Roglai Bible Literal Text
2 Ti-mô-the 3
Nữn anàq iỡuq thơu kaya nĩ, nữn la dơlãp dơgrữq harơi luôĩq hadơi, ròq tơviãq jỡc hũ dơgrữq tũq lơwah kãn dơmãn. Kơyua anàq mơnuĩh ròq anĩt rùp phàp drơi, anĩt jĩn priãq, yeh pơchrìq, yeh drơi, ngãq sơvĩl, ôh pãc sãp ami ama, ôh thơu kaya anĩt, sì ôh sơđah sơchih, ôh hũ hatai anĩt, pơlih ôh sa lơnuãq sigỡuq, lơđãp đơp iãh, ôh iẽt amiẽt, sơh ngãq kaya brưh sơnãc, ôh anĩt anar kaya siàp, kơh jơdrãq, dĩq dĩl, pa-dlòc rùp yeh drơi, sơh ngãq kaya ham khiãng ling lang rlao la anĩt anar Yàc Pô Lơngĩq. Gah lơniãu ngãq yơu mơnuĩh duh huaĩq, nữn vloh kơmlah tlàq gơnuar chơnuãq kaya duh huaĩq hũ. Iỡuq pleh ơtah vẽq dì dơgrữq mơnuĩh nĩ.
Kơyua dơlãp pơnõq nhũ hũ dơgrữq mơnuĩh tlẽq duah tơma sàc anĩh aràc, vloh paluơ dơgrữq mơnuĩh kamơi gơla pơtòq, gui vãq dlàiq dơnũh, sì kađòc pơgàt pa-gơla kơyua mưng tãl dơgrữq kaya ham ưng, mơgrũ miẽt, nữn ôh tũq halơi pơlih nao trôh kaya kơnãl thơu pãc pơnuaĩq tơpãq. Jan-net sì Jam-be song jơdrãq sì Môi-se yơu halơi, nữn dơgrữq mơnuĩh nĩ kung ãn sòq jơdrãq sì pơnuaĩq tơpãq yơu nữn, tơpuôl pơnõq nhũ la dơgrữq mơnuĩh hũ dlò sanơng lơhiãq thĩt, la dơgrữq mơnuĩh vlữq lor pơweh sì voh tui. Nữn pơnõq nhũ ròq ôh nao ơtah jỡc, kơyua kaya gơla pơtòq pơnõq nhũ hũ ròq tơviãq jỡc nĩq nũn pãq anãq dơgrữq mơnuĩh, kung drưh yơu kaya gơla pơtòq dua aràc mơnuĩh dih hũ song ràc pa-tơviãq.
Nữn anàq song nao tui gơnĩt pơnuaĩq pơto, kaya ngãq nao, kaya sa kanõh, voh tui, hatai ãt-ỡl, kaya khiãng duman, kaya ãt ỡl kơu hũ, dơgrữq kaya mãq pakỡuq, dơgrữq kaya dleh dlàr, kung yơu dơgrữq vruãq song tơviãq trôh ga kơu pãq An-ti-ôt, pãq Y-kô-ni, sì Lit-trơ, sigỡuq sì sa pơnẽq kađòc mãq pakỡuq nữn kơu iỡuq ãt ỡl. Nữn Yàc song dõc suãq kơu tlah avih dơgrữq kaya nữn. Nữn viãq, avih dơgrữq mơnuĩh halơi ưng hadiuq sa vĩq duh huaĩq dơlãp Yàc Dõc Pơ-tlah Je-su avih kaya ròq kađòc mãq pakỡuq. Dòq tơpuôl mơnuĩh mơsãc sì mơnuĩh pa-gơla vơgãt ròq brõq pơtãl rlao, kaya ngãq iãh lũ rlao wỡq, pa-gơla aràc kung sì kađòc mơnuĩh pa-gơla wỡq. Bôh làiq yơu nữn, anàq miẽt dòq dơlãp dơgrữq kaya anàq song mơgrũ sì tui gơnĩt, kơyua thơu drơi song mơgrũ kaya nữn mưng mơnuĩh halơi, sì làiq mưng tũq dòq lơđeh tìt, anàq song mơgrũ thơu Sơrãq Sơđah, pơlih ngãq ga anàq jãc rgơi pioh hũ dõc tlah kơyua mưng voh tui dơlãp Yàc Dõc Pơ-tlah Je-su.
Avih Sơrãq Sơđah la kaya yuà vluh Yàc Pô Lơngĩq hũ, sì la kaya kuơ màc ga vruãq pơto pơđar, gơloh pơkhè, ngãq dlàiq, pơto pơsiàp dơlãp kaya tơpãq dãng, pioh ga mơnuĩh Yàc Pô lơngĩq hũ pơlih jỡc wil tãl, hũ rơchãc lơĩh tãl ga dơgrữq vruãq siàp.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.