హెబ్రీ 12

అం బో యీల పురువు

1ఎత్తె గొప్ప సాక్సిసమూహం అం చుట్టూ ఆవరించికిరితల్లందుకు తేలికగా చిక్కూనె దిల్లా పాపముకు సడదీకిరి, అం అగరె రొయిదిల్ల పందెమురె ఓపికదీకిరి దొమిడిమా. 2విస్వాసముకు కర్తైకిరి సడకు కొనసాగించిలా యేసు ఆడుకు దిక్కుంటా, సెయ్యె అమె అగరె రొయిదిల్ల ఆనందం కోసం అవమానముకు లెక్కనాకొరుకుంటా సిలువుకు సహించికిరి పురువు సింహాసనంరొ బత్తొకైలా అత్తొ ఆడుకు ఆసీనుడు యీకిరి అచ్చి.

3తొమె నాఅలిసికిరి తొం పొర్నొనె నావిసుకుపొడికుంట రొల్లపని పాపాత్ములు తాకు వ్యతిరేకముగా కొరిలాంచకు సహించిగిల్లాటకు గురించి ఆలోచించోండి.

4తొమె పాపము సంగరె పోరాడుటరె రొగొతొ గొలిలాపన ఇంక సడకు ఎదురించిలానీ. 5పురువు తా పోనె జో నె సంగరె కొతాలగినె ప్రొత్సాహపరిచిలా కొతానె పసిరిజీసోనా?

మో పో ప్రబువు కొరిలా సిక్సకు నాత్రునికరించికిరి

సెయ్యె తొత్తె హెచ్చిరించిలాబెల్లె విసిగితెనా.

6కైంకి బుల్నె ప్రబువు సెయ్యె

ప్రేమించిలా పతీలింకు సిక్సించికిరి

తాకు స్వీకరించిలా ప్రతీ పోకు సరికొరుసి.

7సిక్సాపలము పొందితె తొమె సహించిలీసొ. పురువు పోనెపనాక తొముకు దిగిలీసి. బో నాసిక్సించిలా పో కేసైనా అచ్చెనా? 8పో యీలాలింకె అల్లా సిక్సరె పాలుపొందిలీసె, తొమె నాపొందినె పొదర్లింకాక గాని పోనె నీ.

9ఈనె దే సంబందులైకిరి బోనె తంకు సిక్సంచిలాపన అచ్చె. తంకె బిత్తెరె డొరొబీతి కలిగికిరి అచ్చొ సాకిరి ఈనె ఆత్మానెకు బో యిలా తాకు మరి బడే లోబొడికిరి జీమంచి నీ! 10తంకె కుండె దినోనె తాకు యిస్టము యీలబెల్లె అముకు సిక్సించిసె గాని అమె తా పరిసుద్దతరె పాలుపొందిమంచిబులి అం మేలు కోసమాక సెయ్యె సిక్సించిలీసి. 11ఈనె ఉంచినె సొబ్బిసిక్స బాదగా దిగదూసి సంతోసముగా దిగిదిన్నీ. ఈనె తాండె అబ్యాసము కలిగిలాలింకు సడ నీతిబులి సమాదానమైల పలాలు దూసి.

పురువురొ క్రుపకు నాఅంగీకరించిలాలింకు హెచ్చరిక

12ఈనె అలిసిజిల్లా అత్తోనె నీరసించిజిల్లా మోకాల్లుకు బలపరచోండి.

13ఈనె సొట్టగొడ్డొ నా బెనుక్కుంటా బొల్లెయిజిల్లా నిమిత్తము తొం గొడ్డొనుకు బట్టోనె తిన్నగా కొరిగీండి.

14సొబ్బిలింకె సంగరె సమాదానముగా పరిసుద్దత కలిగిరొయితందుకు ప్రయత్నించొండి. పరిసుద్దత నీకుంటా కేసె ప్రబువుకు దిగినింతె. 15తొమె కేసెయీనెను పురువురొ క్రుపకు నా పొందికుంటా తప్పుజూసుకివో బులి చేదు యీలా సెరొ కిరయీనెను తొంబిత్తరె మొలిచికిరి బడేలింకె అపవిత్రూనె యీజోసొ కీవో దిగ్గీండి, 16గుటె పూట కద్దికోసం తా జ్యేస్టత్వపు హక్కు బిక్కిలా ఏసావుపనా దైవబీతినీలా దర్నిట పనాట అచ్చెకీవొ బులి జాగర్తగ దిగ్గీండి.

17ఏసావు సే తరువాత బో పక్కరె ఆసీర్వాదము కడిగిమంచి బులి అంకీనెరె పని సడదీకిరి కెత్తో స్రద్దసంగరె కుజ్జినన్నా సెయ్యె మారుమనుసు పొందితె అవకాసం మిల్లాని సెయ్యె సడదీసి బులి తొముకు తెలుసు. 181

తొమె ఇస్రాయేలులింకె అత్తొ సంగరె సుంగీకిరి తెలిసిగిల్లపన, పుడ్డితల్లానియ్య, వొందారొ కమ్మిల మెగొకు సంగరె ఆక్రమించిలా, తుపానుకు కమ్మిల సీనాయి పొరొతొ పక్కు అయిలానీ.

19బూరసబ్దముకు, కొతానె సబ్దముకు తొమె అయికిరినింతొ. సే సబ్దము సునిలాలింకె మరి కే కొతా కొయినాసి బులి బతిమాలిగిల్లీసె.

20కైంకిబుల్నే తంకె సే కొయిలా ఆజ్ఞానెకు సునితె తట్టిగిన్నారిసె ఇంకా సే పొరొతొకు సుంగిల్లా జంతువుయీనెనూ పొత్రొనె సంగరె మరికిరి మొరదిమ్మాసి.

21ఈనె సడ దిగితే కెత్తో బయంకరముగా రొల్లందరె మోసే మియ్యి కెత్తో డొరిజేకిరి వొనికిలించి బులిసి.

22ఉంచినైనె తొమె అయిలాట, సీయోను బుల్లా పొరొతొకు జీవం కలిగిలా పురువురొ పట్నము బుల్లా పరలోకపు యెరూసలేముకు హొజారొజారు కొల్దీ దేవదూతానె పక్కు అయిసొ.

23పరలోకమురె రాసికిరి రొల్లా పురువురొ అగరొ పోరొ సంగముకు, తంకె మహోత్సవముకు సొబ్బిలింకూ న్యాయాదిపతి యీలా పురువు పక్కరకు సంపూర్నస్తితి పొందిలా నీతిమంతునెరొ ఆత్మానె పక్కరకు అయిసు,

24నోనింబందనకు మొజిరెమనమైలా యేసుపక్కరకు హేబెలుకన్నా ఇంకా స్రేస్టముగా పలికిలా వొలికించిలా రొగుతొ పక్కు తొమె అయికిరి అచ్చొ.

25తొముకు బుద్ది కొయిలాలింకు ఎదురునాకొయికుంటా దిగ్గీండి. తంకె బూమంపరె తీకిరి బుద్ది కొయిలాలింకు కొత నాసునుకుంటా తప్పించిగిన్నె పరలోకం దీకిరి బుద్దికొయిలాటకు విసర్జించిలా అమె తప్పించిగిన్నారొ బుల్లాట మరి సొత్తాకనీనా. 26సెల్లె సెయ్యె సబ్దము బూమికి కదిలించిసి ఈనె ఉంచినె మియ్యి ఇంకగుటె సారి బూమికు మాత్రమాకనీ గని మెగొకూడ కదిలించిమి బులి కొతాదీసి. 27“ఇంకగుటె బెల్లె” బుల్లా కొతా కెడ కొయిలీసి బుల్నె, కదిలించినార్లాంచ మిగిల్లాపనికిరి, కదిలించబొడిలంచకు బుల్నె స్రుస్టించబొడిలాంచకు కడిపెవురాక.

28సడవల్లరె అమె నిచ్చలమైలా రాజ్యము పొందిగీకిరి, పురువుకు ఇస్టమీలపన తాకు హెచ్చించుకుంటా డొరొసంగరె క్రుతజ్ఞతలు చెల్లించిమండి.

29కైంకిబుల్నే అం పురువు దహించిలా నియ్యైకిరి అచ్చి.