Jãng 14:27

1“Hatai adơi sơai juơi kađòc jơdỡl. Adơi sơai pãc-tui vẽq dơlãp Yàc Pô Lơngĩq, nữn adơi sơai kung iỡuq pãc-tui dơlãp pôgrũ. 2Dơlãp sàc Ama pôgrũ hũ lũ anĩh dòq. Nữn mơyah làiq ôh iỡuq yơu nữn, nữn pôgrũ song đơp ga adơi sơai vloh, kơyua pôgrũ ròq nao pioh rơchãc lơĩh ga adơi sơai sa vĩq anĩh. 3Mơyah làiq pôgrũ nao sì rơchãc lơĩh ga adơi sơai sa vĩq anĩh, nữn pôgrũ ròq mai wỡq sa bãc tơra tồq ròq adơi sơai nao sigỡuq sì pôgrũ, pôgrũ dòq pãq halơi nữn adơi sơai kung ròq dòq pãq anĩh nữn. 4Adơi sơai song thơu jơlàt nao trôh anĩh nữn pôgrũ ãn nao.” 5Thô-ma tơnĩa Pitrai: “Ơ Yàc, pơnõq hlãq ôh thơu Pitrai nao pãq halơi. Nữn ngãq hayơu pơnõq hlãq pơlih thơu jơlàt jỡc?” 6Yàc Je-su đơp sì ung: “Pôgrũ la jơlàt nao, pơnuaĩq tơpãq, sì kaya hadiuq; ôh hũ mơnuĩh halơi trôh pa Ama jỡc nữn mơyah làiq ôh gơnang mưng pôgrũ. 7Mơyah làiq adơi sơai song thơu pôgrũ, nữn adơi sơai kung thơu Ama pôgrũ. Mưng tũq nĩ, tãl trôh hadơi, adơi sơai song thơu Pitrai sì song bôh Pitrai.” 8Phi-lip đơp sì Pitrai: “Ơ Yàc, lakơu pơto Ama ga pơnõq hlãq, yơu nữn la tãl ga pơnõq hlãq vloh.” 9Yàc Je-su đơp sì ung: “Pôgrũ song dòq sigỡuq sì adơi sơai suơi yơu nữn vloh, nữn sơai vloh ka-ôh thơu pôgrũ yơh, Phi-lip? Mơnuĩh halơi song bôh pôgrũ nữn song bôh Ama. Hayơu sơai đơp làiq: ‘Iỡuq pơto Ama ga pơnõq hlãq’? 10Adơi sơai ôh pãc làiq pôgrũ dòq dơlãp Ama, sì Ama dòq dơlãp pôgrũ yơh? Dơgrữq pơnuaĩq nữn pôgrũ đơp sì adơi sơai nữn pôgrũ ôh đơp tơviãq krơi drơi, nữn mĩn Ama gãm hadiuq dơlãp pôgrũ ãn dòq ngãq vruãq Pitrai hũ. 11Nữn iỡuq pãc pôgrũ, làiq pôgrũ dòq dơlãp Ama, sì Ama dòq dơlãp pôgrũ; Sì mơyah làiq ôh pãc, nữn iỡuq pãc vẽq kơyua mĩn dơgrữq vruãq pôgrũ ngãq. 12Iỡuq viãq, iỡuq viãq, pôgrũ đơp viãq sì adơi sơai, mơnuĩh halơi pãc-tui dlãp pôgrũ, nữn mơnuĩh nữn ròq ngãq dơgrữq vruãq sì pôgrũ ngãq; sì mơnuĩh nữn ròq ngãq dơgrữq vruãq prõc rlao nữn wỡq, kơyua pôgrũ ròq jẽq nao trôh pãq Ama. 13Dơgrữq kaya hagĩq adơi sơai mãq angãn pôgrũ nữn iơu lakơu, pôgrũ ròq ngãq kaya nữn ga adơi sơai, pioh ga Ama hũ sơ-uỗt mơyòp kơyua mưng Anàq. 14Mơyah làiq adơi sơai mãq angãn pôgrũ lakơu kaya hagĩq, pôgrũ ròq ngãq kaya nữn ga adơi sơai. 15Mơyah làiq adơi sơai khiãng anĩt pôgrũ, nữn adơi sơai ròq rơmiãq jàc dơgrữq kaya pơđar-va pôgrũ hũ, 16pôgrũ kung ròq iơu lakơu sì Ama, sì Pitrai ròq vrơi ga adơi sơai Pitao Paluơ Padờp tơmo tồq Pitao nữn dòq sigỡuq sì adơi sơai tãl trôh gãm gãm, 17nữn la Vơngãq Pơnuaĩq Tơpãq, la Pitao nữn dun kơyua ôh tũq halơi tồq mãq hũ, kơyua mưng pơnõq nhũ ôh kơnãl bôh Pitrai, kung ôh thơu Pitrai. Nữn adơi sơai thơu Pitrai, kơyua Pitrai hadiuq sigỡuq sì adơi sơai sì ròq dòq dơlãp adơi sơai. 18Pôgrũ ròq ôh luơi adơi sơai dòq rơbah la-ơi ôh; Pôgrũ ròq mai wỡq sì adơi sơai. 19Dòq sa tũq lơwah katũt, nữn dun kơyua ôh dòq bôh pôgrũ tơra; nữn adơi sơai bôh pôgrũ, kơyua pôgrũ hadiuq, nữn adơi sơai kung ròq hadiuq. 20Dơlãp harơi nữn, adơi sơai ròq thơu làiq pôgrũ dòq dơlãp Ama pôgrũ, adơi sơai dòq dơlãp pôgrũ, sì pôgrũ kung dòq dơlãp adơi sơai. 21Mơnuĩh halơi hũ kaya pơđar-va pôgrũ sì rơmiãq jàc nhũ, nữn la mơnuĩh anĩt duman pôgrũ; sì mơnuĩh halơi anĩt duman pôgrũ ròq hũ Ama pôgrũ anĩt duman; pôgrũ kung ròq anĩt duman mơnuĩh nữn sì akhàt tơviãq rùp pôgrũ ga mơnuĩh nữn thơu.” 22Ju-đa (ôh iỡuq la Is-ka-ri-ôt) tơnĩa Yàc Je-su: “Ơ Yàc, vruãq hagĩq ròq trôh vloh Pitrai ràc tơviãq rùp Pitrai ga pơnõq hlãq nữn ôh ràc tơviãq rùp ga dun kơyua?” 23Yàc Je-su drơ wỡq nữn Pitrai đơp sì ung: “Mơyah làiq mơnuĩh halơi anĩt duman pôgrũ nữn mơnuĩh nữn ròq rơmiãq jàc pơnuaĩq pôgrũ. Ama pôgrũ ròq anĩt duman mơnuĩh nữn; nữn Pơnõq Drơi ròq trôh sì mơnuĩh nữn, nữn ròq ngãq jỡc sa anĩh pioh dòq dơlãp mơnuĩh nữn. 24Mơnuĩh halơi ôh anĩt duman pôgrũ nữn ôh rơmiãq jàc pơnuaĩq pôgrũ. Pơnuaĩq nữn adơi sơai hmỡq ôh iỡuq la mưng pôgrũ, nữn la mưng Ama, Pitao song pơđar pôgrũ.

25Pôgrũ song đơp dơgrữq pơnuaĩq nữn ga adơi sơai dơlãp tũq pôgrũ gãm dòq sigỡuq sì adơi sơai. 26Bôh làiq yơu nữn, Pitao Paluơ Padờp — nữn la Yàc Vơngãq Sơđah nữn Ama ròq mãq angãn pôgrũ pơđar trôh — Pitao nữn ròq pơto adơi sơai avih dơgrữq vruãq sì pa-sơdor wỡq ga adơi sơai sơdor avih dơgrữq kaya nữn pôgrũ song đơp sì adơi sơai. 27Pôgrũ luơi wỡq ga adơi sơai kaya dadu lơngai; Pôgrũ vrơi ga adơi sơai kaya dadu lơngai pôgrũ hũ, pôgrũ vrơi ga adơi sơai ôh yơu dun kơyua vrơi. Hatai adơi sơai juơi kađòc jơdỡl, kung juơi huaĩq tơtơh. 28Adơi sơai song hmỡq làiq pôgrũ song đơp sì adơi sơai: ‘Pôgrũ ròq nao, vloh ròq mai wỡq sì adơi sơai.’ Mơyah làiq adơi sơai anĩt duman pôgrũ, adơi sơai viãq ròq sơh-sơr kơyua tũq pôgrũ ròq nao trôh pãq Ama, kơyua Ama dòq prõc prong rlao pôgrũ. 29Tũq nĩ, Pôgrũ song đơp hlơu tũq vruãq ròq tơviãq trôh ga adơi sơai, pioh tũq vruãq nữn ròq tơviãq trôh nữn adơi sơai hũ hatai pãc-tui. 30Pôgrũ ròq ôh đơp lũ sì adơi sơai tơra, kơyua mơnuĩh apãt akõq dun kơyua nĩ ãn trôh. Sì nhũ ôh hũ vơnãh halơi dơlãp pôgrũ, 31nữn pioh ga dun kơyua thơu làiq pôgrũ anĩt duman Ama, sì Ama song pơto pơđar pôgrũ yơu halơi, nữn pôgrũ ròq ngãq tơviãq yơu nữn. Tơgùq dỡc vẽq, pơnõq drơi iỡuq nao tlah mưng anĩh nĩ.”