Roglai Bible Literal Text
2 Ti-mô-the 1
Pol, ngãq mơnuĩh gơnuar pơđar Yàc Dõc Pơ-tlah Je-su hũ kơyua mưng hatai ưng Yàc Pô Lơngĩq hũ, tui yơu pơnuaĩq grưh mưng kaya hadiuq dơlãp Yàc Dõc Pơ-tlah Je-su, pơyua ga Ti-mô-the, anàq anĩt anar kơu hũ: Lakơu anàq hũ kaya anĩt, kaya anĩt duman sì dadu lơngai mưng Yàc Pô Lơngĩq, la Ama sì Yàc Dõc Pơ-tlah Je-su, Yàc pơnõq drơi.
Kơu padỡc pơnuaĩq ỡn ngai Yàc Pô Lơngĩq, Pitao kơu duh vruãq patui mưng dơgrữq ung kõq, gãm sì tũc hatai sơđah sơchih, tũq mơlãp harơi kơu ôh padưh gãm sơdor trôh anàq dơlãp pơnuaĩq iơu lakơu drơi hũ, chơkhãq khiãng pãp anàq, sơdor trôh ia mơta anàq, pioh kơu hũ vãq sơrè kaya uỗt sơh, kơyua hũ kaya pa-sơdor mưng voh tui viãq dơlãp anàq, la voh tui tũq chơmrờp dòq dơlãp Lô-ĩt, mòq pajỡc ami anàq, vloh dòq Ơ-nĩt, ami anàq, nữn kơu pãc làiq voh tui nữn kung ãn dòq dơlãp anàq.
Kơyua mưng kanõh nữn, kơu pa-sơdor anàq iỡuq dòq jẽq sì kaya anĩt Yàc Pô Lơngĩq hũ la kaya anĩt dòq dơlãp anàq kơyua mưng kaya chẽq tơngãn kơu hũ. Kơyua Yàc Pô Lơngĩq ôh ròq vrơi ga pơnõq drơi vơngãq hatai huaĩq tatơh hũ, nữn la vơngãq hatai prãn khãc, hũ kaya khiãng duman sì kaya thơu grơhia rùp. Yơu nữn, anàq juơi mơlơu ơlah mưng vruãq ngãq chưng ga Yàc pơnõq drơi, kung juơi malơu ơlah mưng kơu, mơnuĩh jam Pitrai hũ, pa-vlữq wỡq, iỡuq ãt sigỡuq dleh dlàr kơyua mưng Pơnuaĩq Siàp, gơnang gơnuar chơnuãq Yàc Pô Lơngĩq hũ, Pitao song dõc pơ-tlah pơnõq drơi sì iơu jàq pơnõq drơi mưng kaya iơu jàq sơđah, ôh iỡuq tui vruãq ngãq pơnõq drơi hũ, nữn tui sa kanõh kaya ưng krơi Pitrai hũ, sì tui kaya gơhluh, la kaya song hũ vrơi ga pơnõq drơi dơlãp Yàc Dõc Pơ-tlah Je-su mưng hlơu tãl trôh dòq gãm ôh luôĩq, sì tũq nĩ hũ ràc pa-tơviãq kơyua mưng kaya pabôh tơviãq Yàc Dõc pơnõq drơi hũ, la Yàc Dõc Pơ-tlah Je-su, tũq song ngãq mưng kaya mơtai ròq tơviãq jỡc ôh hũ gơnĩt viãq sì tuỗiq pơ sàc kaya hadiuq sigỡuq sì kaya ôh tũq halơi lơhiãq thĩt mưng pơnuaĩq siàp, kơyua Pơnuaĩq Siàp nữn sì kơu song hũ padỡc ngãq jỡc mơnuĩh pơto akhàt, ngãq mơnuĩh gơnuar pơđar, sì ngãq pô grũ pơto, kung kơyua mưng kanõh gơtha nữn sì kơu ãt dơgrữq kaya nĩ. Nữn kơu ôh malơu ơlah kơyua kơu thơu Pitao drơi pãc-tui, sì kơu ngãq gơnĩt làiq Pitrai hũ gơnuar iãq jàc kaya song pơjao kơu hũ tãl trôh luôĩq harơi nữn.
Anàq iỡuq mãq rơmiãq sơnua mưng dơgrữq pơnuaĩq pơto tơpãq viãq nữn anàq song hmỡq mưng kơu, sigỡuq sì voh tui sì kaya khiãng duman dơlãp Yàc Dõc Pơ-tlah Je-su. Iỡuq rơmiãq jàc kaya siàp gơnang Yàc Vơngãq Sơđah, la Pitao hadiuq dơlãp pơnõq drơi.
Anàq thơu kaya nĩ, nữn la avih dơgrữq mơnuĩh pãq A-si song kơmlah tlàq kơu, sì dơlãp đỡn hũ Phy-ghen sì Het-mô-ghen.
Lakơu Yàc vrơi kaya anĩt duman ga sàc anĩh Ô-ne-si-phô-rơ, kơyua nhũ miẽt gãm paluơ padờp kơu sì ôh malơu ơlah mưng talơi srẽng kơu hũ, pa-vlữq wỡq, tũq dòq pãq Rô-ma, sơai nữn tluỡiq gơhual duah tơnĩa mưng kơu sì kung duah hũ. Lakơu Yàc vrơi kaya anĩt ga sơai pioh duah hũ kaya anĩt duman mưng anĩh Pitrai hũ dơlãp harơi nữn. Dòq anàq thơu gơnĩt sơai nữn song duh vruãq lũ yơu halơi pãq E-phe-sô.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.