E-phe-sô 4:32

1Yơu nữn, kơu la mơnuĩh dòq kađòc krỡq kơyua mưng Yàc, rãn lakơu pơnõq adơi sơai iỡuq hadiuq savĩq đang mang sì kaya iơu jàq nữn pơnõq adơi sơai ròq hũ iơu trôh, 2gãm avih dơgrữq kaya pơviar rùp sì lơmeh lơmõn, sigỡuq sì hatai ãt-ỡl, tồq ãt gui di gỡuq dơlãp kaya khiãng duman, 3rãn avih prãn pioh rơmiãq jàc kaya salơvãq sì Yàc Vơngãq Sơđah dơlãp akôh salơnuãq dadu lơngai. 4Mĩn hũ sa rùp phàp sì sa Yàc Vơngãq Sơđah, kung yơu pơnõq adơi sơai song hũ iơu jàq trôh sa kaya chàc gơnang dơlãp kaya iơu jàq drơi hũ, 5mĩn hũ sa Yàc, sa voh tui, sa adãt bãp-tem, 6mĩn hũ sa Yàc Pô Lơngĩq, la Ama dơgrữq anàq mơnuĩh hũ, Pitao dòq pãq dlòc dơgrữq mơnuĩh, mưng dơgrữq anàq mơnuĩh sì dơlãp dơgrữq mơnuĩh. 7Nữn, kaya anĩt song hũ vrơi ga avih dơgrữq tãl aràc pơnõq drơi tui yơu pơgãp kor halơi nữn dơlãp kaya alĩn vrơi Yàc Dõc Pơ-tlah hũ. 8Kơyua nữn, hũ pơnuaĩq wãq:

“Tũq Pitrai đìq tơgùq dơgrữq anĩh dloòng,

Pitrai nao hlơu dui-va dơgrữq mơnuĩh kađòc jam,

sì vrơi lũ kaya alĩn ga avih dơgrữq pơjẽh pơtiàt anàq mơnuĩh.”

9Bôh làiq yơu nữn, “Pitrai đìq tơgùq pãq dlòc” gơtha la hagĩq mơyah làiq ôh iỡuq la Pitrai kung song trỗt trôh dơgrữq anĩh viar pãq ala tơnãh hũ? 10Mĩn rùp phuỗt Pitao song trỗt kung la Pitao song tơgùq dloòng rlao avih dơgrữq tãl lơngĩq, pioh Pitrai pơlih ngãq vãq sơrè dơgrữq kaya. 11Mĩn rùp phuỗt Pitrai song chẽq vrơi sa katih mơnuĩh ngãq mơnuĩh gơnuar pơđar, hũ mơnuĩh ngãq gơnuar hwơr, hũ mơnuĩh tơmo nao pơto akhàt Pơnuaĩq Siàp, dòq mơnuĩh tơmo ngãq gơnuar pơto sì pôgrũ, 12pioh tũq kaya pơkhrà rơchãc dơgrữq mơnuĩh gơnuar pơđar sơđah ga kaya duh vruãq, sì pơweh trôh pa kaya vỡq padỡc rùp phàp Yàc Dõc Pơ-tlah hũ, 13tãl trôh tũq avih dơgrữq pơnõq drơi ngãq jỡc dơlãp kaya salơvãq sigỡuq dơlãp voh tui sì kaya pãc thơu Anàq Yàc Pô Lơngĩq, tơviãq jỡc mơnuĩh prõng tơgùq, ngãq jỡc prãn khãc wil tãl Yàc Dõc Pơ-tlah hũ, 14pioh pơnõq drơi ôh dòq la lơđeh tìt, kađòc sũl mơgơi sì dui-va tui dơgrữq yua angĩn mơgrũ đõm pơto mưng kaya iãh sàq anàq mơnuĩh gơnang di kaya duah pơnẽq sì vơyai vlữq lor, kaya pơgàt pa-gơla. 15Pa-vlữq wỡq, dơlãp tũq đơp tơviãq pơnuaĩq tơpãq dơlãp kaya khiãng duman, pioh pơnõq drơi pơlih hũ prãn tơgùq dòq dơgrữq gah vơnah pơweh pa Pitrai, la Pitao apãt akõq, nữn la Yàc Dõc Pơ-tlah, 16mưng Pitrai nữn avih rùp phàp hũ salơvãq wỡq sì salơnuãq sì gỡuq gơnang di akôh nữn tơbuãq sì gỡuq, tui yơu kaya khưh rgơi ngãq jỡc dơlãp dơgrữq vơnah hũ, nữn ngãq ga rùp phàp prãn tơgùq pioh vỡq padỡc krơi drơi dơlãp kaya khiãng duman.

17Kơyua yơu nữn, hlãq đơp kaya nĩ sì pơto pa-sơdor pasũl pachôh pơnõq adơi sơai dơlãp Yàc pioh ôh bõc dòq ngãq nao yơu vual vơla lơniãu tơra, pơnõq nhũ hadiuq dơlãp kaya lơhiãq soh mưng dlò sơnơng drơi hũ. 18Kơyua kaya sơnơng pơnõq nhũ song ngãq ga sồp kơnãm, tơviãq jỡc chrih krơi pơweh sì kaya hadiuq Yàc Pô Lơngĩq hũ kơyua mưng kaya gơla pơtòq dòq dơlãp pơnõq nhũ, kơyua hatai pơnõq nhũ khãc viãq. 19Tũq tơviãq jỡc ôh dòq sa asĩt kaya sơnơng thơu, nữn pơnõq nhũ song tlàq rùp drơi pa-tơma dơlãp kaya rơngai hatai tồq ưng ngãq sỗq dơgrữq kaya tasỡuq nrãc gãm sì hatai ham khiãng. 20Nữn pơnõq adơi sơai song ôh mơgrũ thơu Yàc Dõc Pơ-tlah yơu nữn, 21kơyua viãq nữn la pơnõq adơi sơai song hmỡq mưng Pitrai sì hũ pơto pơđar dơlãp Pitrai, tui yơu pơnuaĩq tơpãq dòq dơlãp Yàc Je-su, 22làiq iỡuq wàq tlàq tlah mưng pơnõq adơi sơai dơgrữq kaya halơi pơweh sì kaya hadiuq ngãq nao halơu thrơi, nữn la anàq mơnuĩh tlãq song kađòc vrũq lơmuĩq mưng dơgrữq kaya hãm ưng vlữq lor nhũ hũ, 23nữn hũ ngãq tơviãq jỡc vơhrơu gơnang vơngãq sơđah dơlãp kaya sơnơng drơi hũ, 24sì chồq mãq anàq mơnuĩh vơhrơu, la mơnuĩh hũ chrơng pajỡc tui yơu Yàc Pô Lơngĩq hũ — dơlãp kaya tơpãq dãng sì kaya sơđah sơchih pơnuaĩq tơpãq hũ.

25Yơu nữn, dơlãp tũq tlàq luơi kaya đơp vlữq lor, dơgrữq tãl aràc iỡuq đơp pơnuaĩq tơpãq viãq sì mơnuĩh jẽq phia drơi, kơyua mưng pơnõq drơi la vơnah rùp phàp di gỡuq. 26Pơnõq adơi sơai hũ kaya nong mơvai nữn ôh sỗq dlàiq. Tãl trôh tũq ia harơi tơma nữn juơi pioh kaya nong mơvai dơlãp pơnõq adơi sơai, 27kung juơi luơi tũq lơwah ga kamlai ngãq aniãi. 28Mơnuĩh tlẽq sơwah juơi tlẽq sơwah tơra. Nữn, siàp rlao, mơnuĩh nữn iỡuq rãn prãn ngãq vruãq siàp mưng plàq tơngãn drơi, tồq ga mơnuĩh nữn hũ kaya hagĩq nữn pioh pa-mơpha ga dơgrữq mơnuĩh halơi ãn dòq dơlãp vơnah siẽuq sier. 29Juơi luơi pơnuaĩq đơp tasỡuq nrãc halơi đơp tơviãq mưng chơbuai pơnõq adơi sơai, nữn iỡuq đơp vẽq dơgrữq pơnuaĩq siàp pioh padỡc tơgùq mơnuĩh halơi dòq dơlãp kaya dleh dlàr kãn dơmãl, pioh pơnuaĩq nữn pơlih va kaya kaya anĩt ga mơnuĩh hmỡq, 30sì juơi ngãq ga Yàc Vơngãq Sơđah Yàc Pô Lơngĩq hũ ôh siàp hatai, kơyua mưng Pitrai nữn pơnõq adơi sơai hũ tap-ban-kiq tãl trôh harơi dơvuh sơlih. 31Iỡuq prah tlàq ơtah di pơnõq adơi sơai avih dơgrữq kaya phìq kơ-àc, kaya ơnõc mơvai prõng, lơmùq mơvai, gơrlah pơnuaĩq, sì đơp siẽq, sigỡuq sì dơgrữq kaya iãh mơsãc. 32Pa-vlữq wỡq, iỡuq akhàt pa-thơu sigỡuq hatai lơmuỡn siàp, anĩt duman, tơleh dlàiq di gỡuq kung yơu Yàc Pô Lơngĩq song tơleh dlàiq pơnõq adơi sơai dơlãp Yàc Dõc Pơ-tlah.