Vruãq 1:8

1Pa-thơu ung The-ô-phi-lơ, dơlãp sơrãq hlơu thrơi, hlãq hũ wãq mưng dơgrữq kaya Yàc Je-su song pơdòq ngãq tơviãq sì pơto pơđar, 2tãl trôh harơi Pitrai hũ tồq ròq đìq lơngĩq, tũq Pitrai song kơyua mưng Yàc Vơngãq Sơđah vrơi gơnuar pơđar ga dơgrữq mơnuĩh gơnuar pơđar nữn Pitrai song duỡt ruãh. 3Hadơi sì kaya ãt pơđìq pơđua, Pitrai kung song akhàt pa-tơviãq ga pơnõq nhũ Pitrai hadiuq sigỡuq sì lũ krung pahanh ngãq gơnĩt. Dơlãp pàq plôh harơi Pitrai song pabôh tơviãq ga pơnõq nhũ sì đơp dlài mưng lơgar Yàc Pô Lơngĩq hũ. 4Dơlãp tũq dòq pơtõm gỡuq, Pitrai song hakơi pơnõq nhũ juơi tơviãq tlah Je-ru-sa-lem, nữn iỡuq dòq chàc pơnuaĩq grưh Ama hũ, nữn la kaya adơi sơai song hmỡq mưng Pôgrũ, 5làiq: “Jãng song ngãq Bãp-tem ga adơi sơai mưng ia, nữn ôh dòq suơi tơra, adơi sơai ròq tồq bãp-tem mưng Yàc Vơngãq Sơđah.”

6Kơyua yơu nữn, tũq pơjũm wỡq sì gỡuq, pơnõq nhũ tơnĩa Pitrai: “Pa-thơu Yàc, iỡuq mĩn nĩ la tũq Pitrai ròq padỡc wỡq lơgar ga Is-ra-el hũ yơh?” 7Pitrai đơp sì pơnõq nhũ: “Kaya pioh ga adơi sơai hũ thơu ôh iỡuq la tũq jơ hẽla tũq lơwah nữn Ama song ngãq gơnĩt tui gơnuar Pitrai hũ. 8Nữn adơi sơai ròq tồq mãq gơnuar chơnuãq tũq Yàc Vơngãq Sơđah pa-trỗt pãq dlòc drơi, sì adơi sơai ròq tơviãq jỡc mơnuĩh ngãq chưng ga Pôgrũ pãq Je-ru-sa-lem, dơlãp avih phũm Ju-đe sì phũm Sa-ma-ri, sì tãl trôh vãq avih voh tơnãh.” 9Tũq Pitrai song akhàt dơgrữq pơnuaĩq nữn vloh, ãn tũq pơnõq nhũ iãq tơgùq dlòc lơngĩq, nữn Pitrai hũ va tơgùq, sì sa pỗc huãl vơvãc dơđỡuq Pitrai tlah mơta pơnõq nhũ. 10Tũq pơnõq nhũ ãn mưng gơnĩt iãq tơgùq pãq dlòc lơngĩq dơlãp tũq Pitrai đìq lơngĩq, nữn dih, hũ dua aràc mơnuĩh lakơi chồq ao kòq dòq dỡc jẽq pơnõq nhũ. 11Pơnõq nhũ đơp: “Dơgrữq mơnuĩh Ga-li-le dih, hayơu pơnõq adơi sơai dỡc iãq pãq dlòc lơngĩq? Je-su nĩ, song hũ đìq dlòc lơngĩq dơđỡuq di pơnõq adơi sơai, kung ròq mai wỡq drưh yơu pơgãp pơnõq adơi sơai song bôh Pitrai đìq lơngĩq yơu nữn.”

12Vloh pơnõq nhũ mưng bò chỡq angãn la Ô-li-ve gơlàiq mai wỡq Je-ru-sa-lem, chỡq nữn dòq jẽq Je-ru-sa-lem, pơgãp sa dũq jơlàt nao dơlãp harơi Sa-bat. 13Tũq wỡq trôh anĩh, pơnõq nhũ đìq tơgùq adũq dlòc anĩh pơnõq nhũ ãn dòq, hũ gãm Pier, Jãng, Ja-kơ, sì An-dre, Phi-lip, sì Thô-ma, Ba-the-le-my, sì Ma-thi-ơ, Ja-kơ anàq lakơi A-phe sì Si-môn Se-lôt, sigỡuq sì Ju-đa anàq Ja-kơ. 14Avih tãl aràc pơnõq nhũ nữn hũ sa hatai miẽt tơriãc ahmiãc dơlãp kaya iơu lakơu sigỡuq sì dơgrữq mơnuĩh kamơi, hũ gãm Ma-ri, ami Yàc Je-su, sigỡuq sì dơgrữq adơi lakơi Pitrai hũ.

15Dơlãp dơgrữq harơi nữn, Pier tơgùq dỡc di khrãh dơgrữq adơi sơai — katih karhia dơgrữq mơnuĩh pơtõm gỡuq wỡq pãq anĩh nĩ pơgãp sa rơtôh dua plôh aràc, sì đơp làiq:

16“Nĩ, ơ adơi sơai, viãq iỡuq làiq pơnuaĩq Sơrãq Sơđah iỡuq tơviãq jỡc yơu nữn, nữn la pơnuaĩq Yàc Vơngãq Sơđah song akhàt hlơu mưng mơvah Pitao Đa-vit mưng Ju-đa, mơnuĩh tơviãq jỡc mơnuĩh va jơlàt ga tơpuôl mãq Yàc Je-su. 17Kơyua nhũ hũ angãn pa-tơma sigỡuq sì pơnõq drơi sì song tồq mãq vơnah drơi mưng gơnuar vruãq nĩ.” 18(Viãq, tũq nữn mơnuĩh nĩ song vlơi sa blàc hamã mưng jĩn priãq duah hũ mưng vruãq mơsãc drơi hũ, sì pãq đỡn nhũ lẽq chơlồt akõq, tũc tiàt tơvrãiq, dòq pruaĩq nhũ nữn hõq tơviãq avih gah lơniãu. 19Dơgrữq mơnuĩh hadiuq pãq Je-ru-sa-lem aràc asơi kung thơu vruãq tơviãq jỡc, yơu nữn pơnõq nhũ angãn la blàc hamã nữn mưng pơnuaĩq đơp pơnõq nhũ la “Hãt-en-đa-ma,” gơtha la: “Blàc Hamã Dơrah.”) 20“Kơyua dơlãp sơrãq Đơp Chrih hũ wãq làiq:

‘Iỡuq luơi blàc hamã nhũ kađòc luơi suà lìt,

kung Juơi hũ asơi hadiuq dòq pãq đỡn,’ sì

‘Iỡuq pioh mơnuĩh tơmo tồq mãq gơnuar vruãq apãt akõq nhũ hũ.’

21Kơyua nữn, iỡuq chàc hũ dơgrữq mơnuĩh song nao sigỡuq sì pơnõq drơi dơlãp avih dơgrữq tũq jơ nữn Yàc Je-su nao mai pãq khrãh pơnõq drơi, 22pơdòq ngãq mưng adãt Bãp-tem Jãng hũ tãl trôh harơi Pitrai hũ đìq tơgùq pãq dlòc tlah mưng pơnõq drơi — sa aràc dơlãp dơgrữq mơnuĩh nữn iỡuq sigỡuq sì pơnõq drơi tơviãq jỡc mơnuĩh ngãq chưng mưng kaya hadiuq wỡq Pitrai hũ.” 23Pơnõq nhũ pồq padỡc dua aràc, Jô-sep angãn la Ba-sa-ba, kung hũ angãn la Juc-tu, sì Ma-thia. 24Yơu nữn, pơnõq nhũ iơu lakơu, làiq: “Talơvãt Yàc, Pitrai thơu tũc hatai dơgrữq mơnuĩh hũ, lakơu Pitrai akhàt pa-tơviãq asơi dơlãp dua aràc mơnuĩh nĩ la mơnuĩh nữn Pitrai song ruãh 25pioh tồq mãq anĩh dơlãp kaya duh vruãq nĩ sì gơnuar pơđar nữn Ju-đa song tlàq luơi pioh nao trôh pãq anĩh nhũ hũ.” 26Pơnõq nhũ suãq katih mưng dua aràc nữn, sì suãq katih tơmã iỡuq Ma-thia, vloh ung hũ pơtãl tơma sigỡuq sì sa plôh sa aràc mơnuĩh gơnuar pơđar.