Skip to content
BibleKenya

Roglai Bible Literal Text

Kô-lô-se 4

Mơnuĩh ngãq pô, iỡuq va trôh ga dơgrữq mơnuĩh halỗt drơi hũ kaya tơpãq dãng sì kor gỡuq, kơyua thơu làiq drơi kung hũ sa Pô pãq dlòc lơngĩq.

Iỡuq gơjãp kađữc chơkhãq chàc dơlãp kaya iơu lakơu, iỡuq mơ-uãh mơdưh dơlãp vruãq iơu lakơu nữn mưng vơngãq hatai ỡn ngai, kung yơu iỡuq sa hatai sigỡuq iơu lakơu ala ga pơnõq hlãq, pioh ga Yàc Pô Lơngĩq pơh ga pơnõq hlãq mơvah bãc mưng vruãq pơto akhàt pơnuaĩq yàc, pioh đơp tơviãq kaya dơlãp dơđỡuq mưng Yàc Dõc Pơ-tlah, kung kơyua mưng kaya dơlãp dơđỡuq nữn, nữn hlãq kađòc kũm prĩq, ngãq hayơu pioh ga hlãq pơlih akhàt tơviãq kaya dơlãp dơđỡuq nữn savĩq nĩq nũn, yơu hlãq đang mang iỡuq đơp. Iỡuq bõc dòq dơlãp kaya jãc rgơi pơweh sì mơnuĩh lơniãu, sì thơu angui tũq jơ. Pơnuaĩq đơp pơnõq adơi sơai iỡuq hũ gãm kaya anĩt, iỡuq tơwơr pơtãl sơrã tơma đỡn, pioh thơu kaya nữn angui pioh ga pơnõq adơi sơai yơu halơi tồq hẽ wỡq sì dơgrữq tãl aràc.

Dơgrữq vruãq hlãq ngãq, nữn sa aràc mơnuĩh adơi sơai anĩt duman, sa aràc mơnuĩh halỗt mơnãq tui tơpãq, sì sa aràc mơnuĩh duh vruãq sigỡuq dơlãp Yàc, la Ty-chi-kơ ròq akhàt pa-tơviãq ga pơnõq adơi sơai thơu mưng hlãq, nhũ la mơnuĩh nữn hlãq pơđar nao trôh pãp pơnõq adơi sơai kơyua kanõh gơtha nĩ, nữn la tồq ga pơnõq adơi sơai thơu dơgrữq vruãq ngãq mưng pơnõq hlãq, sì pioh ga nhũ pơlih paluơ padờp hatai pơnõq adơi sơai, nao sigỡuq sì nhũ la Ô-ne-sim, la adơi sơai tui tơpãq sì anĩt duman, nhũ kung tơviãq mưng dơlãp pơnõq adơi sơai, pơnõq nhũ ròq vrơi ga pơnõq adơi sơai thơu dơgrữq vruãq dòq pãq đĩ.

A-ri-tac, ban mơyơu kađòc jam sigỡuq sì hlãq hũ, tơnĩa rơwãc pơnõq adơi sơai, gãm sì Mak, mơnuĩh adơi sơai gỡuq gãt gah Ba-na-ba hũ (pơnõq adơi sơai song tồq mãq hũ pơnuaĩq pơto hakơi mưng nhũ; mơyah làiq nhũ nao trôh sì pơnõq adơi sơai, nữn iỡuq tồq ròq nhũ), kung yơu Je-su, mơnuĩh dòq hũ iơu angãn la Juc-tu. Nhũ kung la mơnuĩh tơviãq mưng dơlãp dơgrữq mơnuĩh song ãt sìq kalìq, pơnõq nhũ la dơgrữq ban mơyơu duh vruãq sigỡuq sì hlãq kơyua mưng palơi lơgar Yàc Pô Lơngĩq hũ, pơnõq nhũ la sa kaya paluơ padờp ga hlãq. E-phap-ra tơnĩa rơwãc pơnõq adơi sơai, nhũ la sa aràc mơnuĩh dơlãp pơnõq adơi sơai, kung la sa aràc mơnuĩh halỗt mơnãq Yàc Dõc Pơ-tlah Je-su hũ, nhũ mơsôh gãm kơyua mưng pơnõq adơi sơai dơlãp kaya iơu lakơu, tồq ga pơnõq adơi sơai hũ ngãq pioh kơjãp kađữc, prõng tơgùq, sì pãc-tui gơnĩt viãq dơlãp dơgrữq kaya tui hatai ưng Yàc Pô Lơngĩq hũ. Kơyua hlãq ngãq chưng mưng nhũ, làiq nhũ song ãt dleh dlàr lũ viãq kơyua mưng pơnõq adơi sơai, kung yơu kơyua mưng adơi sơai pãc-tui yàc pãq Lao-đi-xe sì adơi sơai pãq Hi-e-ra-bô-li. Lu-ka, mơnuĩh gơnuar jrao khiãng duman, sigỡuq sì Đe-ma, tơnĩa rơwãc pơnõq adơi sơai. Lakơu tơnĩa rơwãc dơgrữq pơnõq adơi sơai pãq Lao-đi-xe, sì Nim-pha, sigỡuq sì Sàc pơjũm sơđah pơjũm pơtõm pãq sàc sơai kamơi nữn. Tũq sơrãq pơyua nĩ song hũ pơpoh di khrãh pơnõq adơi sơai vloh, gơnĩt viãq làiq nhũ kung hũ pơpoh pãq Sàc pơjũm sơđah Lao-đi-xe, sì gơnĩt viãq làiq pơnõq adơi sơai kung iỡuq pơpoh sơrãq mưng Lao-đi-xe pơyua trôh. Lakơu đơp sì A-chip, làiq: “Iỡuq iãq rơchãc dơlãp gơnuar vruãq nữn sơai song tồq mãq dơlãp Yàc, pioh sơai pơlih ngãq ga wil tãl gơnuar vruãq nữn.”

Pơnuaĩq tơnĩa rơwãc nĩ mĩn mưng tơngãn hlãq — Pol wãq. Iỡuq sơdor trôh dơgrữq talơi prĩq kũm akãq hlãq hũ. Lakơu kaya anĩt dòq sigỡuq sì pơnõq adơi sơai.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.