సొత్తొ పురువురొ పవిత్రొ కొత
1 యోహాను 5
లోకమంపరె అం విజయం
యేసాక క్రీస్తుయీకిరి అచ్చిబులి నమ్మిలా ప్రతిజొనె పురువు మూలమురె జొర్నైకిరి అచ్చి. బోకు ప్రేమించిలా ప్రతిజొనె తావల్లరాక జొర్నైలాటకు ప్రేమించుసి. అమె పురువుకు ప్రేమించికిరి తా ఆజ్ఞానెకు నెరవేర్చిలాలింకె అయించొ పురువురొ పిల్లానెకు ప్రేమించిలించొ బులి సడవల్లరాక తెలిసిగించొ. అమె తా ఆజ్ఞానెకు పాటించువురాక పురువుకు ప్రేమించివురొ. తా ఆజ్ఞానె కస్టమైలాట నీ. పురువు వల్లరె జొర్నైలా సొబ్బిలింకె లోకముకు జయించుసె. లోకముకు జయించిలా విజయమాక అం విస్వాసం. యేసు పురువురొ పోబులి నమ్మిలాట తప్ప, లోకముకు జయించిలాట కేసె?
యేసుక్రీస్తు గురించి సాక్సం
పని ద్వారా రొగొతొ ద్వారా అయిలాట యెయ్యాక, బుల్నే యేసుక్రీస్తుక. యెయ్యె తా బాప్టీసం పనిసంగరె మాత్రమాకనీ తా మొర్నొబుల్లా రొగొతొ సంగరె అయిసి. ఆత్మ సత్యము గనక సాక్సం దిల్లాట ఆత్మాక. సాక్సం దిల్లాలింకె తిల్లింకె, బుల్నే ఆత్మ, పని, రొగొతొ, ఏ తిల్లింకె గుట్టాక సాక్సం దిల్లీసె.
అమె మనమాన్రొ సాక్సీనె అంగీకరించిలించొనీనా! ఈనె పురువురొ సాక్సము బలమైలాట. సడవల్లరె పురువు తా పో గురించి సాక్సం దీల్లీసి.
సడవల్లరె పురువురొ పో ఉంపరె విస్వాముదీగిల్లాలింకె తంకల్లా యే సాక్సం కలిగికిరి అచ్చె. ఈనె పురువుకు నమ్మిలాలింకె సెయ్యె తా పో గురించి దిల్లా సాక్సము నమ్మిలానీ గాని సెయ్యె పురువుకు సొరొకొతా లగిలపనాక కొరిలాలింకె. సే సాక్సము యెడాక పురువు అముకు నిత్య జీవముకు దీసి, యే జీవము తా పో పక్కరె అచ్చి. పురువు పో అంగీకరించిలలింకె నిత్యజీవము గలిగిలాలింకె పురువు పోకు నాఅంగీకరించిలాలింకె నిత్యజీవము నీలాలింకె.
నిత్యజీవం గురించి జ్ఞానం
పురువురొ పోరొ నారె విస్వాసము రొగ్గీకిరి తొమె నిత్యజీవము రొల్లాలింకె బులి తెలిసిగిల్లాపనికిరి మియ్యి యే సంగతీనె తొముకు రాసిలించి.
తా వల్లరె అముకు కలిగిలా దైర్యం కిరబుల్నే, తా ఇస్టప్రకారం అమె కెడ మగినెను సెయ్యె అం మనవి సునుసి.
అమె తాకు కిడమగినన్నా అం విన్నపం సునివొబులి అమె జనికిరి తన్నే తాకు మగిలాంచ మిలిసె బులి కూడ జనిమాసి. తా బయి నామొరివొలిసిలా పాపము కొరిలాటకు సే మనమకు దరికిరి పురువు జీవం దూసి. మొర్నొకరమైలా పాపం అచ్చి సడకోసం సెయ్యె ప్రార్దించివాసి బులి మియ్యి కొయివురొనీ. సొబ్బి దుర్నీతిరొ పాపము. ఈనె మొర్నొనీలా పాపము కూడా అచ్చి. పురువురొ పిల్లానె బుల్లాలింకె పాపము కొరుకుంట తన్నింతె బులి అముకు తెలుసు. ఈనె పురువుమూలంగా జొర్నైలాటకు బద్రము కొరుసి. దుస్టుడు తంకు నస్టము కొర్నీ.
అమె పురువురొ సంబందూనె బులి అముకు తెలుసు, ఈనె లోకమల్లా దుస్టుడురొ ఆదీనంరె అచ్చి బులి అముకు తెలుసు.
అమె సత్యమైలా పురువుకు తెలిసిగిమ్మాసిబులి, పురువురొ పో అయికిరి అముకు బుద్ది దీసిబులి అముకు తెలుసు. అమె పురువురొ పో యీల యేసుక్రీస్తురె తల్లాలింకైకిరి సత్య వంతులుగా అచ్చొ. సెయ్యాక సత్యమైలా పురువు నిత్యజీవమైకిరి అచ్చి.
మో పిల్లానె సొరొ పురువునుకు దూరుగా రోండి.
సొత్తొ పురువురొ పవిత్రొ కొత. Copyright © 2023 The Word for the World International and Relli Translation Samiti, Vishagapatanam, Andra Pradesh. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.