡuq pãc-tui làiq adơi sơai song tồq mãq hũ, nữn avih kaya nữn ròq la kaya adơi sơai hũ. 25Tũq adơi sơai dòq dỡc iơu lakơu, mơyah làiq adơi sơai hũ pơnuaĩq jơdrãq dì gỡuq, nữn iỡuq tơleh dlàiq vẽq, pioh Ama adơi sơai hũ la Pitao dòq pãq dlòc lơngĩq kung tơleh dơgrữq kaya sỗq adơi sơai hũ.” 26(Nữn mơyah làiq adơi sơai ôh tơleh dì gỡuq, nữn Ama adơi sơai hũ la Pitao pãq dlòc lơngĩq kung ôh tơleh dơgrữq kaya sỗq dlàiq adơi sơai hũ.)

27Tũq nữn, pơnõq nhũ nao trôh Je-ru-sa-lem. Tũq nữn Yàc Je-su ãn dòq nao dơlãp sàc talơvãt, dơgrữq pô pioh kaya talơvãt, dơgrữq pô pơto voh-va, sì dơgrữq pô tơha trôh pãq Pitrai. 28Pơnõq nhũ tơnĩa Pitrai: “Kơyua gơnuar chơnuãq halơi nữn pôgrũ ngãq dơgrữq vruãq nữn? Asơi vrơi ga pôgrũ gơnuar chơnuãq nĩ pioh ngãq yơu nữn?” 29Nữn Yàc Je-su hẽ sì pơnõq nhũ: “Kơu kung ròq tơnĩa dơgrữq pơnõq ung sa dơdiãng, sì iỡuq drơ ga kơu, vloh kơu ròq vrơi ga dơgrữq ung thơu mưng gơnuar chơnuãq halơi kơu ngãq dơgrữq vruãq nữn. 30Adãt bãp-tem Jãng hũ la mưng dlòc lơngĩq hẽla mưng anàq mơnuĩh? Iỡuq drơ vẽq ga kơu.” 31Pơnõq nhũ vơyai sì gỡuq làiq: “Pơnõq drơi drơ yơu hayơu nĩ? Mơyah làiq pơnõq drơi đơp: ‘Mưng lơngĩq’ nữn mơnuĩh nĩ ròq tơnĩa: ‘Mơyah làiq yơu nữn, kơyua hayơu pơnõq ung ôh pãc-tui Jãng?’ 32Hẽla pơnõq drơi đơp: ‘Mưng anàq mơnuĩh,’ …?” (Pơnõq nhũ huaĩq vual vơla, kơyua asơi kung mững Jãng viãq la mơnuĩh gơnuar hwơr.) 33Yơu nữn pơnõq nhũ drơ wỡq sì Yàc Je-su: “Pơnõq hlãq ôh thơu.” Yơu nữn Yàc Je-su đơp sì pơnõq nhũ: “Kơu kung ròq ôh vrơi ga pơnõq ung thơu kơyua mưng gơnuar halơi kơu ngãq jỡc dơgrữq vruãq nữn.”