Skip to content
BibleKenya

Roglai Bible Literal Text

2 Pier 1

Si-môn Pier, mơnuĩh halỗt mơnãq sì mơnuĩh gơnuar pơđar Yàc Dõc Pơ-tlah Je-su hũ, pơyua dơgrữq mơnuĩh song tồq mãq sa voh tui kuơ màc sigỡuq sì pơnõq hlãq la voh tui dơlãp kaya tơpãq dãng Yàc Pô Lơngĩq sì Yàc Dõc pơnõq drơi hũ, la Yàc Dõc Pơ-tlah Je-su: Lakơu kaya anĩt sì kaya dadu lơngai miẽt brõq pơtãl ga pơnõq adơi sơai dơlãp kaya kơnãl thơu Yàc Pô Lơngĩq sì Yàc Je-su, Yàc pơnõq drơi. Kơyua song vrơi ga pơnõq drơi dơgrữq kaya pơweh trôh pa kaya hadiuq, trôh pa kaya duh huaĩq tui yơu gơnuar chơnuãq Pitrai hũ, tui yơu kaya kơnãl thơu Pitao song iơu jàq pơnõq drơi kơyua mưng kaya gơhluh sì hatai lơmuỡn siàp Pitrai hũ, nữn mưng dơgrữq kaya gơhluh kaya sơ-uỗt mơyòp nữn, Pitrai song vrơi ga pơnõq drơi dơgrữq pơnuaĩq hẽ grưh kuơ màc sì prõng màc, pioh gơnang mưng nữn pơnõq adơi sơai tơviãq jỡc dơgrữq mơnuĩh hũ phãn dòq dơlãp rùp phuỗt gah suàt vơngãq, tơviãq tlah mưng kaya wãc rơsi vrũq lơmuĩq dơlãp dun kơyua kơyua mưng kaya ham khiãng iãh sàq ngãq tơviãq, kung kơyua mưng kaya kanõh gơtha nữn, hadơi sì tũq rãn avih kaya tơriẽc amiẽt tluỡiq gơhual, pơnõq adơi sơai iỡuq pơtãl ga voh tui drơi hatai lơmuỡn siàp; pơtãl ga hatai lơmuỡn siàp la kaya jãc thơu; pơtãl ga kaya jãc thơu la kaya thơu gơrhia rùp; pơtãl ga kaya thơu gơrhia rùp la kaya ãt ỡl; pơtãl ga kaya ãt ỡl la hatai thơu duh huaĩq; pơtãl ga kaya thơu duh huaĩq la kaya anĩt anar pơnõq adơi sơai; pơtãl ga kaya anĩt anar pơnõq adơi sơai la kaya khiãng duman. Kơyua mơyah làiq dơgrữq kaya nữn hũ dòq dơlãp pơnõq adơi sơai sì hũ dơlãh dơlai dơlãp pơnõq adơi sơai, nữn vruãq song tơviãq trôh pãq dlòc pơnõq adơi sơai ròq ôh tũq halơi luơi soh hẽla ôh chơtai voh dơlãp kaya kơnãl thơu Yàc pơnõq drơi la Yàc Dõc Pơ-tlah Je-su. Kơyua dơgrữq kaya nữn ôh pabôh tơviãq dơlãp mơnuĩh halơi, nữn mơnuĩh nữn viãq la mơnuĩh sồp, mơnuĩh vùp, kađòc tơwãq kaya wơr avih kaya rao sơchih dơgrữq dlàiq halơu thrơi drơi hũ. Yơu nữn, pa-thơu pơnõq adơi sơai, iỡuq rãn avih prãn pioh ngãq gơjãp gơnĩt ga kaya iơu jàq sì kaya duỡt ruãh drơi hũ, kơyua mơyah làiq pơnõq adơi sơai ngãq tơviãq dơgrữq kaya nữn, pơnõq adơi sơai ròq ôh tũq halơi sơnẽq sỗq. Gơnang mưng kaya nĩ, vruãq yàp tơma dơlãp plơi lơgar gãm gãm Yàc hũ sì Yàc Dõc pơnõq drơi, la Yàc Dõc Pơ-tlah Je-su, ròq hũ vrơi sa vĩq lanơng lơnai ga pơnõq adơi sơai.

Kơyua yơu nữn, hlãq ròq gãm rơchãc lơĩh pơto pa-sơdor pơnõq adơi sơai mưng dơgrữq kaya nữn bôh làiq pơnõq adơi sơai song thơu sì hũ pơtãl dơlãp pơnuaĩq tơpãq ãn dòq dơlãp pơnõq adơi sơai. Nữn tũq halơi hlãq miẽt dòq dơlãp tlam padưh nĩ, hlãq sơnơng kaya iỡuq ngãq la ngãq pa-mơdưh pơnõq adơi sơai mưng vruãq pơto pa-sơdor, kơyua thơu làiq vruãq hlãq tơviãq nao mưng tlam padưh nĩ la kaya jẽq tơviãq trôh, drưh yơu Yàc pơnõq drơi, Yàc Dõc Pơ-tlah Je-su kung song ràc pa-tơviãq ga hlãq. Bôh làiq yơu nữn, hlãq kung ròq rãn ngãq dơgrữq kaya, pioh ngãq ga pơnõq adơi sơai wãq sơdor dơgrữq pơnuaĩq nĩ hadơi sì tũq hlãq tơviãq nao. Kơyua pơnõq hlãq ôh akhàt ga pơnõq adơi sơai dơgrữq vruãq tui yơu kaya sơnơng khưh pơcheh tơviãq mưng gơnuar chơnuãq sì kaya pabôh tơviãq Yàc pơnõq drơi hũ, la Yàc Dõc Pơ-tlah Je-su, nữn kơyua pơnõq hlãq song tơviãq jỡc dơgrữq mơnuĩh iãq bôh tõm mơta kaya mơ-àc mơyàc rùp phuỗt Pitrai hũ. Kơyua Pitrai song tồq mãq kaya ki ngãm sì kaya gơhluh mưng Yàc Pô Lơngĩq, la Ama, tũq hũ sãp đơp nĩ song vrơi pa-thơu mưng Pitrai kơyua mưng Pitao Gơnuar Chơnuãq Gơhluh, làiq: “Nĩ la Anàq Kơu, Anàq anĩt duman Kơu hũ, Kơu siàp hatai viãq mưng Anàq nữn.” Rùp phuỗt pơnõq hlãq kung song hmỡq sãp đơp nữn hũ vrơi pa-thơu mưng lơngĩq dlòc, ãn sì tũq dòq sì Pitrai pãq dlòc chỡq sơđah. Yơu nữn, pơnõq hlãq hũ pơnuaĩq đơp hwơr nĩ gơjãp gơnĩt viãq, la pơnuaĩq nữn pơnõq adơi sơai ãn ngãq iỡuq dơlãp tũq sơnơng iãq trôh nhũ, ngãq yơu iãq apôi đeng pơsàc dơlãp anĩh sồp kơnãm, tãl trôh tũq jrang sơdah dlài harơi tơviãq sì pitỗq sơdah mư-ờp dơlãp hatai pơnõq adơi sơai, kơyua hlơu avih thơu làiq, dơgrữq pơnuaĩq đơp hwơr dơlãp Sơrãq Sơđah ôh trôh mưng kaya ràc pa-tơviãq krơi mưng sa aràc mơnuĩh halơi. Kơyua ôh tũq halơi hũ sa pơnuaĩq đơp hwơr halơi nữn ràc pa-tơviãq kơyua mưng hatai ưng anàq mơnuĩh hũ, nữn pơnõq nhũ hũ dui-va kơyua mưng Yàc Vơngãq Sơđah, pơnõq nhũ song đơp tơviãq mưng Yàc Pô Lơngĩq.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.