Jãng 9

1Vloh ãn tũq nao jơlàt, Pitrai bôh sa aràc mơnuĩh vùp mưng tũq đeh tơviãq. 2Dơgrữq mơnuĩh mơgrũ Pitrai tơnĩa Pitrai làiq: “Ra-bi, asơi song sỗq dlàiq, nhũ hẽla ami ama nhũ, tồq vloh nhũ vùp mưng vơhrơu đeh tơviãq?” 3Yàc Je-su hẽ làiq: “Ôh iỡuq nhũ sỗq dlàiq, kung ôh iỡuq ami ama nhũ, tồq yơu nữn la pioh ga vruãq Yàc Pô Lơngĩq hũ ràc tơviãq mưng nhũ. 4Nĩ la kaya iỡuq ngãq pioh ga pơnõq drơi ngãq vruãq Pitao song pơđar pôgrũ dơlãp tũq ãn dòq dlài harơi. Dlài mơlãp jẽq trôh la tũq nữn ôh aràc asơi pơlih ngãq vruãq jỡc. 5Dơlãp tũq pôgrũ dòq dơlãp dun kơyua, nữn pôgrũ la kaya sơđah dun kơyua hũ.” 6Hadơi sì tũq đơp pơnuaĩq nữn, Pitrai ka-chôh ia mơvah trỗt hlùq, nữn sigỡuq sì ia mơvah nữn Pitrai jrơu jỡc hlùq võq, vloh mãq pơ-uãq ga sơai nữn hlùq võq nữn pơ-uãq di mơta nhũ hũ. 7Pitrai đơp sì nhũ: “Iỡuq nao rao pãq dơnao Si-lô-e” (gơtha la “Ãt Pơđar Nao”). Yơu nữn, nhũ nao sì rao mơta, vloh nữn mơta nhũ jỡc sơđah bôh wỡq. 8Patui nữn, dơgrữq mơnuĩh palơi lơgar sì dơgrữq mơnuĩh ròq iãq bôh nhũ nữn mưng hlơu thrơi, mưng tũq nhũ la sa aràc mơnuĩh yòc lakơu bõc, pơnõq nhũ đơp: “Ôh iỡuq nĩ la mơnuĩh lơđãp dòq guh lakơu yòc bõc yơh?” 9Hũ tơkìq mơnuĩh đơp làiq: “Nữn la nhũ.” Mơnuĩh tơmo đơp: “Ôh iỡuq, bôh làiq, mơnuĩh nữn bòq mơta ngãq yơu nhũ.” Dòq nhũ nữn miẽt drơ làiq: “Viãq la hlãq nĩ.” 10Yơu nữn, tơpuôl nữn tơnĩa nhũ làiq: “Ngãq yơu hayơu mơta sơai jỡc hũ sơdah?” 11Nhũ drơ làiq: “Mơnuĩh angãn la Je-su song jrơu dluh sì pa-pĩt di mơta kơu, vloh pơđar kơu làiq: ‘Iỡuq nao trôh Si-lô-e nữn rao.’ Yơu nữn, hadơi sì tũq nao trôh song rao, mơta kơu jỡc sơdah bôh.” 12Tơpuôl nữn tơnĩa nhũ làiq: “Mơnuĩh nữn dòq pãq halơi?” Nhũ drơ: “Kơu ôh thơu.”

13Pơnõq nhũ va nhũ nao, mơnuĩh halơu nữn nhũ vùp, trôh pãq anĩh mơnuĩh Pha-ri-si. 14(Tũq nữn la harơi Sa-bat, Yàc Je-su song jrơu dluh sì ngãq sơdah mơta nhũ dơlãp harơi nữn.) 15Patui nữn, dơgrữq mơnuĩh Pha-ri-si vloh kung tơnĩa wỡq nhũ ngãq hayơu nữn mơta sơai jỡc sơdah bôh. Vloh nhũ đơp sì tơpuôl nữn: “Ung nữn mãq dluh pa-pĩt di mơta kơu, sì kơu nao rao nữn jỡc sơdah bôh.” 16Hadơi nữn, hũ tơkìq mơnuĩh dơlãp dơgrữq mơnuĩh Pha-ri-si đơp: “Mơnuĩh nĩ ôh pơweh mưng Yàc Pô Lơngĩq, kơyua nhũ ôh rơmiãq jàc harơi Sa-bat.” Hũ mơnuĩh tơmo nữn đơp: “Ngãq hayơu sa aràc, la mơnuĩh hũ dlàiq, pơlih ngãq tơviãq dơgrữq kaya krơi tơmo yơu nữn?” Nữn vloh hũ kaya pa-chơlah tơpuôl dơlãp pơnõq nhũ. 17Yơu nữn pơnõq nhũ tơnĩa mơnuĩh vùp sa bãc tơra: “Dòq sơai đơp hagĩq sì ung nữn, mưng tũq ung nữn song pơh sơdah mơta sơai?” Yơu nữn, sơai nữn drơ làiq: “Ung nữn la sa aràc mơnuĩh gơnuar hwơr.” 18Kơyua yơu nữn, mơnuĩh Ju-đa ôh pãc mưng vruãq nhũ làiq sơai nữn mưng halơu nhũ vùp nữn vloh tũq nĩ jỡc sơdah iãq bôh, miẽt tãl trôh tũq tơpuôl nữn iơu ami ama nhũ, la mơnuĩh mơta song jỡc sơdah iãq bôh. 19Tơpuôl nữn tơnĩa ami ama nhũ làiq: “Iỡuq lơĩh nĩ la anàq ung mòq hũ, mơnuĩh nữn ung mòq đơp la nhũ vùp mưng tũq đeh tơviãq? Yơu nữn, ngãq yơu halơi tũq nĩ nhũ vloh mơta jỡc sơdah bôh?” 20Nữn làiq ami ama nhũ drơ wỡq sì tơpuôl nữn: “Pơnõq hlãq kơnãl thơu làiq nĩ la anàq lakơi pơnõq hlãq, sì viãq nhũ vùp mưng tũq đeh tơviãq. 21Nữn tũq nĩ, ngãq hayơu nhũ jỡc sơdah iãq bôh, pơnõq hlãq ôh thơu, hẽla asơi song pơh mơta nhũ, pơnõq hlãq ôh thơu. Tơpuôl ung tơnĩa nhũ; nhũ prong dãm vloh. Sì ròq thơu akhàt ga rùp phàp nhũ.” 22Ami ama mơnuĩh vùp nữn đơp dơgrữq pơnuaĩq yơu nữn kơyua pơnõq nhũ huaĩq mơnuĩh Ju-đa. Kơyua mơnuĩh Ju-đa song ngãq gơnĩt vloh, mơyah làiq mơnuĩh halơi mãq angãn Pitrai la Yàc Dõc Pơ-tlah, nữn mơnuĩh nữn kađòc pa-trơh tơviãq sàc pơtõm. 23Kơyua yơu nữn, ami ama nhũ ròq đơp làiq: “Nhũ song prong dãm vloh, iỡuq tơnĩa nhũ vẽq.” 24Yơu nữn, trôh iơu wỡq bãc dua, pơnõq nhũ iơu mơnuĩh nữn halơu thrơi vùp nữn đơp sì nhũ: “Iỡuq padỡc tơgùq kaya gơhluh ga Yàc Pô Lơngĩq. Pơnõq drơi thơu làiq mơnuĩh nữn la sa aràc mơnuĩh hũ dlàiq.” 25Nữn vloh nhũ drơ làiq: “Ung nữn la mơnuĩh hũ dlàiq hẽla ôh hũ dlàiq, kơu ôh thơu. Kơu mĩn thơu sa kaya, nữn la bôh làiq kơu vùp, nữn tũq nĩ kơu jỡc sơdah iãq bôh.” 26Patui nữn, tơpuôl nữn đơp sì nhũ: “Mơnuĩh nữn song ngãq hagĩq ga sơai? Ung nữn song pơh mơta sơai yơu halơi?” 27Nhũ drơ làiq: “Kơu song akhàt ga pơnõq ung vloh, nữn pơnõq ung ôh hmỡq! Hayơu pơnõq ung ưng hmỡq wỡq sa bãc tơra yơh? Ôh iỡuq pơnõq ung kung ưng ngãq jỡc mơnuĩh mơgrũ ưng nữn yơh?” 28Nữn vloh tơpuôl nữn siẽq sier nhũ sì đơp: “Sơai nữn la mơnuĩh mơgrũ mơnuĩh nữn, dòq pơnõq drơi la mơnuĩh mơgrũ Môi-se. 29Pơnõq drơi thơu làiq Yàc Pô Lơngĩq song đơp sì Môi-se, nữn mơnuĩh nĩ, pơnõq drơi ôh thơu la mưng halơi trôh.” 30Nữn nhũ drơ wỡq sì đơp làiq: “Jơ tũq nĩ la kaya krơi viãq, làiq ung nữn song pơh mơta kơu jỡc sơdah nữn pơnõq ung vloh ôh thơu ung nữn mưng halơi trôh. 31Pơnõq drơi thơu làiq Yàc Pô Lơngĩq ôh pa hmỡq dơgrữq mơnuĩh hũ dlàiq, nữn mơyah làiq mơnuĩh halơi hũ hatai duh huaĩq sì ngãq tui hatai ưng Pitrai, nữn Pitrai pa hmỡq mơnuĩh nữn. 32Mưng rài sơđãq hlơu thrơi, ôh-ka hmỡq mưng vruãq sa aràc mơnuĩh halơi pơh sơdah mơta mơnuĩh vùp mưng tũq đeh tơviãq. 33Mơyah làiq mơnuĩh nĩ ôh iỡuq la mưng Yàc Pô Lơngĩq, sì mơnuĩh nữn ôh tũq halơi ngãq jỡc avih dơgrữq vruãq.” 34Tơpuôl nữn drơ wỡq nữn đơp sì nhũ: “Rùp phàp sơai hũ đeh tơviãq dơlãp dlàiq dơnũh nữn vloh sơai ãn pơto pơđar pơnõq drơi yơh?” Nữn vloh tơpuôl nữn pơtiãuq nhũ tơviãq.

35Yàc Je-su hmỡq làiq tơpuôl nữn song pơtiãuq nhũ tơviãq blàc nữn nao duah pãp nhũ, Pitrai đơp: “Sơai pãc-tui Anàq Mơnuĩh lơĩh?” 36Nhũ drơ sì đơp: “Ơ Pitrai, mơnuĩh nữn la asơi, tồq hlãq pơlih pãc-tui dơlãp nhũ?” 37Yàc Je-su đơp sì nhũ: “Sơai song iãq bôh nhũ, sì nữn la mơnuĩh ãn đơp sì sơai nĩ.” 38Tũq nữn, nhũ đơp: “Ơ Yàc, hlãq pãc-tui,” sì nhũ duh talơvãt Pitrai. 39Yàc Je-su đơp: “Kơu song trôh dơlãp dun kơyua nĩ kơyua kaya chahrơna, tồq ga dơgrữq mơnuĩh ôh iãq bôh pơlih jỡc iãq bôh, sì dơgrữq mơnuĩh iãq bôh ròq tơviãq jỡc vùp.” 40Mưng dơlãp tơpuôl mơnuĩh Pha-ri-si ãn dòq pãq đỡn sì Pitrai, pơnõq nhũ hmỡq dơgrữq pơnuaĩq nữn, nữn tơnĩa Pitrai: “Nữn vloh gãm pơnõq drơi kung vùp yơh?” 41Yàc Je-su đơp sì pơnõq nhũ: “Mơyah làiq pơnõq ung kađòc vùp nữn viãq làiq la pơnõq ung ôh hũ dlàiq, nữn tũq nĩ pơnõq ung đơp làiq: ‘Pơnõq drơi bôh.’ Yơu nữn, dlàiq pơnõq ung hũ miẽt dòq gãm.”