Jãng 16:33

1“Pôgrũ song đơp dơgrữq kaya nữn ga pơnõq adơi sơai, pioh ga adơi sơai ôh sơnẽq sỗq. 2Pơnõq nhũ ròq ngãq ga adơi sơai kađòc pơtiãuq tơviãq mưng sàc pơtõm. Vloh yơu nữn wỡq, tũq jơ jẽq trôh la pioh ga dơgrữq mơnuĩh ngãq pa-mơtai adơi sơai sơnơng làiq drơi ãn padỡc tơgùq kaya adãt duh talơvãt ga Yàc Pô Lơngĩq. 3Pơnõq nhũ ròq ngãq dơgrữq vruãq nữn kơyua pơnõq nhũ ôh thơu Ama, kung ôh thơu pôgrũ. 4Bôh làiq yơu nữn, pôgrũ song đơp dơgrữq kaya nĩ ga adơi sơai tồq tũq jơ pơnõq nhũ hũ trôh, adơi sơai sơdor wỡq dơgrữq pơnuaĩq nữn pôgrũ song akhàt payơr ga adơi sơai. Vơnãh tơmo, pôgrũ ôh akhàt payơr dơgrữq kaya nĩ ga adơi sơai mưng tũq chơmrờp kơyua pôgrũ gãm dòq sì adơi sơai. 5Dòq tũq nĩ pôgrũ nao trôh pãq Pitao song pơđar pôgrũ, sì ôh asơi dơlãp adơi sơai tơnĩa pôgrũ: ‘Pôgrũ ãn nao pãq halơi?’ 6Pa-vlữq wỡq, kaya ka-ồq ka-iãp song vỡq vãq tũc hatai adơi sơai hũ kơyua pôgrũ song đơp sì adơi sơai dơgrữq kaya nĩ. 7Bôh làiq yơu nữn, pôgrũ đơp viãq sì adơi sơai, pôgrũ tơviãq nao nữn la va kaya kuơ màc ga adơi sơai. Kơyua mơyah làiq pôgrũ ôh tơviãq nao, nữn Pitao Paluơ Padờp ròq ôh trôh sì adơi sơai. Nữn mơyah làiq pôgrũ nao, nữn pôgrũ ròq pơđar Pitao nữn trôh sì adơi sơai. 8Dơlãp tũq song trôh, Pitao nữn ròq ràc pa-tơviãq dun kơyua mưng dlàiq dơnũh, mưng kaya tơpãq dãng, sì mưng kaya chahrơna — 9mưng dlàiq dơnũh, la kơyua pơnõq nhũ ôh pãc-tui pôgrũ; 10mưng kaya tơpãq dãng, la kơyua pôgrũ nao trôh pãq Ama, yơu nữn adơi sơai ròq ôh dòq bôh pôgrũ tơra; 11dòq mưng kaya chahrơna, la kơyua mơnuĩh apãt akõq dun kơyua nĩ song kađòc chahrơna. 12Pôgrũ dòq lũ kaya pioh đơp sì adơi sơai, nữn tũq nĩ adơi sơai ka-ôh thơu gơnĩt jỡc. 13Nữn tũq Pitao nữn, la Yàc Vơngãq Pơnuaĩq Tơpãq trôh, Pitrai ròq va adơi sơai tơma dơlãp dơgrữq pơnuaĩq tơpãq, kơyua Pitrai ròq ôh đơp tơviãq krơi drơi, nữn Pitrai ròq đơp dơgrữq kaya halơi Pitrai hmỡq, sì Pitrai ròq ràc akhàt tơviãq ga adơi sơai dơgrữq vruãq ãn tơviãq trôh. 14Pitao nữn ròq sơ-uỗt mơyòp pôgrũ, kơyua Pitrai ròq tồq mãq dơgrữq kaya mưng anĩh pôgrũ nữn ròq akhàt pa-tơviãq ga adơi sơai. 15Dơgrữq kaya, avih dơgrữq kaya halơi Ama hũ, la pơweh sì pôgrũ. Kơyua yơu nữn, pôgrũ đơp làiq, Pitao nữn ròq tồq mãq dơgrữq kaya pôgrũ hũ sì akhàt pa-tơviãq ga adơi sơai. 16Tũq ôh suơi tơra, adơi sơai ôh dòq bôh pôgrũ, vloh ôh suơi hadơi nữn, adơi sơai ròq bôh pôgrũ wỡq.” 17Hadơi nữn, hũ hadùp aràc dơlãp dơgrữq mơnuĩh mơgrũ Pitrai đơp sì gỡuq: “Vruãq nĩ la yơu halơi dơlãp tũq pôgrũ đơp sì pơnõq drơi làiq: ‘Tũq ôh suơi tơra, adơi sơai ôh bôh pôgrũ, vloh ôh suơi hadơi nữn, adơi sơai ròq bôh pôgrũ wỡq’ sì: ‘Kơyua pôgrũ nao trôh pãq Ama’?” 18Kơyua nữn, pơnõq nhũ đơp: “‘Tũq ôh suơi’ gơtha la hayơu? Pơnõq drơi ôh thơu pôgrũ ãn đơp hagĩq.” 19Yàc Je-su thơu làiq pơnõq nhũ ưng tơnĩa Pitrai, yơu nữn Pitrai đơp sì pơnõq nhũ: “Iỡuq lơĩh adơi sơai ãn duah tơnĩa krơi gỡuq mưng pơnuaĩq nữn pôgrũ song đơp: ‘Tũq ôh suơi tơra, adơi sơai ôh bôh pôgrũ, vloh ôh suơi hadơi nữn adơi sơai ròq bôh pôgrũ wỡq’? 20Iỡuq viãq, iỡuq viãq, pôgrũ đơp sì adơi sơai làiq adơi sơai ròq sià chõq, suãq yuà, dòq dun kơyua nữn uỗt sơh. Adơi sơai ròq ka-ồq ka-ãn, nữn kaya ka-ồq ka-ãn adơi sơai hũ ròq tơviãq jỡc kaya uỗt sơh. 21Tũq halơi mơnuĩh kamơi pơđìq đeh nữn hũ kaya pơđìq pơđua kơyua tũq jơ drơi song trôh, nữn tũq song đeh tơviãq jỡc anàq tìt, nhũ ôh dòq sơdor trôh kaya dleh dlàr drơi tơra, kơyua kaya uỗt sơh mưng sa aràc mơnuĩh song hũ pajỡc tơviãq dơlãp dun kơyua. 22Kung yơu nữn, tũq nĩ adơi sơai hũ kaya ka-ồq ka-iãp, nữn pôgrũ ròq pãp wỡq adơi sơai, vloh hatai adơi sơai ròq hũ sơh sơr, sì ôh asơi suãq va jỡc kaya uỗt sơh adơi sơai hũ tơviãq tlah mưng adơi sơai. 23Dơlãp harơi nữn adơi sơai ròq ôh tơnĩa pôgrũ kaya hagĩq wỡq. Iỡuq viãq, iỡuq viãq, pôgrũ đơp sì adơi sơai, dơgrữq kaya halơi adơi sơai iơu lakơu Ama mãq angãn pôgrũ, Pitrai ròq vrơi ga adơi sơai. 24Tãl trôh tũq nĩ, adơi sơai ka ôh mãq angãn pôgrũ lakơu kaya halơi. Iỡuq iơu lakơu vẽq, nữn adơi sơai ròq tồq mãq hũ, pioh kaya uỗt sơh adơi sơai nữn hũ wil tãl.

25Pôgrũ song đơp dơgrữq kaya nĩ sì adơi sơai mưng pơnuaĩq pa-mơyơu; nữn tũq jơ trôh, pôgrũ ròq ôh hũ đơp sì pơnõq adơi sơai mưng dơgrữq pơnuaĩq pa-mơyơu tơra, pa-vlữq wỡq, pôgrũ ròq akhàt pa-tơviãq ga adơi sơai savĩq nĩq nũn mưng Ama. 26Dơlãp harơi nữn, adơi sơai ròq mãq angãn pôgrũ sì lakơu, nữn pôgrũ ôh đơp sì adơi sơai làiq pôgrũ ròq lakơu sì Ama ala ga adơi sơai, 27kơyua rùp phuỗt Ama khiãng duman adơi sơai, kơyua adơi sơai anĩt anar pôgrũ sì pãc làiq pôgrũ song trôh mưng Ama. 28Pôgrũ song trôh mưng Ama sì song tơma dơlãp dun kơyua. Vloh pôgrũ tlàq dun kơyua sì nao trôh wỡq pãq Ama.” 29Dơgrữq mơnuĩh mơgrũ Pitrai hũ drơ: “Dih, tũq nĩ pôgrũ ãn đơp savĩq nĩq nũn, nữn ôh đơp mưng pơnuaĩq pa-mơyơu. 30Jơ nĩ, pơnõq hlãq thơu làiq pôgrũ thơu avih dơgrữq kaya, sì ôh chàc iỡuq hũ mơnuĩh halơi tơnĩa pôgrũ. Kơyua yơu nữn, pơnõq hlãq pãc làiq pôgrũ song trôh mưng Yàc Pô Lơngĩq.” 31Yàc Je-su hẽ làiq sì pơnõq nhũ: “Tũq nĩ adơi sơai pãc-tui lơĩh? 32Iãq dih, tũq jơ ãn trôh — sì song trôh — nữn adơi sơai kađòc gơprãh gơprĩc, dơgrữq tãl aràc nữn nao tui jơlàt krơi drơi, dòq pôgrũ nữn adơi sơai tlàq luơi dòq sa aràc. Bôh làiq yơu nữn, pôgrũ ôh tũq halơi kađòc dòq laơi, kơyua Ama dòq sigỡuq sì pôgrũ. 33Pôgrũ song đơp dơgrữq kaya nĩ ga adơi sơai, tồq pioh ga adơi sơai hũ kaya dadu lơngai dơlãp pôgrũ. Adơi sơai ròq pãp kaya dleh dlàr dơlãp dun kơyua, nữn iỡuq gơjãp hatai, pôgrũ song pha rlao sì dun kơyua vloh.”