Jãng 7

1Hadơi dơgrữq vruãq nữn, Yàc Je-su nao lũ anĩh dơlãp phũm Ga-li-le, nữn Pitrai ôh ưng nao pãq Ju-đe kơyua mơnuĩh Ju-đa ãn duah pơnẽq pa-mơtai Pitrai. 2Tũq nữn, song jẽq trôh harơi pơjũm prong Adãt Tlam Padơh, mơnuĩh Ju-đa hũ. 3Yơu nữn, dơgrữq adơi lakơi Pitrai đơp sì Pitrai: “Iỡuq tơviãq mưng anĩh nĩ sì nao pãq Ju-đe, pioh dơgrữq mơnuĩh mơgrũ sơai hũ kung ròq bôh dơgrữq vruãq nữn sơai ngãq jỡc. 4Kơyua ôh asơi ưng ga vual vơla thơu trôh vloh ngãq sa kaya suà dơđỡuq. Mơyah làiq sơai ngãq jỡc dơgrữq vruãq yơu nĩ, nữn iỡuq pabôh tơviãq rùp drơi ga dun kơyua thơu vẽq.” 5Kơyua gãm sì dơgrữq pơnõq adơi Pitrai kung ôh hũ voh-tui dơlãp Pitrai. 6Kơyua yơu nữn, Yàc Je-su đơp sì pơnõq: “Tũq jơ sơai hũ ka-ôh trôh, nữn tũq jơ pơnõq adơi hũ vloh tũq halơi kung rơchãc lơĩh. 7Dun kơyua ôh tũq halơi lơmùq mơvai pơnõq adơi, nữn dun kơyua lơmùq mơvai kơu kơyua kơu ngãq chưng mưng dun kơyua làiq dơgrữq vruãq ngãq pơnõq nhũ hũ la iãh mơsãc. 8Pơnõq adơi iỡuq tơgùq nao pơjũm vẽq; dòq kơu ka-ôh nao pơjũm adãt nĩ jỡc kơyua tũq jơ kơu ka-ôh tãl.” 9Tũq nữn, hadơi sì tũq đơp yơu nữn sì pơnõq nhũ, nữn Pitrai miẽt dòq wỡq pãq Ga-li-le. 10Bôh làiq yơu nữn, tũq pơnõq adơi Pitrai song tơgùq nao pơjũm adãt nữn, sì tũq nữn Pitrai kung nao, nữn la nao tui savĩq dơđỡuq, ôh vrơi pa-thơu. 11Kơyua yơu nữn, mơnuĩh Ju-đa duah Pitrai dơlãp harơi pơjũm, sì tơnĩa, làiq: “Pãq halơi ung nữn?” 12Hũ lũ mơnuĩh dơlãp tơpuôl vual vơla hũ pơnuaĩq đơp vơyai rơlẽq sigỡuq mưng Pitrai. Lũ mơnuĩh đơp làiq: “Ung nữn la mơnuĩh siàp.” Nữn hũ mơnuĩh vloh đơp: “Ôh iỡuq, pa-vlữq wỡq, ung nữn dui-va vual vơla nao sỗq jơlàt.” 13Bôh làiq yơu nữn, ôh asơi akhàt vrơi pa-thơu lanơng lơnai mưng Pitrai kơyua huaĩq mơnuĩh Ju-đa.

14Tũq nữn, dơlãp di khrãh harơi adãt vloh, Yàc Je-su tơgùq nao pãq sàc talơvãt sì pơdòq pơto akhàt. 15Yơu nữn mơnuĩh Ju-đa mãq ngãq krơi viãq, đơp làiq: “Ngãq hayơu ung nĩ thơu rgơi dơgrữq pơnuaĩq dơlãp Srãq sơđah, bôh làiq nhũ ôh hũ adũq mơgrũ halơi?” 16Nữn vloh, Yàc Je-su hẽ sì pơnõq nhũ, nữn Pitrai đơp: “Pơnuaĩq pơto akhàt kơu hũ ôh iỡuq la mưng kơu hũ, nữn la mưng Pitao song pơđar kơu hũ. 17Mơyah làiq mơnuĩh halơi avih hatai ưng ngãq tui hatai Pitrai, mơnuĩh nữn ròq thơu mưng pơnuaĩq pơto nĩ iỡuq lơĩh pơnuaĩq nĩ la trôh mưng Yàc Pô Lơngĩq hẽla kơyua mĩn kơu đơp tơviãq krơi. 18Mơnuĩh halơi kơyua mưng rùp phuỗt drơi nữn đơp, mơnuĩh nữn lakơu duah kaya gơhluh krơi ga drơi, nữn mơnuĩh duah kaya gơhluh ga Pitao song pơđar drơi nữn la mơnuĩh tơpãq viãq, sì ôh hũ kaya ôh tui tơpãq dòq dơlãp mơnuĩh nữn. 19Ôh iỡuq Môi-se song vrơi voh-va ga pơnõq ung yơh? Nữn ôh asơi dơlãp pơnõq ung ngãq tui voh-va. Hayơu pơnõq ung vloh duah pơnẽq pioh pa-mơtai kơu?” 20Vual vơla drơ wỡq: “Ung kađòc kamlai ãp tơma vloh! Asơi ưng pa-mơtai ung?” 21Yàc Je-su hẽ, nữn Pitrai đơp sì pơnõq nhũ: “Kơu song ngãq sa vruãq, sì avih dơgrữq tãl aràc pơnõq ung kung mãq ngãq krơi. 22Kơyua kaya nữn, Môi-se song vrơi adãt sìq kalìq ga pơnõq ung (ôh iỡuq adãt nữn tơviãq mưng Môi-se, nữn la tơviãq mững ung kõq), sì pơnõq ung ngãq tơviãq adãt sìq kalìq ga mơnuĩh lakơi dơlãp harơi Sa-bat. 23Mơyah làiq sa aràc mơnuĩh lakơi ãt adãt sìq kalìq dơlãp harơi Sa-bat pioh ôh ngãq sỗq voh-va Môi-se, nữn hayơu pơnõq ung vloh tơgùq ơnõc nõng mơvai kơu kơyua kơu pasồq pakhơĩh ga sa aràc mơnuĩh vãq avih rùp phàp jỡc prãn khãc dơlãp harơi Sa-bat? 24Juơi chahrơna tui gah lơniãu, nữn iỡuq chahrơna savĩq tơpãq dãng.”

25Patui nữn, vloh hũ mơnuĩh dơlãp vual vơla Je-ru-sa-lem đơp làiq: “Ôh iỡuq nĩ la mơnuĩh nữn pơnõq nhũ duah pơnẽq tồq pa-mơtai nữn yơh? 26Dih, ung nữn akhàt vrơi pa-thơu savĩq lanơng lơnai nữn pơnõq nhũ ôh đơp hagĩq jỡc sì ung nữn. Hayơu lơĩh dơgrữq mơnuĩh apãt akõq viãq thơu làiq ung nĩ la Yàc Dõc Pơ-tlah yơh? 27Bôh làiq yơu nữn, pơnõq drơi song thơu ung nĩ trôh mưng hlơi mai. Dòq tũq Yàc Dõc Pơ-tlah trôh, nữn ôh aràc asơi thơu palơi phuỗt Pitrai ôh yơh.” 28Hadơi nữn, dơlãp sàc duh talơvãt, Yàc Je-su pơto akhàt prong sãp sì đơp: “Pơnõq ung thơu kơu, kung thơu kơu mai mưng hlơi trôh. Kơu ôh trôh tui hatai ưng krơi drơi, nữn Pitao song pơđar kơu la tơpãq viãq, la Pitao nữn pơnõq ung ôh thơu. 29Kơu thơu Pitrai kơyua kơu mưng Pitrai nữn trôh, sì Pitrai song pơđar kơu.” 30Yơu nữn, pơnõq nhũ duah pơnẽq mãq Pitrai, nữn ôh asơi yìq tơngãn pãq rùp Pitrai kơyua tũq jơ Pitrai ka-ôh trôh. 31Bôh làiq yơu nữn, lũ mơnuĩh dơlãp vual vơla hũ voh-tui chàc gơnang dơlãp Pitrai sì pơnõq nhũ đơp: “Tũq Yàc Dõc Pơ-tlah trôh, nữn vloh Pitrai ôh ròq ngãq lũ kaya krơi tơmo rlao sì dơgrữq kaya mơnuĩh nĩ song ngãq mĩn?” 32Mơnuĩh Pha-ri-si hmỡq vual vơla đơp são pãq tanĩa dơgrữq pơnuaĩq nữn mưng Yàc Je-su, nữn dơgrữq mơnuĩh gơnuar pioh kaya duh talơvãt prong gãm sigỡuq sì mơnuĩh Pha-ri-si pơđar mơnuĩh lĩng nao tồq pơnõq nhũ mãq Pitrai. 33Yơu nữn, Yàc Je-su đơp: “Kơu dòq sigỡuq sì pơnõq ung ôh suơi tơra, vloh kơu nao wỡq pa Pitao song pơđar kơu. 34Pơnõq ung ròq duah kơu nữn ròq ôh pãp kơu, sì anĩh kơu dòq pơnõq ung ròq ôh tũq halơi trôh jỡc.” 35Kơyua nữn, mơnuĩh Ju-đa tơpuôl nhũ tơnĩa gỡuq: “Mơnuĩh nĩ sơga ngãq gơnĩt nao pãq halơi nữn pơnõq drơi ròq ôh duah jỡc nhũ? Vloh ung nữn sơga ngãq gơnĩt nao trôh sì vual vơla hadiuq gơprah gơprĩc dơlãp tơpuôl mơnuĩh Gơ-rec sì pơto akhàt ga vual vơla Gơ-rec iỡuq lơĩh? 36Pơnuaĩq nĩ hũ gơtha hagĩq nữn nhũ song đơp: ‘Pơnõq ung ròq duah kơu nữn pơnõq ung ròq ôh pãp, sì anĩh kơu dòq pơnõq ung ôh tũq halơi trôh jỡc’?”

37Nữn vloh, dơlãp harơi luôĩq, la harơi prõc màc rlao avih dơlãp harơi adãt, Yàc Je-su tơgùq dỡc vloh đơp prong sãp làiq: “Mơyah làiq mơnuĩh halơi mơhao iỡuq trôh pãq kơu nữn mơnhũm. 38Mơnuĩh halơi pãc-tui dơlãp kơu, drưh yơu pơnuaĩq Sơrãq Sơđah song wãq: ‘Kròc ia gãm hadiuq ròq đuaĩq tơviãq mưng hatai mơnuĩh nữn hũ.’” 39Tũq nữn, Pitrai đơp pơnuaĩq nĩ angãn mưng Vơngãq Sơđah, Pitao nữn dơgrữq mơnuĩh halơi pãc-tui dơlãp Pitrai ròq hũ tồq mãq, kơyua Vơngãq Sơđah tũq nữn ka-ôh vrơi trỗt kơyua Yàc Je-su ka-ôh hũ sơuỗt mơyòp. 40Patui nữn, tũq hmỡq dơgrữq pơnuaĩq nữn, hũ tơkìq mơnuĩh dơlãp vual vơla nữn pơnõq nhũ đơp: “Nĩ viãq la mơnuĩh gơnuar hwơr.” 41Hũ tơkìq mơnuĩh tơmo đơp: “Mơnuĩh nĩ la Yàc Dõc Pơ-tlah.” Nữn kung hũ mơnuĩh đơp: “Vloh iỡuq viãq, ôh iỡuq Yàc Dõc Pơ-tlah tơviãq mưng Ga-li-le yơh? 42Ôh iỡuq Sơrãq Sơđah wãq akhàt làiq Yàc Dõc Pơ-tlah ròq tơviãq mưng pơjẽh pơtiàt Đa-vit, sì mưng Bet-le-hem, la palơi tìt nữn Đa-vit song hadiuq yơh?” 43Kơyua yơu nữn, kaya pa-chơlah gỡuq tơviãq dơlãp vual vơla kơyua mưng Pitrai. 44Tũq nữn, hũ tơkìq mơnuĩh dơlãp tơpuôl nhũ ưng mãq Pitrai, nữn ôh asơi khĩn mãq tơngãn tèc trôh Pitrai jỡc.

45Hadơi nữn, dơgrữq mơnuĩh lĩng iãq jàc mai wỡq pãp dơgrữq mơnuĩh gơnuar padỡc kaya duh talơvãt prong gãm sì mơnuĩh Pha-ri-si, dơgrữq mơnuĩh nữn tơnĩa pơnõq nhũ: “Kơyua hayơu pơnõq hã ôh mãq va ung nữn mai pãq đì?” 46Dơgrữq mơnuĩh lĩng drơ: “Ka-ôh hũ asơi pơto akhàt yơu mơnuĩh nĩ.” 47Yơu nữn la, dơgrữq mơnuĩh Pha-ri-si drơ sì pơnõq nhũ wỡq: “Nữn pơnõq hã kung kađòc pa-gơla vloh yơh? 48Hũ mơnuĩh halơi lơĩh dơlãp tơpuôl mơnuĩh apãt akõq hẽla dơlãp tơpuôl mơnuĩh Pha-ri-si pãc-tui ung nữn yơh? 49Bôh làiq yơu nữn, tơpuôl vual vơla nữn ôh thơu voh-va nĩ, tơpuôl nhũ viãq đang mang sơtãp ơluah!” 50Ni-kô-đem (mơnuĩh kung gãm trôh pãp Yàc Je-su hlơu thrơi, la sa aràc mơnuĩh pơweh gah tơpuôl nhũ) đơp sì pơnõq nhũ: 51“Voh-va pơnõq drơi hũ ôh vrơi gơnuar chahrơna sa aràc mơnuĩh halơi, pa-trơh tơviãq hlơu viãq pa-hmỡq mưng mơnuĩh nữn đơp sì thơu mơnuĩh nữn ngãq dơgrữq kaya hagĩq, iỡuq lơĩh?” 52Pơnõq nhũ drơ nữn đơp wỡq sì ung: “Nữn vloh ung kung ôh pơweh gah vual vơla Ga-li-le yơh? Miẽt iãq pơwih sì ròq bôh, làiq ôh hũ mơnuĩh gơnuar hwơr halơi tơviãq mưng lơgar Ga-li-le.”

53[Vloh avih tãl aràc kung nao wỡq pãq sàc drơi.